Tavsiya qilamiz:
UzBARCA.COM - FC Barcelona Muxlislar sayti !!!
" Real madrid " muxlislari sayti !!!
"FUTBOL TV " Yangiliklar !!
" Real madrid " muxlislari sayti !!!
"FUTBOL TV " Yangiliklar !!
Hayrulla Hamidovdan: Yillar aro o'zgarmagan daho yoxud Zlatan Ibrohimovich aslida kim?
Azizlar, Zlatan haqida ko'p o'ylayman. Uning siymosi anchayin salobatli ekanini kuzataman. Ijozatingiz bilan bunga oddiygina misol keltirsam:
Quyidagi maqolani bundan olti yarim yil oldin, aniqrog'i 2009 yili yozgan ekanman. Maqola “Chempion” gazetasida chop etilgan. O'sha maqolani o'qiyapmanu, dolzarbligi zarrachayam o'zgarmaganiga hayron bo'lyapman. O'qib ko'ring-da, fikrimizning davomini keyinroq aytamiz:
Kim o'zi u?
- Faqatgina bitta Zlatan bor.
- Ishonchingiz komilmi?
- Ha. Siz nima, Zlatanni bilmaysizmi?
- Bizga Zlatanning kim ekanligini so'zlab bering-chi. Mana bu erdagi ba'zi gollandiyaliklar siz haqingizda bilishmas ekan...
- Ilgarilari hech ham bunday savolni eshitmagan ekanman. Birgina siz Zlatanning kim ekanligini bilmaysiz, ammo qolgan barcha muxlislar uchun bu narsa ayon. Agar bilmasangiz, biladiganlardan so'rab oling.
- Ular menga nimalarni so'zlab beradilar?
- Bu haqida ularning o'zlaridan so'rab oling.
Bu muloqot bundan sakkiz yil oldin, “Barselona” klubining mashhur hujumchisi bo'lgan Zlatan Ibrohimovich va qiziquvchan matbuot xodimi o'rtasida bo'lib o'tgan edi. “Zlatan kim o'zi?” degan savol shvetsiyalik futbol iqtidorini o'sha vaqtda jahlini chiqarib yuborgandi. Axir o'zi bo'ladimi, kimsan Ibrohimovich bo'ladiyu, uni tanimasalar! Ammo oradan birmuncha vaqt o'tganidan so'ng Zlatan har holda javob berishga qaror qildi. Uning javobi ham o'ziga yarasha bo'ldi. “Men shimolman, janubman, g'arb va sharqman. Men – Zlatan Ibrohimovichman”, - deydi u faylasuflik bilan o'zining mashhur “Italiya futboli kundaligi” deb nomlangan kitobida.
“Men shimolman, chunki Malma shahrida tug'ilganman va meni shved deb hisoblashlarini xohlayman. Men o'zim tug'ilgan shaharga va o'z vatanimga bog'lanib qolganman, mening barcha do'stlarim shu erda yashaydilar. Men janubman. Menga o'tkir hissiyotlarni tuyish yoqadi va sershovqin, menga qarshi turadigan muxlislar bilan to'lib-toshgan o'yingohlarda to'p surishni xohlayman. Men dovyurakman. Men faqatgina futbolda emas, balki hayotda ham ildam bo'lishni yoqtiraman. Men – g'arbman, chunki AQShni yoqtiraman va ta'til vaqtida dam olish uchun u erga oilam bilan tez-tez borib turaman. U erning iqlimi menga yoqadi va ingliz tilini ham yaxshi ko'raman. Men sharqman – chunki oilam asli o'sha tomondan kelib chiqqan, otam bosniyalik, onam xorvatiyalik. Men ota-onam so'zlashadigan tilni unutganim yo'q. Shuningdek men o'zimning qo'rqmas, engilmas, hech kimga bo'ysunmaydigan va hech qachon qumga bosh suqib, bir joyda turib qolmaydigan xalqim bilan o'zimni bog'lab turadigan rishtani bardavomligini doimo his qilib turaman...”
