O'zbekiston kubogi finali oldidan tashkil etilgan matbuot anjumanining ikkinchi qismida jamoamiz bosh murabbiyi Ro'ziqul Berdiev va sardorimiz Artur Gevorkyan ishtirok etdi.
Ro'ziqul Berdiev:
Final oldidan bosim haqida o'ylaganim yo'q. Menimcha, tayyorgarligimiz me'yorida bo'ldi. Ertangi o'yinni qanchalik mas'uliyatli ekanligini tushunib turibmiz. Kubok finallari biz uchun omadsiz bo'lib kelmoqda. Biz ushbu yoqimsiz an'anani buzishga harakat qilamiz. Jamoadagi barcha futbolchilar, murabbiylar shtabi, barcha va barcha buni yaxshi tushunib turibdi. Ertaga bizdan muxlislarimiz faqat g'alabani kutishmoqda. Biz ularni xursand etish uchun bor kuch-g'ayratimizni ishga solamiz.
Raqib ham juda jiddiy jamoa. Ular ham o'z oldilariga yuksak maqsadlarni qo'yib kelishadi. Biz "Bunyodkor"ning barcha futbolchilarini chuqur o'rganib chiqdik. Jizzax xalqini esa final bilan tabriklayman. Finalni neytral maydonda o'tkazish bu juda to'g'ri ish bo'ldi deya olaman. Jizzaxda zamonaviy stadion barpo etilgan. Bugun bu erdagi sharoitlar bilan yaxshi tanishib chiqdik. Stadion chiroyli, maydon holati ham yaxshi darajada ekanligiga guvohi bo'ldim.
Futbol bu muxlislar uchun bayram degani. Jizzaxda final chiroyli o'tadi deb o'ylayman. Ertaga ishqibozlar finalni bezab berishlariga shubha yo'q Artur Gevorkyan haqiqiy professional va uning tayyorgarligi joyida deb o'ylayman. Ichki chempionatda menda ham, futbolchilarimizda ham sovrin yo'q. Shu boisdan biz ertaga birinchi yirik g'alabamizni nishonlash uchun bor kuchimizni sarf etamiz. Final bitta o'yindan iborat. Bu bahsda kim yaxshiroq tayyorgarlikka ega bo'lsa, o'sha jamoa o'z maqsadiga etadi deb o'ylayman.
Artur Gevorkyan:
Finalga jiddiy hozirlik ko'rdik. Barcha ertaga mas'uliyatli o'yin bo'lishini tushinib turibdi. Bizning vazifamiz maydonga tushib kerakli natijani qo'lga kiritish va muxlislarimizni xursand qilishdan iborat. Ertangi o'yinda g'alaba qozonish uchun barcha imkonitlarimizni ishga solamiz. "Bunyodkor" ham qanchalik kuchli va jiddiy raqib ekanligini bilamiz. Muxlislarimizning bizga bo'lgan ishonchi yuqori va biz endi klub muzeyiga uzoq kutilgan kubokni olib kelishimiz zarur. Finalda har doim yuqori ishtiyoq va kuchli motivatsiya bo'ladi. Ertaga o'ylashimcha juda qiziqarli bahs bo'ladi.
— deya xabar beradi uff.uz nashri.