Argentinalik mahoratli futbolchi Xaver Maskerano The Guardian nashriga intervyu berarkan, «Arsenal»ga qarshi bahsdagi o'yinidan so'ng «Barselona»dagi pozitsiyasi o'zgargani, murabbiylik bilan bog'liq xayollari hamda sobiq jamoasi - «Liverpul» haqida gapirdi.
Maskerano 2011 yilning martida «Kamp Nou»dagi ilk mavsumini boshlar ekan, go'yoki bu erda o'ynab ketolmaydigandek tuyulgandi. «Barselona» Chempionlar Ligasining 1|8 finali doirasidagi «Arsenal»ga qarshi kechgan har ikki bahs natijasiga ko'ra etakchilik qilayotgandi. Javob o'yinining 90 daqiqasi ortda qolgan bir pallada «Barsa» ishqibozlarini xavotirga solgan vaziyat ro'y berdi.
Jek Uilshir ajoyib «pas»i orqali Niklas Bendtnerni raqib darvozaboni bilan yakkama-yakka holatga chiqardi. Agar o'shanda «to'pchilar» forvardi to'p kiritganida, kataloniyaliklar nufuzli turnirdan chiqib ketishlari mumkin edi. Ammo shu pallada qaerdandir paydo bo'lgan Maskerano daniyalik hujumchining oyoqlari ostiga tashlanib, xavfli vaziyatni bartaraf etdi. Shu tariqa, «Arsenal» uyga quruq qo'l bilan qaytdi, «Barselona» esa EChLdagi ishtirokini davom ettirdi.
- O'sha «podkat» «Barselona»dagi faoliyatimda muhim ahamiyat kasb etgan, - dedi Maskerano. - To'g'risini aytsam, jamoada o'tkazgan dastlabki oylarimga qarab Kataloniyada uzoq ushlanib qolmasligimni taxmin qilish qiyin emasdi: go'yoki, mening harakatlarim «Barsa»ning o'yin uslubiga mutlaqo mos kelmaydigandek edi. Ammo o'sha vaziyat o'zimni ko'rsatishimga imkon berdi. Agar o'shanda Bendtner gol urganida... bilmadim, keyinchalik nima bo'lardi. Ammo hammasi men uchun ko'ngildagidek yakun topdi.
* * *
- Hech qachon taslim bo'lmaganman. «Vest Xem»da o'ynamayapman, o'rta chizig'ida Jerrard va Xabi Alonso to'p suradigan «Liverpul»da ishim qovusharmikan?» deb o'ylashim ham mumkin edi-da. Ammo o'shanda tushgan taklifni hech ikkilanmay qabul qildim, «Barselona» bilan ham xuddi shunday holat ro'y berdi. Serxio Busketsning o'rnini egallay olmasligimni tushunib turardim. Ushbu futbolchining jamoa uchun beradigan foydasini boshqalar keltira olmasligi ta­yin. Shunday ekan, «Barsa»da qolishim qiyinroq tuyulgandi.
O'sha oqshom sezilarli o'zgarish ro'y berdi: Maskeranoning maydondagi pozitsiyasi o'zgardi. Busketsning o'rnini egallay olmadimi, demak boshqa chiziqni tanlashiga to'g'ri kelardi. U avvallari o'zini himoyachi sifatida tasavvur qilolmasdi: «Yo'q, bunaqasini xayolimga ham keltirmagandim», - ammo boshqa pozitsiyaga o'tish hammasini o'zgartirib yubordi.
- Umuman olganda, mazkur bahsda o'rta chiziqda to'p surayotgandim, himoyada esa Buskets o'ynagandi, - deya eslaydi argentinalik futbolchi. - O'shandan buyon mudofaa markazida harakat qilyapman: o'sha «podkat»dan so'ng hammasi o'zgardi. O'z pozitsiyamni topib, hozirga qadar tarkibdagi o'rnim va darajamni saqlab kelyapman. Bu holat qachongacha davom etadi? Bilmayman, «Barselona»da o'yin­chilarga juda qat'iyatli munosabatda bo'lishadi, shunday ekan, klub har qaysi futbolchini xohlagan payt­da safga qo'shib olishi mumkin.
