Osiyo Futbol Konfederatsiyasi JCh-2018 hamda OK-2019 so'nggi saralash bosqichlari uchun o'tkaziladigan qur'a tashlash muddatini tasdiqladi. Unga ko'ra, 7 aprel kuni OK-2019 so'nggi saralash bosqichiga qur'a tashlanadi. Mazkur qur'ada JCh-2018 hamda OK-2019 ikkinchi saralash bosqichidan o'ta olmagan 11ta terma jamoa Osiyo Kubogi final bosqichiga yo'llanma beruvchi so'nggi saralash bosqichidagi raqiblari nomini bilib oladilar. Ikkinchi saralash bosqichidan muvaffaqiyatli o'tgan 12ta terma jamoa esa, 12 aprel kuni Kuala-Lumpur shahridagi “Mandarin Oriental” mehmonxonasida bo'lib o'tadigan qur'adan so'ng, JCh-2018 final bosqichiga yo'llanma beruvchi so'nggi saralash bosqichidagi raqiblari nomini bilib oladilar. Eslatib o'tamiz, mazkur saralash bosqichida, 12ta terma jamoa 6tadan ikki guruhga bo'lingan holda JCh-2018 final bosqichi yo'llanmasi uchun kurashni davom ettiradilar. Osiyo Futbol Konfederatsiyasi, shuningdek, Bahraynda bo'lib o'tadigan U-19 yoshlar o'rtasidagi Osiyo Chempionati final bosqichi uchun qur'a tashlash muddatini e'lon qildi. Unga ko'ra, mazkur turnirga qur'a tashlash marosimi 30 aprel kuni Bahrayn poytaxti Manama shahrida o'tkaziladi.
— deya xabar beradi uff.uz nashri.