«Milan» hujumchisi M’Baye Nyang yaqinda avtohalokatga uchradi. Shu xabar asnosida futbol yulduzlari o'zlarining qimmatbaho avtomobillarining pachog'ini chiqargan holatlarni bir esga olamiz.
Artyom Milevskiy
Bu reytingni ruminlarning «Konkordiya» klubining yangi a'zosi Artyom Milevskiy bilan boshlasak to'g'ri bo'lardi. Bunday deyishimizga sabab, Milevskiy shunga o'xshash holatlarga tushish borasida ancha-muncha “tajribaga ega”.
Turkiya safari chog'ida u o'zining «Ferrari»sini yo'l chetidagi to'siqqa yuqori tezlikda borib urgan. Aniqlanishicha, Artyom mast holatda rulga o'tirgan. Qimmatbaho «Ferrari»ni tiklashning iloji bo'lmagan.
“Tushunaman, men aybdorman… Lekin menga achinmang. Runi yoki Krishtianu ham «Ferrari»sini urib olgan”, – degan edi yo'l transport hodisasidan keyin ukrainalik hujumchi. Yana shunisi ajablanarliki, bu voqeadan bir yil oldin uning hashamatli «Mazerati»si o'z hovlisida yonib ketgan edi.
Krishtianu Ronaldu
Portugaliya termasining sardori ham, yuqorida Milevskiy aytganiday, italyanlarning xuddi shu rusumdagi sport avtomobilidan birini dabdala qilishga ulgurgan. Madridning “Real”iga kelmasidan oldin ham Krishtianu uchqur va qimmatbaho avtomobillarga ishqiboz edi.
Futbol yulduzi Angliyadaligida narxi 200 ming funt sterling turadigan «Ferrari»ni Manchester shahri tunnellaridan birida urib olgan edi. Krishtianuning iqrorlik bildirishicha, u «MYu» mashg'ulotlariga kechikayotgani uchun tezlikni oshirgan va oqibatda mashinani boshqarolmay qolgan.
Rayan Tannikliff
2012 yilda “qizil iblis”lardan yana biri o'zining transport vositasini boshqarolmay qolgan edi. Yarim himoyachining u darajada yulduzlik maqomiga chiqib ulgurmagani va o'sha paytda endigina 19 yoshga kirganini inobatga oladigan bo'lsak, uning 60 ming funt sterling turadigan Range Rover xarid qilishi e'tiborga loyiq voqea. Afsuski, Tannikliffning bu xariddan tuygan quvonchi atigi bir soatga cho'zildi. U to'g'ri borib furgonga urildi va uni yonlamasiga bir necha metrga sudrab ketdi. Yosh qoidabuzarning “yulduz”ligini inobatga olmagan politsiyachilar mast holatda avtomobil boshqarganlikda gumon qilib Rayanni shu zahoti hibsga olishdi. Hozir u chempionshipda, “Fulxem” safida ishtirok etmoqda. Aytganday, u hozir yo'llarda ancha intizomli bo'lib qolgan.
Andrey Eshenko
O'tgan yili «Kuban»ning sobiq o'yinchisi Andrey Eshenko tezlikni 170 km/soatga oshirgan va ulovni boshqarolmay qolgan. Beton to'siqqa urilgan «Nissan»ni tiklashning iloji bo'lmagan. Vrachlar yordamini rad etgan Andrey hodisa joyini o'zi tark etgan.
Maks Mayer
Yanvarning boshida «Shalke-04» yarim himoyachisi ta'tilni Mayamida o'tkazdi. Shahar ichida yurish uchun u o'ziga 600 ming evro turadigan «Lamborghini»ni tanladi. Mashina qanchalik qimmat bo'lmasin, u noqulay ob-havo sharoitida futbolchiga pand berib qo'ydi: kuchli yomg'ir sabab Maks avval to'siqqa, keyin boshqa bir avtomobilga borib urildi. Mashinani ta'mirlash unga qanchaga tushganini aytib o'tirmasa ham bo'ladi. Uning baxtiga pulning kattagina qismini sug'urta kompaniyasi to'lagan.
Niklas Bendtner
2009 yilda hali daniyalik charm to'p ustasi “Arsenal” safida edi. Navbatdagi mashg'ulotga kelayotgan Bendtner mashg'ulot bazasiga yaqin qolganda mashinasini yo'l bo'yidagi daraxtga borib urgan. Hujumchining «Aston Martin»i bir uyum temir-tersakka aylangan. O'zi esa g'urra va engil lat eyishlar bilan omon qolgan. Shunga qaramay, Niklas o'shanda Chempionlar ligasidagi «Olimpiakos» bilan bo'lgan o'yinni o'tkazib yuborishga majbur bo'lgan edi.
Karim Benzema
O'sha yili Frantsiya terma jamoasi hujumchisi ham avtomobilni boshqarish bilan bog'liq muammolarga duch kelgan edi.
Avvaliga u Madridda o'zining yo'ltanlamasi bilan panjaraga borib urilgan. Bir oy o'tib esa, tug'ilgan kunini nishonlayotgan Karimning ko'ngli ko'cha poygasida qatnashishni tusab qoladi. Buning oqibatida “Real” o'yinchisi gijinglagan «Lamborghini»sining pachog'ini chiqaradi. Shunaqa, vaqtichog'lik xarajat talab qiladi.
Arturo Vidal
O'tgan Amerika kubogida Chili terma jamoasi yarim himoyachisi nafaqat ajoyib o'yinlari, balki shov-shuvli janjallari bilan ham nom chiqargan edi.
Vidal rafiqasi bilan hashamatli “Ferrari”sida yo'l transport hodisasiga uchraydi. Futbolchining qizil avtomobili boshqa ikki avtomobilga borib urilgan va yo'l chetiga uchib chiqib ketgan. Buyam etmaganday, Arturoning qon tahlili uning alkogol istemol qilganini ko'rsatgan. Falokat paytida aynan u rulda bo'lgani uchun bir muddat turmada o'tirishiga to'g'ri kelgan. Keyinroq u o'zining qilmishlari uchun butun mamlakat aholisidan kechirim so'ragan.
Davomi Tafsilot.Uz blogida.
— deya xabar beradi uff.uz nashri.