***
- Futbol haqida gapirishni yoqtiraman, - dedi Maskerano. U so'zamol, aqlli, mulohazali va qat'iyatli. O'zining etakchilik sifatlari evaziga Jefecito - «Komandir» taxallusiga ega bo'ldi. Jamoadoshlari esa Xav­erning kelajakda Kataloniya klubi boshqaruvini qo'lga olishiga ishonishadi. Xo'sh, uning bu boradagi rejalari qanday?
- Murabbiylik - qiyin ish. O'zingizni ularning o'rniga qo'yib ko'ring. Lekin baribir, shu kasbda o'zimni sinab ko'rmoqchiman. To'g'ri, nima bilandir shug'ullanmoqchi bo'lsang, astoydil tayyorgarlik ko'rishga to'g'ri keladi. Men ham xuddi shunday qilaman. Keyinchalik eplay olamanmi, yo'qmi, buni vaqt ko'rsatadi.
Qaerga boradi? Birorta kichikroq klubgami?
- O'zimga qolsa, murabbiylik faoliyatimni Argentinada boshlasam, deyman.
Keyinchalik Evropaga qaytadimi?
- Bilmadim, ko'hna qit'ada muvaffaqiyat qozonish borasida aniq fikr bildirolmayman.
***
- Boshqa klublardan farqli o'laroq, «Barselona»ning markaziy himoyasida o'ynash boshqacharoq tarzda kechadi, - deydi Maskerano. - Deyarli yarim himoyadagi funktsiyalarni ham bajarishga to'g'ri keladi. Pressing qo'llayotgan paytimizda Buskets bilan bir chiziqdan joy olaman. Eng katta o'zgarish - to'pni teskari emas, balki aksincha, raqib darvozasiga qaragan holatda qabul qilaman. Lekin baribir, o'zimni yarim himoyachi sifatida his qilaveraman. Kun kelib, «Barselona»dan boshqa klubda o'ynashim ham mumkin. O'shanda albatta, o'zimning sevimli pozitsiyamda to'p suraman. Kataloniyada vaziyat yangi chiziqqa moslashishni taqozo etdi.
Maskerano qaerga ketmoqchi? Faraz qilaylik, unga Pep Gvardiola qo'ng'iroq qildi...
- Bunday bo'lmaydi, - dedi Xaver jilmaygancha. - U men bilan bog'lanmaydi.
Aslini olganda esa, Maskerano premer-ligaga qaytsa, aslo ajablanmaymiz. Argentinalik futbolchi «Enfild»da o'tkazgan damlarini yorqin xotiralar bilan esga oladi. Hattoki, qaysi trio kuchliroq ekanini aniq aytolmaydi: Buskets-Inesta-Xavimi yoki Maskerano-Jerrard-Alonso?
- G'oyatda ajoyib o'yin ko'rsatgan paytlarimiz ko'p bo'lgan, ayrim ishqibozlar buni menga tez-tez eslatishadi.
Albatta, Xaver boshqa jamoalardan keladigan takliflarni ham rad etmaydi.
- «Liverpul»ga bo'lgan mehrim faqat shu klubga bog'lanishimni anglatmaydi. Boshqa chaqiruvlarni ham bajonidil o'rganib chiqaman. Biz professionalmiz, shu kasb orqali kun kechiramiz.
***
- «Liverpul» - men to'p surgan jamoalar orasida eng yaxshilaridan biri, ammo u erda muammolar ko'p edi. Klub xo'jayini bilan umuman uchrashmaganman. Rahbariyatning 20000 kilometr uzoqlikdan turib boshqarishi noto'g'ri. Jamoa oldinga qadam tashlashga intilsa-da, buni uddalay olmayotgandek tuyulardi menga. Endi Klopp boshqaruvida bu vazifani uddalashga kirishdilar. Yurgen aynan «Liverpul» va uning ishqibozlari kutgan murabbiy.
Davomi InterFUTBOL gazetasi blogida.
— deya xabar beradi uff.uz nashri.