Parijliklar chempionlikni nishonlashayotgan bir pallada Rossiyada rostovliklar TsSKA bilan birinchi o'rinni bo'lishib turishibdi. O'z navbatida, «Barselona» raqiblarini birin-ketin tor-mor keltirishda davom etmoqda. O'tgan dam olish kunlari ro'y bergan shu va boshqa voqealar diqqatingiz markazida.
«Rostov» - peshqadam!
Kimdir «Rostov»ni natijaga erisholmaydigan «avtobus»ga qiyoslaganmidi? Qurbon Berdiev shunchaki, himoyalanish bilan cheklanmayapti. U mustahkam,  zarur paytda tezlikni oshira oladigan «mashina»ni boshqarmoqda. Uning «mashina»si nosozliklarsiz ishlamoqda va buni TsSKAga qarshi kechgan bahs yaqqol isbotladi. «Rostov» «armiyachilar»ga Soslan Janaev qo'riqlayotgan darvoza oldida vaziyat yaratish imkonini bermay, raqibini osonlikcha taslim etdi. Rostovliklarning jasorati butun uchrashuv davomida sezilib turdi. Dastlabki 30 daqiqani TsSKAning ojiz nuqtasini qidirishga sarflagan bo'lishsa, keyinchalik raqibni geometrik o'lchovlarga asoslangan kombinatsiyalar bilan qiynashdi. Yakunda Leonid Slutskiy shogirdlari charchab qolishdi chog'i, maydon markaziga ham qiyinchilik bilan etib bordilar. Poloz va Dumbiya o'z nomlarini tabloga yozdirib qo'yishdi, ammo «Rostov»ning ajoyib g'alabasiga butun jamoa birdek hissa qo'shdi. Aynan shu bois «sariq-ko'k ranglilar» RPL turnir jadvalida peshqadamlikni qo'lga olishdi.
«Zenit» o'yinga qaytmoqda
Chempionlar Ligasini tark etish «Zenit»ga qattiq ta'sir qilgan ko'rinadi. Artyom Dzyubaning aytishicha, mashg'ulotlar paytida jimjitlik kuzatilyapti, hujumchining o'zi esa ikki sutkani bedor o'tkazgan. Bunday «sovuq dush»dan so'ng piterliklardan «Rubin»ni taslim etish kutilgandi va ular buni amalda uddalashdi - 4:2. Ushbu muvaffaqiyat «Zenit»ning keyingi bahslardagi g'alabalariga zamin hozirlasa, ajabmas. Zero, vazni ortayotgani tanqid qilingan Xalk ham, o'yinlarida pasayish kuzatilayotgan Danni va Dzyuba ham gol urishdi.
Chempionlik Parijda
«Biz muvaffaqiyatga ishongandik, ammo uning bu qadar erta qo'lga kiritilishi xayolimizga kelmagandi», - «PSJ» vakillari orasida bu iboralarni ishlatganlar ko'p uchradi. Havas qilsa arzigulik natija - top-5 chempionatlaridagi hali hech qaysi jamoa hisobida 25 ochkolik zaxira bilan mart oyidayoq chempionlikni rasmiylashtirmagan. Parijliklar bunga munosib edilar, zero ularning saviyalari ligadagi boshqa jamoalarnikiga nisbatan ancha yuqori.
«Monako»ning ochko yo'qotishi «PSJ»ning ishini engillashtirdi. Parijliklar o'z navbatida, chempionat autsayderi maydoniga safar uyushtirishlari lozim edi. Tashrif kutilganidek yakun topdi - peshqadam shu kuni «Trua»ga hech qanday imkoniyat qoldirmay, raqibni tor-mor keltirdi - 9:0. O'ziga ishonch yuqori bo'lgan grandlargina chempionlikni ayni tarzda tantana qilishadi. «PSJ» Frantsiyada xuddi shunday o'ynamoqda - ishonch juda yuqori. Mazkur holat Chempionlar Ligasiga ko'chishi ham mumkin, agar Parij jamoasi yana bir bor «Barselona»ga to'qnash kelmasa, albatta.
Davomi InterFUTBOL gazetasi blogida.
— deya xabar beradi uff.uz nashri.