O'zbekiston milliy terma jamoasi va Qatarning "Al Jaish" klubi hujumchisi Sardor Rashidov FIFA rasmiy sayti uchun intervyu berdi. Quyida yarim himoyachi haqida FIFA saytida chiqqan suhbat bilan tanishib olishingiz mumkin.
Dohalik muxlislarni hayratga solish oson ish emas, zero ular dunyo darajasidagi yulduzlar Qatar chempionatiga kelgani va ketganini ko'p bora ko'rganlar. Masalan, ispaniyalik yulduz Raul uch yil davomida Qatar Yulduzlar ligasida "Al Sadd" sharafini himoya qilganini aytish mumkin. Shuningdek vatandoshi Xavi ham uning yo'lidan ketdi va Qatarda to'p surmoqda. Shunday ekan, dohalik muxlislar uncha-munchaga hayron qolmaydilar. Ammo "Al Jaish"ning yangi futbolchisi Sardor Rashidov Qatardagi ilk mavsumidayoq shu qadar yorqin o'yin namoyish qilmoqdaki, hatto eng talabchan muxlislar ham o'zbekistonlik tajovuzkor hujumchiga nisbatan maqtovlarini ayamayaptilar.
Garchi Qatarga o'tgan yilning iyulida kelgan bo'lsada, 24 yoshli hujumchi 20 uchrashuvdagi to'qqizta ajoyib goli bilan nom taratishga muvaffaq bo'ldi. Bu gollar "Al Jaish"ga musobaqa jadvalida kuchli uchlikka kirish imkonini berdi. Boz ustiga Sardor yorqin o'yini evaziga o'ziga "CR10" laqabi berilishiga sababchi bo'ldi. U "Al Jaish"da "10" raqami ostida to'p suradi va muxlislar uning o'yinini "Real"ning mashhur hujumchisi Krishtianu Ronaldunikiga o'xshatadilar.
"Albatta "CR10" laqabini olish juda yoqimli, chunki Krishtianu Ronaldu dunyo darajasidagi yulduz hisoblanadi. Ammo ochig'ini aytsam, meni o'z nomim bilan, ya'ni Sardor deb chaqirsalar o'zimni yaxshiroq his qilaman", - deydi Sardor Rashidov bu haqida.
"Men Qatarga o'z oldimga qo'yilgan yangi vazifalarni bajarish uchun kelganman. "Al Jaish" - ajoyib klub va bu erda o'ynayotganimdan baxtiyorman. Boz ustiga xorij chempionatida o'z mamlakatim sharafini himoya qilish men uchun ulkan sharaf.
Men har doim Evropaning kuchli chempionatlarida o'ynashni orzu qilganman. Ammo hozirda bor e'tiborimni o'yinimni kuchaytirishga qaratganman. Agar sen yorqin o'yin namoyish qilsang, Evropada o'ynash imkoni albatta bo'ladi", - deya fikrini davom ettiradi Sardor.
Osiyo Kubogi haqida
Rashidov o'z kuchiga juda ishonadigan futbolchi, ammo shunga qaramay uch yilgina oldin uni ko'pchilik tanimas edi. Sardor Jizzaxning "So'g'diyona" klubi tarbiyalanuvchisi hisoblanadi va 2009 yilda uni "Bunyodkor" o'z tarkibiga qo'shib oldi. Ammo u hali sayqal tomagan javohir edi va bir necha mavsum davomida iqtidorini shakllantirish bilan band bo'ldi. O'zini ko'rsatishi uchun ilk imkoniyat esa 2013 yilda bo'lib o'tgan xalqaro o'yinda keldi.
Xalqaro darajadagi ilk o'yin juda og'ir sinov bo'ldi. O'zbekiston terma jamoasi OCh-2015 uchun saralash musobaqasida Vetnamga qarshi maydonga tushgan edi. Bu uchrashuvda O'zbekistonga g'alaba juda muhim edi. Ammo raqib ham himoyada aqlli o'yin namoyish qildi va birinchi bo'limda hisob ochilmadi.
