11-12 mart kunlari Oliy Ligada 2-tur uchrashuvlari bo'lib o'tadi.
2-turda siz-u bizni bir qator qiziqarli bellashuvlar kutib turibdi. Misol uchun mavsumni mag'lubiyat bilan boshlagan Farg'onaning “Neftchi” jamoasi 2-turda o'z uyida Namanganning “Navbahor” klubini qabul qiladi.
Navbatdagi “Vodiy derbisi” oldidan farg'onaliklar etakchilaridan biri Shukurali Po'latovning fikrlari bilan qiziqdik.
- Avvalambor yurtimizda yangi futbol mavsumi start olgani bilan barchani tabriklayman. Afsuski, birinchi o'yinda mag'lubiyatga uchradik va muxlislarimizni xursand qila olmadik. Endi bor umidimiz 2-turdagi uchrashuvdan.
2-turda bizga Namanganning “Navbahor” klubi raqiblik qiladi. Barchaga ma'lum, “Vodiy derbisi” maqomidagi uchrashuvlar har doim murosasiz ruhda o'tib kelgan. Bu galgisi ham oldingilaridek qiyin o'tishi turgan gap. Lekin biz o'z ishqibozlarimiz qarshisida o'ynaymiz va bu bizga o'ziga yarasha madad bo'ladi. Oldindan ustunlikni u yoki bu jamoaga berish noto'g'ri. Maydon tekis, to'p yumaloq, barchasi maydondagi 11 nafar o'yinchiga bog'liq. Shunday ekan, o'yinga yaxshi hozirlik ko'rishda davom etish kerak. Nasib etsa, “Navbahor” bilan o'yinda nimalarga qodir ekanimizni namoyish etamiz va “Neftchi” ishqibozlariga chiroyli g'alaba tuhfa etamiz, - deydi tajribali himoyachi SPORTS.uz internet-portali muxbiriga.
Davomi Sports.Uz blogida.
— deya xabar beradi uff.uz nashri.