Bugungi kunda futbol olamida Zlatan Ibrohimovichchalik kayfiyati kuz xavosi yanglig' o'zgarib turadigan inson bo'lmasa kerak. U o'zining yuqori saviyadagi individual mahoratini ko'z-ko'z qila oladi, kiritgan gollari bo'lsa faqatgina yuqori did bilan ijro qilinadi. Ha, aynan ijro qiladi u, shunchaki darvoza to'riga to'pni tushirib qo'ymaydi, balki san'at asarini ijro qiladi. Uning sobiq murabbiyi va takrorlanmaslikda Zlatanning o'zidan mutlaqo qolishmaydigan Joze Mourino bu borada tesha tegmagan fikrini bildirib o'tgandi: “Zlatan qachonki chiroyli bo'lmagan gollarni ham kiritishni o'rgansa, o'shandagina buyuk futbolchi bo'lishi mumkin”.
Kimningdir yuzi Ibrohimovichning nomini eshitgani hamono burishib ketadi, kimdir uning o'yinlarini nafasini ichiga yutib tomosha qiladi, yana kim uchundir hujumchi ma'suliyatli uchrashuvlarda mutlaqo keraksiz bo'lib qoladigan futbolchilar sirasiga kiradi. Zlatanning o'zini bo'lsa bu fikrlar umuman qiziqtirmaydi. U maydonda o'zi xohlagancha o'yin namoyish qiladi, didiga moslab gollar kiritadi, muxlislarda o'zi to'g'risida turfa xil qarashlar keltirib chiqaradigan qiziqarli intervyular beradi. Hamma narsani o'z o'lchovi bilan o'lchaydi.
Zlatan va ko'rinmas odam
Ibrohimovichning futbolchilik faoliyati 1999 yilda “Malmyo” klubida boshlangan, ushbu jamoada u 40 ta uchrashuvda maydonga tushib, 16 bora gol kiritgan. O'sha vaqtlardayoq yosh iqtidorlarni uzoqdan ham payqay oladigan Arsen Venger hujumchini “Arsenal”ga taklif qilgandi, ammo shvetsiyalik o'yinchi o'zi uchun “Ayaks”da sharoit yaxshiroq yaratilgan deb hisobladi va 2001 yilda Gollandiya sari yo'l oldi. O'sha yili futbolchini Shvetsiya yoshlar terma jamoasiga ham chaqirdilar. U bu erda o'tkazgan ettita o'yini davomida olti bora gol kiritgach, to'ppa-to'g'ri milliy terma jamoa safiga o'tkazib yubordilar. “Ayaks”da o'tkazgan birinchi mavsumida sakkizta goli bilan jamoasini chempion bo'lishida yordam berib yuborgandan so'ng Zlatan asosiy tarkibda mudom tushadigan bo'ldi.
Kelasi yili yosh hujumchi Chempionlar Ligasidagi ilk uchrashuvini o'tkazdi va o'sha o'yinda “Olimpik” darvozasini ikki bora ishg'ol etishning uddasidan chiqa oldi. O'sha mavsum Chempionlar Ligasi o'yinlarida umumiy hisobda beshta gol kirita olgan Zlatan o'zining eng yaxshi natijasini qayd qilgandi. Bugungi kungacha Ibrohimovich hamon o'sha natijasini takrorlay olishning uddasidan chiqa olmay kelmoqda. Shu sababli ham jurnalistlar va shu vaqtga qadar u o'ynagan barcha jamoalarning muxlislari Evropaning eng obro'li turniri boshlangach, Zlatan ko'rinmas odamga aylanib qoladi deya kinoya qilib keladilar. Haqiqatan ham bu fikrlarga qo'shilmasdan o'zga iloj yo'q, chunki uch kun oldin ichki chempionat baxslarida javlon urib gollar kiritib yurgan hujumchi, chempionlar o'rtasidagi baxslar boshlangach gol urish u yoqda tursin, bironta ham yodda qoladigan vaziyat yuzaga keltirmasdan, jimgina yo'qolib qoladi.
Zlatan, “Yuventus” va transfer savdolari
2004 yilning avgust oyida jurnalistlar Ibrohimovichdan 31 avgust kuni transfer mavsumi tugashi borasida qanday fikrda ekanligini so'radilar. Zlatan bu haqida umuman o'ylamayotganini va hali o'yinchi sifatida o'sishi uchun “Ayaks”da qolishini aytib o'tdi. Ammo aftidan birdaniga o'zini o'yinchi sifatida kamolotga etgan deb hisoblab qolgan shekilli, oradan to'qqiz kun o'tgach birdaniga Turinda paydo bo'lib qoldi. Bu erda Zlatan ikki mavsum davomida to'p surdi.
