O'zbekiston milliy jamoasi darvozaboni Aleksandr Lobanov bir oydan oshdiki, Eron chempionati etakchilaridan biri «Persepolis» klubi sharafini himoya qilyapti. Hozirda uning jamoasi kuchli uchlikda boryapti va «oltin» uchun kurashdan hali umid uzganicha yo'q. Biz yakshanba kuni «Traktorsozi»ga qarshi kechgan uchrashuvdan oldin darvozabonimiz bilan bog'lanib, undan maxsus intervyu oldik.  
- Sasha, yangi muhit, chempionat va jamoaga moslashish jarayoni qiyin kechmayaptimi?
- O'zimni uydagidek his qilyapman, desam noto'g'ri gapirgan bo'laman. Buning uchun vaqt kerak. Lekin «Persepolis»da faoliyatim deyarli izga tushdi.
- Taassurotlar kutganingizchalikmi yoki..?
- Bu erga kelayotganimda ko'p narsa haqida o'ylamadim. Tabiiyki, do'stlarim, oila a'zolarim bilan maslahatlashdim, fikr almashdim. Lekin men o'ynaydigan jamoa Eronda shu darajada mashhur ekanligini tasavvur qilmagandim.
- Qiyinchiliklarga duch kelmayapsizmi?
- Faqat til masalasida muammo bor, xolos. Sharoitlar bo'yicha esa hech qanday kamchilik yo'q. Hammasi a'lo darajada.
- Tarjimon biriktirishmadimi?
- Shaxsiy tarjimonim yo'q. Aksariyat futbolchilar ingliz tilida gapirishadi. Bu tilni oz-moz bilaman. Eng muhimi, suhbatdoshimning so'zlarini tushunaman.
- Darvozabonlar bilan ishlaydigan murabbiy mahalliymi yoki xorijlik?
- Murabbiylar shtabida xorvatiyaliklar ishlashadi. Ham darvozabonlar, ham jismoniy tayyorgarlikka mas'ul murabbiylar Xorvatiyadan. Lekin ular ruschani bilishmaydi. Ingliz va xorvat tillarida so'zlashishadi.
- Mashg'ulotlar jarayonida farq sezilyaptimi yoki bizdagi bilan bir xil?
- Albatta, farq bor. Bu erda tartib-intizomga katta e'tibor qaratiladi. Har bir murabbiyning o'z qarashi bor va shundan kelib chiqib, mashg'ulotlar rejasini tuzib chiqadi.
- Qaerda yashayapsiz, uy berishdimi?
- Ha, alohida kvartira bilan ta'minlashdi. Shuningdek, xizmat mashinasi va haydovchi ham biriktirilgan. Davomi InterFUTBOL blogida.
— deya xabar beradi uff.uz nashri.