Osiyo Chempionlar ligasi doirasida “Paxtakor” va “Traktorsozi” klublari o'rtasida kechadigan uchrashuv oldidan o'tkazilgan matbuot anjumanida “sherlar” bosh murabbiyi No''mon Hasanov va yarim himoyachi Oybek Qilichev ishtirok etdi. Avvalo murabbiy va futbolchi o'yin haqidagi fikrlarini bildirib o'tdilar.
No''mon Hasanov: Ertaga juda muhim o'yin bo'ladi. Bizning oldimizda juda mas'uliyatni uchrashuv turibdi. Bu uchrashuvda g'alaba qozonib, guruhdan chiqish imkoniyatlarini saqlab qolishimiz kerak.
Oybek Qilichev: Raqib juda kuchli, Eron chempionatida o'ynaganman va “Traktorsozi”ni yaxshi bilaman. Bu jamoaga qarshi o'ynasa bo'ladi. Biz mavsum endi boshlandi va jamoaviy o'yinni shakllantirmoqdamiz. Nasib qilsa ertaga bor imkoniyatlarimizni ishga solib, g'alaba qozonamiz.
- Raqibni qay darajada yaxshi o'rgana oldingiz?
- Haqibni o'rganish uchun qo'ldan kelgan barcha ishni amalga oshirdik. Chempionlar ligasi bo'lsin yoki Oliy liga, raqiblar qay holatda ekanini juda yaxshi bilamiz. Busiz umuman mumkin emas. O'z navbatida raqiblar ham bizni o'rganganlariga shubha yo'q.
- Davron Hoshimov o'rniga kim maydonga tushadi?
- Uning o'rnini bosa oladigan futbolchilar bor. Ammo nomlarini ayta olmayman. Bugun yana mashg'ulot o'taymiz va ertaga bu borada aniq bir qarorga kelamiz. Hozir shuni aytishim mumkinki, o'ng qanot himoyada o'ynay oladigan ikki nafar futbolchimiz bor. Kamoliddin Tojievni ham qanot himoyasida sinab ko'rganmiz.
- “Traktorsozi” to'pni erda ushlab turishga va “Barselona” uslubida o'ynashni xush ko'radigan jamoa. Bunga qarshi qanday chora ko'rmoqchisiz?
- “Barselona” haqidagi gaplar haddan ortiq balandparvoz. Aytish mumkin, Eron futboli ancha qo'pol o'yinga asoslanadi. Ularning o'yinini “Barselona” emas, ko'proq ingliz futboliga o'xshatgan bo'lardim. Ertaga o'zingiz ham bunga ishonch hosil qilishingiz mumkin.
- Raqib tarkibidagi legionerlar o'yin natijasiga qay darajada ta'sir o'tkazishi mumkin?
- Eronlik futbolchilarning o'zlari ham legionerlardan qolishmaydi. “Traktorsozi” tarkibda, 6, 10 va 24 raqamli futbolchilar menga yoqdi. Eronlik futbolchilar bo'ydor va baquvvat. Ular jismoniy kurashlarda ancha ustun.
- Oybek Qilichevning maydonga tushmayotganiga sabab nimada?
- Oybek yaqinda jamoamiz tarkibiga kelib qo'shildi. Shu sababli uni hozircha asosiy tarkibda maydonga tushirmayapmiz. Lozim bo'lganda uni zaxiradan maydonga tushiryapmiz va u o'yinni kuchaytiryapti. Ertaga asosiy tarkibda ham o'ynashi mumkin.
- Savolim Qilichevga. “Traktorsozi” haqida nima deya olasiz?
- Eron chempionati doirasmida bu jamoaga qarshi o'ynaganman. O'sha uchrashuv durang natija bilan tugagan edi. Eron chempionatida oxirgi o'rindagi jamoa etakchi klubni engib qo'yishi mumkin.
- Ertaga bo'ladigan o'yin juda muhim ahamiyatga ega. “Paxtakor” vabankka borishga va ochiq o'yin namoyish etishga tayyormi?
- Biz turli variantlarni ko'rib chiqmoqdamiz. Jamoamizning hujum chizig'i kuchli, shunday ekan, eng avvalo gol o'tkazib yubormasak bo'lgani, albatta gol ura olamiz. Maqsadimiz – ertaga g'alaba qozonish. Biz bu o'yinda favoritmiz. Foto manbasi: pakhtakor.uz
— deya xabar beradi uff.uz nashri.