«Qo'qon-1912» klubining rasmiy sayti O'zbekiston Kubogi 1/16 finali doirasida «NBU-Osiyo» ustidan qozonilgan g'alabani «Bavariya» uslubidagi g'alaba», deb atadi. Quyida jamoa rasmiy saytida keltirilgan sharh bilan tanishib olishingiz mumkin.
O'zbekiston Kubogi 1/16 final uchrashuvi «Qo'qon-1912» uchun muvaffaqiyatli bo'ldi. “Jar” stadionining zaxira maydonida, kuchli yomg'ir ostida bo'lib o'tgan bahsda «Qo'qon-1912» irodali g'alabaga erishdi.
“NBU-Osiyo”ga qarshi kechgan o'yinni bir necha kun Myunxenda o'tkazilgan “Bavariya” – “Yuventus” bellashuvga qiyoslash mumkin.
O'yinning 4-daqiqasi o'tib borayotgan paytda mezbonlar hisobni ochishdi. Aniqrog'i, Saidjalol Sotiboldievning zarbasi darvozani ishg'ol etilishi bilan yakun topdi – 1:0.
33-daqiqada «Qo'qon-1912» futbolchisi jarima maydonchasi yaqinida mezbonlar futbolchisini qoidaga xilof ravishda to'xtatib qolishdi. Natijada Vadim Agishev jarima to'pini belgiladi. Tajribali Muzaffar Umrzoqov jarima to'pini qoyimaqom tarzda ijro etdi – 2:0.
Birinchi taym shu hisob bilan yakun topdi.
Tanaffusdan keyin jamoamizda bir qator o'zgarishlar amalga oshirildi. Buning natijasida raqib darvozasini uch marta ishg'ol etildi.
66-daqiqada Orif Mamajonov o'zining indvidual harakatlari evaziga hisobni qisqartirdi – 2:1.
Uchrashuv yakunlanishiga sanoqli daqiqalar qolganida o'yinda hisob tenglashdi. Qanotdan tashkil etilgan hujumni maydon egalari qo'pollik bilan to'xtatib qolishdi. Ushbu stantard vaziyat esa darvozaning ishg'ol etilishi bilan yakunlandi. Jarima maydonchasiga to'p oshirilgach, raqib darvozasi oldida pala-partishlik yuzaga keldi. Bundan esa Abdul Aziz Yusupov samarali foydalandi – 2:2.
Ushbu hujumchining o'zi hakam tomonidan asosiy vaqtga qo'shib berilgan daqiqalarda uchrashuv taqdirini hal etishi mumkin edi. Ammo yosh hujumchi o'ta qulay imkoniyatdan foydalana olmadi. Natijada asosiy vaqtda durang natija qayd etildi.
G'olibni aniqlash maqsadida qo'shimcha bo'limlar o'tkaziladigan bo'ldi. Qo'shimcha taymlarning 2-daqiqasida Azizxon Ibragimov ikki himoyachini chiroyli tarzda aldab o'tib, darvozaning to'qqizligini aniq nishonga oldi – 3:2.
Birinchi bo'limda «Qo'qon-1912» raqibning kuchiga to'g'ri baho bera olmaganliklari ko'rinib qoldi. Ikkinchi taymda esa bu xato o'z vaqtida tuzatildi.
Ikkinchi va qo'shimcha bo'limlarda katta ustunlik «Qo'qon-1912» tomonidan bo'ldi. Ushbu uchrashuvda jamoaning deyarli ikkinchi tarkibi maydonga tushganini aytib o'tish joiz.
Shu tariqa, “Qo'qon-1912” jamoasi O'zbekiston Kubogi 1/8 finalga yo'l oldi.
O'zbekiston Kubogi
1/16 final
«NBU-Osiyo» (Toshkent) – «Qo'qon-1912» (Qo'qon) 2:3 (2:0)
Hakamlar: V. Agishev (Toshkent), S. Eremeev (Toshkent), F. Yarmuxamedov (Toshkent), I. Xudaydatov (Toshkent)
Nazoratchi: D. Roman (Toshkent).
Gollar: Saidjalol Sotiboldiev – 4, Muzaffar Umrzoqov – 33. – Orif Mamajonov – 66, Abdulaziz Yusupov – 83, Azizxon Ibragimov – 92.
“NBU-Osiyo”: Azamat Ahmedov, Abbos Po'latov, Mirshoxid Olimov, Muzaffar Umrzoqov, Eldor Choriev, Oripxo'ja Abduxoliqov, Saidjalol Sotiboldiev, Isroil Ergashev, Orif Abdug'aniev, Ma'mur Sultonov, Avaz Ne'matov.
Zaxira: Vitaliy Toshibaev, Eldor Norbaev, Dostonbek Bahromov, Timur Usmonov, Soibjon Safarov, Muhammad Sultonov, Xayrullo Rixsiboev.
“Qo'qon-1912”: G'ayrat Hasanov, Asliddin Soipov, Doston Meliqo'ziev, Oybek Rustamov, Abdulaziz Yusupov, Avazxon Mamatxo'jaev, Ma'ruf Zokirjonov, Aziz To'xtaboev, Azizxon Ibragimov, Orif Mamajonov, Aybek Nurbaev.
Zaxira: Islom Abdullaev, Jalil Kimsanov, Ibrohim G'ofurov, Ibrohim Muxtorov, Ismoil Oxunjonov.
— deya xabar beradi uff.uz nashri.