“Navbahor“ jamoasi a'zolari 19 mart kuni mamlakat kubogidagi ishtiroklarini boshlashlaridan xabaringiz bor. 1/16 finalda namanganlik futbolchilar Quvasoyda birinchi liga vakili “Tsementchi” jamoasi mehmoni bo'lishadi. Mezbon jamoa vakillari tomonidan taqdim etilgan ma'lumotga ko'ra Quvasoydagi uchrashuv 15.30da boshlanadi. O'zbekiston kubogining ushbu bosqichida g'olib bitta o'yin natijasiga ko'ra aniqlanadi. Shu sababli, javob bahsi o'tkazilmaydi. G'alabani qo'lga kiritgan jamoa nimchorak final yo'llanmasini qo'lga kiritadi. Ayni paytda futbolchilarimiz bugungi mashg'ulotni yakunlashga ulgurishdi. Ma'lum vaqt davomida Toshkentda tibbiy ko'rik bilan o'tish bilan mashg'ul bo'lgan janubiy koreyalik Xyunyeon Choy bugungi mashg'ulotda qatnashdi. Muxlislarimiz tomonidan qiziqish bildirilgan ukrainalik Vladislav Pavlenko ham mashg'ulotlarda qatnashmoqda. Bosh murabbiy Rashid G'ofurov “Neftchi”ga qarshi o'yindan keyin o'tkazilgan matbuot anjumanida har ikki futbolchidan ham umidvor ekanligini aytib o'tgandi. Demak, tez kunlarda har ikki futbolchini ham “Navbahor” libosida maydonda ko'rish imkoniga ega bo'lamiz.
— deya xabar beradi uff.uz nashri.