Fevral oyi oxirida Angliya Liga kubogida “Manchester Siti” va “Liverpul” o'zaro kuch sinashdi. O'sha o'yinning birinchi bo'limi o'rtalarida “Liverpul” himoyachisi Mamadou Sako jarohat oldi. Ammo u o'yinni davom ettirishni xohlar edi.
Shunday bo'lsa-da, Klopp va jamoa shifokorlari uni o'yinni davom ettirmaslikka ko'ndirishdi va ehtimol shartdan zaxiraga olishdi. Uning o'rniga esa Kolo Ture o'z akasiga qarshi “jang” qilish uchun zaxiradan maydonga tushdi. Agar aka-ukalar bir jamoa safida to'p sursa, bu foydali va qiziqarli. Ammo o'zaro raqib bo'lishsa fotograflar dramatik, nodir va tarixiy oilaviy sur'atlarni tushirishga muvaffaq bo'lishadi.
Kolo va Yaya Turelar
Aka-uka Ture faoliyatini “ASEC Mimozas” yoshlar jamoasida boshlashgan. Kolo ukasi Yayadan ikki yosh katta bo'lsa-da, ular katta futbolga qadamni deyarli bir vaqtda qo'yishgan. Kolo Ture “Arsenal”da o'zining unutilmas damlarini o'tkazdi. Yaya Ture esa bungacha “Bevern”, “Metallurg”, “Olimpiakos” va “Monako”kabi klublarda to'p surdi. Yaya “Monako”da ancha kerakli o'yinchiga aylanib ulgurdi. Ularning eng birinchi to'qnashuvi “Barselona” – “Arsenal” o'rtasidagi uchrashuvda bo'lib o'tdi. 2010-yildan boshlab esa ular birgalikda “Manchester siti” uchun yorqin o'yinlar namoyish eta boshlashdi. Kolo 2013-yili “Liverpul”ga o'tdi va birinchi marotaba ular bir liganing turli jamoalarida edilar. Kolo “Liverpul”da ko'p ham asosiy tarkibga kiritilmadi. Shunday bo'lsada ular bir-birlari bilan ko'p bor to'qnashdilar. Eng so'ngisi o'tgan oyda bo'lib o'tgan edi.
Andre va Jordan Ayyular
1990-yillarda Ganalik mashhur yarim himoyachi Abedi Pelening ( Uning asl ismi Abedi Ayyu bo'lgan. Pele esa shunchaki uning laqabi edi) uch o'g'lidan ikkitasi professional futbolchi bo'lib etishdi. Bular Andre va Jordan edi. Ular katta futbolga ikki yil farq bilan “Marsel”da qadam qo'yishdi (Ayni damda Andre – 26 yosh, Jordan – 24 yosh). Andre ukasiga nisbatan biroz iste'dodli bo'lgani uchunmi yoki boshqa sababga ko'ra “Marsel”da 2007-yildan o'tgan yozga qadar to'p surdi. Jordan “Marsel”ga akasidan ikki yil kech kelib 1 yil ertaroq ketdi. Jordan 2014-yili “Loryan” klubiga ko'chib o'tdi va kelasi mavsumda Angliyaning “Aston Villa” klubida faoliyatini davom ettiradigan bo'ldi. Andre esa Frantsiyadan “zerikib” ukasining ortidan Angliyaga, “Suonsi”klubiga ko'chib o'tdi. Ayni damda Andrening ishlari ukasinikiga nisbatan biroz yaxshi. Ularning birinchi to'qnashuvi mavsum boshida bo'lib o'tdi. Unda Jordan akasini “mehmon”ga chaqirdi va gol ham urishga erishdi.
Ammo yakuniy natijaga ko'ra “Aston Villa” “Suonsi”ga 2:1 hisobida mag'lub bo'ldi. Ular ikkinchi bor 19-mart kuni uchrashishadi.
Kevin-Prints va Jerom Boatenglar
Bu noyob yigitlar nafaqat turli klublarda to'p surishadi, balki turli terma jamoalarga uchun maydonga tushishadi. Ular dastlab “Gerta”ning yoshlar jamoasida to'p surishdi va keyinchalik ajralib ketishdi. Kevin-Prints 6-mart kuni 29 yoshga to'ldi. Bu yoshda u o'z iqtidorini to'laligicha namoyish etishi mumkin. U “Shalke” klubidan ketgach “Milan”ga o'tdi va bu klubda o'z o'rnini topishga harakat qilmoqda. Buning uddasidan deyarli chiqdi ham. Uning ukasi esa ancha omadli edi. “Gerta”dan keyin “Gamburg”ga o'tdi va undan keyin qisqa muddat “Manchester Siti” safida to'p surdi.
Davomi Penalti.uz blogida.
— deya xabar beradi uff.uz nashri.