Rossiyada bo'lib o'tadigan futbol bo'yicha Jahon chempionatiga-2018ga Osiyo qit'asi jamoalari saralashining uchinchi bosqichi uchun qur'a tashlash marosimi muddati ma'lum bo'ldi. Qur'a ma'rosimi 2016 yilning 12 aprel sanasida, Malayziya poytaxti Kuala-Lumpur shahrida bo'lib o'tadi. Unda ikkinchi saralash bosqichidan o'tgan o'n ikki terma jamoa oltitadan ikki guruhga ajratiladi. Guruhlarda birinchi va ikkinchi o'rinlarni qo'lga kiritgan to'rt jamoa Jahon chempionati yo'llanmasini qo'lga kiritadi. Uchinchi o'rin sohiblari esa o'zaro o'yin o'tkazib, g'olib jamoa FIFA qaroriga ko'ra boshqa konfederatsiya vakiliga qarshi saralashning so'nggi uchrashuvini o'tkazadi. Ta'kidlash kerakki, O'zbekiston milliy terma jamoasining Jahon chempionati-2018, ikkinchi saralash bosqichi doirasidagi so'nggi ikki o'yinni Toshkentdagi “Bunyodkor” stadionida o'tkazadi. O'zbekiston milliy terma jamoasining 24 mart kuni bo'lib o'tadigan Filippinga qarshi uchrashuvi ham, Bahraynga qarshi 29 mart kuni bo'ladigan o'yin ham 18:00da start oladi. Eslatib o'tamiz, so'nggi ikki o'yin oldidan O'zbekiston terma jamoasi olti uchrashuv o'tkazib, 15 ochko to'plagan holda guruhda ikkinchi o'rinni egallab turibdi. Guruhda hozircha 7 uchrashuvda 16 ochko jamg'argan KXDR terma jamoasi peshqadamlik qilmoqda.
— deya xabar beradi uff.uz nashri.