O'zbekiston terma jamoasining o'sha vaqtdagi bosh murabbiyi Mirjalol Qosimov shu bilan birga "Bunyodkor" klubini ham boshqarardi va Sardor Rashidovning potentsialidan yaxshi xabardor edi. U ikkinchi bo'limda hujumchini maydonga tushirdi va uning ishonchi darhol foyda keltirdi. Rashidov ajoyib gol kiritdi va jamoasining 3:1 hisobidagi g'alabasiga ulkan hissa qo'shdi. Oradan bir oy o'tgach bu jamoalar yana yuzma-yuz keldilar va O'zbekiston terma jamoasi bu safar 3:0 hisobida ustun keldi.
"Vetnamga qarshi kechgan uchrashuvlar men uchun yorqin xotira bo'lib qoldi", - deydi Rashidov. "Men terma jamoadagi ilk o'yinimda gol urdim va bu gol saralash musobaqasida biz uchun juda muhim edi. Murabbiylarim mendan har doim o'zimga ishongan holda o'ynashni talab qilib kelishgan. Hatto juda kuchli futbolchilarga qarshi maydonga tushganda ham qat'iy o'ynashni so'rashgan. Mana oradan uch yilga yaqin vaqt o'tdi va men o'ziga juda ishonadigan futbolchiga aylandim".
Rashidov 2015 yili Avstraliyada bo'lib o'tgan Osiyo Kubogida ham yorqin o'yin namoyish qildi. Uning goli Saudiya Arabistoni ustidan qozonilgan 3:1 hisobidagi g'alabaga hissa qo'shdi. Bu g'alaba guruhdan chiqishda muhim ahamiyatga ega edi. Boz ustiga Sardor "Bunyodkor"da ham etakchi futbolchiga aylangan edi. U 2014 yilgi mavsumda 15 ta gol bilan jamoa to'purari bo'lgan edi.
"Mening ishim - gol urish. Men hujumchiman va gollarim bilan jamoamga yordam berishim lozim. Iqtidor Xudo tomonidan beriladi, ammo faqat mana shu in'om bilangina yaxshi futbolchi bo'lish qiyin. Buning uchun astoydil mehnat qilish va mashg'ulot o'tash lozim. Mening kuchli tomonim - o'zimga nisbatan talabchanligimda. Men har doim o'zimni kuchaytirishni istaganman va faqat mehnat natijasida yana-da kuchliroq bo'lish mumkinligiga ishonaman.
JCh orzusida
Osiyoda kelajagi porloq yulduzlar sirasiga kirar ekan, Rashidov o'z mahoratini oshirib borishda davom etmoqda. U 2018 yili Rossiyada bo'lib o'tadigan jahon chempionatida ishtirok etishni juda istaydi. Shu vaqtga qadar o'tkazilgan saralash o'yinlarida to'rtta gol urdi. Uning gollari Filippinni safarda 5:1 hisobida mag'lub etishga hissa qo'shdi. Balki shu sababdir, muxlislar uni Kievning "Dinamo"sida tanilgan hujumchi Maksim Shatskixga qiyoslashni boshlab yuborganlar. Ammo Sardorning o'zi bu haqida mutlaqo boshqacha fikrda.
"Shatskix - kuchli futbolchi. O'zbekistonlik yosh futbolchilar undan o'rnak olishlari turgan gap. Ammo men o'zligimni saqlab qolishni istayman. Men "ikkinchi Shatskix" bo'lishdan ko'ra birinchi Rashidov bo'lishni ma'qul ko'raman. Men terma jamoamga yordam berish uchun qo'limdan kelgan barcha ishni amalga oshiraman.
Hozirda biz saralash musobaqasida keyingi bosqichga chiqish uchun ajoyib imkoniyatga egamiz. Hozirgi tarkib O'zbekiston terma jamoasi tarixidagi eng yaxshilaridan biri hisoblanadi. Shunday ekan, JCh yo'llanmasini qo'lga kiritish va muxlislarni xursand qilish vaqti etdi, deb o'ylayman. Mening maqsadim - O'zbekiston terma jamoasi bilan jahon chempionatida ishtirok etish va bu maqsad yo'lida barcha ishni amalga oshiraman", - deydi Rashidov.
— deya xabar beradi uff.uz nashri.