Futbolchilarning o'yinchilik formalaridagi ajabtovur tavsirlar. Futbol dizayn sohasi bilan ham sherik. Axir zamonaviy ekipirovkalarni dizaynsiz tasavvur qilib bo'lmaydi. Lekin ba'zi jamoalar bu masalada ijodni sal oshirib yuborishadi. Marhamat, joriy mavsumning eng g'alati dizaynga ega futbolkalariga nazar tashlab, bunga o'zingiz  baho berishingiz mumkin.
«Betis»
«Betis» 6 mart kuni o'z maydonida «Granada»ga qarshi o'ynab, 2:0 hisobida g'alaba qozondi. Jamoa rahbariyati 8 mart - Xalqaro xotin-qizlar bayrami munosabati bilan alohida  qaror qabul qildi. Unga ko'ra, uy o'yinlari uchun mo'ljallangan futbolkalardagi an'anaviy oq chiziq o'rnini pushtirang egalladi. Bundan tashqari, shu kuni «Betis» prezidenti vazifasini direktorlar kengashi a'zosi Mariya Viktoriya Lopes bajardi. Bularning barchasi La Semana de la Mujer Betica (mohiyatan - «Betis» muxlisalari haftasi») aktsiyasi doirasida amalga oshirildi. Klub oldingi yillarda o'z muxlisalarini pushtirang sharflar bilan siylab, ular uchun imtiyozli chiptalarni sotuvga chiqarardi. Xullas, «Betis»ga ko'ngil qo'yishgan nozik jins vakillari stadionning  eng qulay joyi uchun ham atigi 10 evroga chipta xarid qilish imkoniyatiga ega bo'lishardi.
«Nyukasl Jets»
Avstraliyaning «Nyukasl Jets»  klubi 2015 yilning noyabr oyida bitta o'yinni noodatiy libosda o'tkazdi. Futbolkalarda ...harbiy samolyot tasviri aks ettirilgandi. «Jets» shu yo'sinda Avstraliya Qirollik harbiy-havo kuchlari aviabazasi bilan yaqin aloqada ekanligini ko'rsatdi. Ushbu baza Nyukasl shahridan atigi 15 kilometr uzoqlikda joylashgan. Aytgancha, «Jets» ramzida ham qiruvchi samolyot tasvirlangan.
«Kyoln»
Noyabr oyida karnaval libosida maydonga tushish - bu endilikda  «Kyoln» uchun o'ziga xos an'ana. Deylik, 2015 yili futbolka ta'minotchilari eng qadimiy karnaval jamiyatlaridan biri - «Qizil uchqun» (Rote Funken)dan ilhom olib, jamoa a'zolarini xuddi gvardiyachilar kabi kiyintirishdi.
«Myunxen-1860»
Germaniyada kiyinish bobida  «Myunxen-1860» klubi ham o'zini ko'rsatdi. Lekin uning tanlovi ancha sodda ko'rinish oldi. Ekipirovkaning asosiy mohiyati - Oktoberfest va uning yorqin kostyumlari.
«V-Varen Nagasaki»
Yaponiya ikkinchi ligasi ishtirokchisi - «V-Varen Nagasaki» klubi yozda 10 yillik yubileyini nishonladi. Jamoa rahbariyati shu munosabat bilan ekipirovka ta'minotchisi - Hummel firmasiga  kostyumga o'xshash forma tayyorlab berish vazifasini topshirdi. Ijod namunasi shu qadar ajoyib chiqdiki, butun dunyodagi muxlislar yapon klubi bilan alohida tanishib olishdi.
«Gent»
«Gent» joriy mavsum Chempionlar Ligasi «pley-off» bosqichiga chiqqan Belgiyaning ilk klubiga aylandi. Marketologlar esa fursatni boy bermay, jamoaning «kislota» futbolkalar sotuvidan foyda olishiga imkon yaratishdi. Albatta,bunday formalar esdalik uchun tayyorlandi.
«Darmshtadt»
Bundesliga debyutanti sanalgan «Darmshtadt» noyabrda bitta o'yinida eski uy stadioniga bag'ishlab tikilgan  futbolkalardan foydalandi. Arena 17mingdan ortiq muxlisni qabul qilolmasdi. Xullas, futbolkada stadion chizmasi tasvirlandi (ko'krak qismida). Sabab shuki, ushbu arena yaqin orada rekonstruktsiya qilinadi.
Davomi InterFUTBOL gazetasi blogida.
— deya xabar beradi uff.uz nashri.