Yaqinda Sports.ru saytining  Uzbekskaya kuxnya  blogida yurtimizning 1993 yildan keyin tug'ilgan 10 nafar iqtidorli futbolchilari haqida so'z bordi. Albatta, kamolot sari dadil ildamlayotgan yigitlarni e'tirof etish ularning kelgusida ulkan yutuqlarni qo'lga kiritishlariga zamin yaratishi tayin. Aytish joizki, ushbu ro'yxatdan joy olgan yoshlarning chindan ham kelajagi porloq. Quvonarlisi, mazkur ketma-ketlikni boshqa ko'plab iqtidorlar nomi bilan istagancha boyitish mumkin. Aynan shu omil kelajagi porloq o'zbek futbolchilaridan iborat yana bir reyting tuzishimizga turtki vazifasini o'tadi.
10. Dilshod HAMROEV
Prototipi: Ignatiy Nesterov
Ampluasi: darvozabon
Klubi:  Qizilqum
Tug'ilgan sanasi: 1995 yil 11 iyul
Yoshlar termasi safida mundial havosidan bahra olgan darvozabonlardan faqat Ignatiy Nesterov milliy terma jamoa darajasigacha ko'tarila oldi. Qolganlar esa... Hamroevdan aynan shu masalaga jiddiyroq yondoshish talab etiladi. Viktor Jalilov e'lon qilgan olimpiyachilar termasi tarkibida uning nomi ko'rinmadimi? Hech qisi yo'q, vaziyatni o'nglash uchun Dilshodda hali vaqt bor. Asosiysi, vaqt va imkoniyatdan unumli foydalanib, otni tezroq qamchilash darkor. Aks holda, umidli darvozabonlar o'rtasidagi raqobatni boy berishi muqarrar.
9. Suhrob NURULLOEV
Prototipi: Sanjar Tursunov
Ampluasi: qanot yarim himoyachisi
Klubi:  Paxtakor
Tug'ilgan sanasi: 1998 yil 4 yanvar
Afsuski, bu galgi o'smirlar o'rtasidagi jahon chempionati o'zbek o'g'lonlarining ishtirokisiz o'tdi. Aks holda, vakillarimiz orasida ko'plab kashfiyotlar ko'rinish berishi muqarrar edi. Bu nomga da'vogarlar orasida Suhrob Nurulloev ham bor. Chaqqon yarim himoyachi raqib himoyachilarini dog'da qoldira olishini qit'a chempionatida isbotlagandi. Umid qilamizki, ushbu futbolchi kattaroq yoshdagi termalarimiz safida ham o'zini ijobiy tomondan ko'rsata oladi.
8. Rustam AShURMATOV
Prototipi: Baxtiyor Ashurmatov
Ampluasi: markaziy|qanot himoyachisi
Klubi:  Bunyodkor
Tug'ilgan sanasi: 1996 yil 7 iyul
So'nggi paytlarda  qaldirg'ochlar  markaziy himoyasida Xayrulla Karimovga sheriklik qilayotgan yosh iqtidor egasining o'ng qanotda ham ishonch li o'ynashidan yaxshi xabardormiz. Ayniqsa, uning hujumlarga faol qo'shila olishi tahsinga sazovor. Rustam Ashurmatov universallik borasidagi ko'nikmalarini rivojlantirishni davom ettiraversin, uning intilishlari termamiz murabbiylari tomonidan bee'tibor qoldirilmasligi aniq.
7. Javohir SIDDIQOV
Prototipi: Server Jeparov
Ampluasi: hujumkor yarim himoyachi
Klubi:  Paxtakor
Tug'ilgan sanasi: 1996 yil 8 dekabr
Bu futbolchining asosan, zaxiradan maydonga tushishiga ko'nikkanmiz. Shuni mamnuniyat bilan e'tirof etish joizki, Javohir Siddiqov bahsga qo'shilishi hamonoq, o'zining tezkor xatti-harakatlari bilan o'yinda keskin burilish yasash xususiyatiga ega. Buni bir necha bor isbotlagan yarim himoyachidan murabbiylar asosan  sehrli tayoqcha  sifatida foydalanishadi.
Davomi InterFUTBOL gazetasi blogida.
— deya xabar beradi uff.uz nashri.