Osiyo Chempionlar ligasi 3-turidan o'rin olgan “Al-Jayish” – “Nasaf” jamoalari o'rtasidagi o'yin ko'plab bahsu munozaralarga sabab bo'lmoqda. O'sha o'yin taqdirini O'zbekiston milliy terma jamoasi a'zosi, “Al-Jayish”ning hujumchisi Sardor Rashidovning 87-daqiqada kiritgan yagona goli hal qildi. Mazkur gol “Nasaf”ni qo'lga kiritilishi mumkin bo'lgan bir ochkodan ham mahrum qildi. O'zbekistonlik futbol muxlislari uchrashuv davomida “Nasaf”ga ishqibozlik qilishgani aniq. Shu sababli ham Sardor Rashidovning “Nasaf”ni mag'lub etgan goli ularni ranjitgani ham tabiiy. Ammo bu “ranjish” haddidan oshib ketayotgandek go'yo. Shunday fikrlar yangramoqdaki, xudiki Sardor Rashidov o'sha o'yinda gol urib, noto'g'ri ish qilibdi. Ayniqsa, golni katta xursandchilik bilan nishonlashi o'z Vatanida “Nasaf”ga muxlislik qilayotgan millionlab insonlarga nisbatan hurmatsizlik emish... Sardorning golini salkam Vatanga “xiyonat”ga chiqarib qo'yayotganlar ham bor oramizda... Hattoki, Sardor Rashidovning ijtimoiy tarmoqlardagi sahifalarida unga “Hali Qarshiga kelsang, bizdan ko'rasan” degan mazmundagi tahdid va po'pisa qilishgacha etib borgan muxlislarni ko'rdim. Tushunmadim, shu fikrlarni bildirayotgan hurmatli ishqibozlar, chin dildan shularni aytyapsizlarmi yoki bu hazilmi? Agar hazil bo'lsa, maqolani shu erda to'xtataman. Agar chin dildan bo'lsa... Sizlarga savol: Hujumchining vazifasi nima? Gol urishmi? Gol urgandan keyin futbolchi nima qiladi? Albatta, xursand bo'ladi-da! O'z Vatani jamoasi darvozasini ishg'ol qilish mumkin emas degan yozilgan yoki yozilmagan qoida bormi? Haqiqiy professional futbolchi o'z jamoasi g'alabasi uchun to'p suradi. Boshqacha bo'lishi ham mumkin emas. Sardor Rashidov – Qatarning “Al-Jayish” klubi futbolchisi. O'sha klub bilan shartnomasi bor, o'sha klubdan maosh oladi. Qanday qilib maydonga tushgandan keyin yarim kuch bilan o'ynashi mumkin? Golni nishonlashga kelsak, ko'p futbolchilar o'zlari uzoq vaqt to'p surgan jamoalari darvozasini ishg'ol qilishsa, o'sha klubga va muxlislarga hurmat yuzasidan golni nishonlashmaydi. Bu holat Jahon futbolida ko'p kuzatiladi. Lekin Sardor “Nasaf”da to'p surmagan-ku! Agar “Bunyodkor”ga qarshi o'ynaganda ham boshqa gap edi. Nima bo'lgan taqdirda ham yashil maydonda o'ynaladigan futbolga xos hissiyot va ehtiroslarni o'sha maydonni o'zida qoldirish kerak. Futbol o'yinini xuddiki rostakam “jang”ga o'xshatib, o'zining professional vazifasini bajargan futbolchilarimizni, u Rashidov bo'ladimi, Eshmatmi, Toshmatmi, farqi yo'q - “xiyonatchi”ga chiqarish umuman absurd! O'zbek klublarida to'p surayotgan legioner futbolchilar o'z Vatani jamoasiga qarshi o'yinda gol ursa nima deysiz? Ularni yomonlamaysizku to'g'rimi? Qaytanga “haqiqiy professional” deb maqtaysiz. O'zimiznikilarga kelganda esa fanatlik tuyg'usi aql ko'zingizni berkitib qo'ymoqda, hurmatli ba'zilar! O'ylab ko'ring, o'ylab ko'ring.... Ayyubjon Muhammadjonov
— deya xabar beradi uff.uz nashri.