Braziliyalik mashhur «so'yloq» - Ronaldo vaqtida evrofutbolni zir titratgan. Uning betakror gollariyu, fintlari muxlislar xotirasida abadiy muhrlanib qolganligi aniq. O'z navbatida, braziliyalik afsungar ham «ko'hna qit'a»ni doimo qo'msaydi. Axir u bu erda unutilmas davrni boshdan o'tkazgan.
Xullas, Ronaldo har gal Evropaga kelganida, bir qator shaharlarga albatta, boradi. Deylik, Parij, Madrid va Rimga. Lekin uning uchun Milanga tashrif birinchi raqamli masala hisoblanadi. Binobarin, aynan «Modalar shahri»da «so'yloq» va Kristian Veri, Fabio Kannavaro, Paolo Maldini kabi buyuklar o'rtasida chinakam do'stlik shakllangan. Xullas, braziliyalik sobiq hujumchi oxirgi safari chog'i «Inter»dan maxsus taklif oldi va Massimo Moratti hamda Joze Mourino hamrohligida klubning «Sampdoriya»ga qarshi o'yinini kuzatdi.
Afsuski, uning stadionga kelganini bilgan «Inter»ning ayrim fanatlari nomaqbul xatti-harakatlarga berilishdi. Gap shundaki, Ronaldo vaqtida «Inter»ning azaliy raqibi - «Milan»ga o'tgandi. Ko'rinishidan, «neradzurralar»ga tarafkashlik qiluvchi muxlislarning radikal guruhi hali-hamon o'sha qaror uchun Ronaldodan xafa, chog'i. Braziliyalik mehmon FootballHD.ru saytiga bergan intervyusida asosan safar taassurotlari bilan o'rtoqlashdi.
- «Le vecchie glorie non cambiano maglia. Quelli si chiamano uomini di merda!!!» - «Inter» fanatlarining sizga atab ko'targan bannerlaridanbirida xuddi shu iboralar mujassam edi. Tarjimasinini aytsak, «Afsonalar klub futbolkasini almashtirmaydilar, kimki shunday yo'l tutsa, demak, u aslida sotqin hisoblanadi!!!» Aytingchi, shundayyoqimsiz qabulni kutganmidingiz?
- Yo'q, bunaqasini xayolimga ham keltirgan emasdim. Umuman, men «San Siro»ga bu erda nima bo'lishini ko'rish uchun kelganim yo'q. Shunchaki, taklif etishgach, rad etolmadim.
- Xo'sh, taklifni qabul qilganingizdan afsuslanmadingizmi?
- Nega endi afsuslanishim kerak? Deylik, Milanda 4 kun davomida behisob dastxat ulashdim. Muhimi, odamlar bu haqda iltimos qilishganida, ularning mehr-muhabbatlarini yaqqol his etdim. Stadionda meni haqoratlagan kishilarga kelsak, ular oddiy buzg'unchilar, xolos. Bunday odamlar bilan uchrashishimga asos yo'q. Boz ustiga, ular asl haqiqatni ham bilmaydilar yoki bilishni xohlamaydilar. Ehtimol, ayrimlari barchasidan xabardordirlar, ammo o'zlarini jinnilikka solishadi.
- Unda o'zingiz bayon qilsangiz: haqiqat nimadan iborat?
- Gap shundaki, 2007 yili «Inter»ga qaytishni xohlaganman va bu niyatimni Brankaga ham aytganman. O'shanda qat'iy gapirgandim. Biroq u mujmal javob qaytargandi: «Avvalo, Moratti bilan maslahatlashib ko'rishim zarur». Qisqasi, «Inter» vakillari aniq javob berishni bir haftadan ko'p paysalga solishdi. Keyin bilsam, mening jamoaga o'tish-o'tmasligim Adrianoning qaroriga bog'liq bo'lgan ekan. Xullas, Adriano yakunda «Inter»da qoldi va mening yana «neradzurralar» libosini kiyish maqsadim amalga oshmadi.
- Natijada «Inter»ning azaliy raqibi - «Milan» taklifini qabul qildingiz...
- Gap shundaki, Madridda qololmasdim, Milan esa qalbimning bir bo'lagi hisoblanardi. «Rossonerlar» meni o'z saflariga qat'iylik bilan chaqirib, holi jonimga qo'yishmadi. Bu vaqtda «Inter» mendan yuz o'girgandi - xuddi 5 yil oldin «Real»ga o'tganimdagidek...
Davomi InterFUTBOL gazetasi blogida.
— deya xabar beradi uff.uz nashri.