Birinchi mavsum “ko'hna sinora”ning yangi a'zosi uchun “Ayaks”dagiga qaraganda anchayin omadli keldi. O'tkazilgan 45 ta uchrashuvda raqiblari darvozalariga 16 ta gol kiritgan hujumchi, o'z yurti Shvetsiyada ham eng yaxshi o'yinchiga aylandi. Ammo kelgusi yili yana 45 ta uchrashuvda maydonga tushgan Ibrohimovich ilgarigidek to'purarlik mahoratini namoyish qila olmadi, buning ustiga klub rahbariyati bilan ham juda ko'p marta sen-menga borib qolganligi sababli ko'pgina muammolar kelib chiqa boshladi. Zlatan aynan mana shu kelishmovchiliklarni keyinchalik “Inter”ga o'tib ketishidagi eng asosiy sabab qilib ko'rsatadi.
Zlatan va “Kapokannonere”
Aynan “Inter”da namoyish qilgan o'yinlari bilan Ibrohimovich raqqos-futbolchi degan nomga sazovor bo'ladi. Bu atama tasodifon unga yopishib qolgani yo'q, haqiqatan ham mohir hujumchi raqs tushgan monand himoyachilarni aldamchi xatti-harakatlari bilan har-xil ko'yga solib qo'yar va deyarli barcha gollarini hattoki tsirk artistlari ham havas qiladigan darajada did bilan kiritardi. Milanda o'ynagan vaqtlarida Zlatan fasohatli futbol muxlislarining yoqimtoyiga aylanib qoldi, ayniqsa elkasidan turtib turgan himoyachilarni pisand ham qilmagan holda, qaramasdanoq tovoni bilan “Bolonya” darvozasini ishg'ol qilgan vaqtida “Inter” muxlislari uni eru-ko'kka ishonmay qolgan edilar.
Umumiy hisobda “ko'k-qoralar” uchun o'tkazgan uchta mavsumi davomida Zlatan A seriya baxslarida 57 ta gol kiritishga muvaffaq bo'ldi va jamoaning eng oldi to'purariga aylandi. Faqatgina odatiy bo'lib qolgan Chempionlar Ligasidagi omadsizliklar uni yana ta'qib qilib kelayotgan edi. “Inter”da o'tkazgan so'nggi mavsumida Ibrohimovich deyarli Mourinoning qistovlari ostida Italiya chempionatining eng yaxshi to'purariga aylandi. Aynan mana shu “Kapokannonere” sovrini Zlatan uchun Italiyadagi eng so'nggi yutuq bo'lib qoldi. Apennin yarim orolida Ibrohimovich erishishi mumkin bo'lgan barcha yutuqlarni qo'lga kiritib bo'lgan edi, shu sababli ham 2009 yilning yozida futbol Olimpi bo'lib turgan Barselona sari yo'l oldi.
Zlatan va klublar
Zlatanning o'zi o'ynagan klublari bilan kechgan munosabatlari har doimo bitta stsenariy asosida davom etib kelmoqda. Avvaliga u o'zining yangi jamoasi sha'niga faqatgina maqtovlarni yog'diradi, ba'zan bu maqtovlar ochiqchasiga hushomadga aylanib ketgan vaqtlar ham bo'lgan. Zlatan o'zini ajoyib tarzda tutadi, intervyular beradi, yangi jamoadoshlari Ibrohimovichni qattiq xurmat qila boshlaydilar va u to'g'risida faqatgina yaxshi fikrlar bildiradilar. Har doim, hattoki bolalar jamoalarida o'ynab yurgan vaqtlarida ham shunday bo'lib kelgan. FK “Balkan”, “Malmyo”, Ayaks”, Yuventus”, “Inter” – bu jamoalarning har birida muxlislar xuddi shunday vaziyatning guvoxi bo'lganlar. “Malmyo”ga kelgandan so'ng, Zlatan darhol klub direktori Xasse Borgni o'zining ikkinchi otasi deb atagan edi. “Ayaks”dagi murabbiylari bilan ham xuddi shunday muosabatda bo'lgandi. “Yuventus”ga o'tgan vaqtlarida bo'lsa Fabio Kapelloni deyarli boshiga ko'tarib yurgudek bo'lardi. “Nerazzurrilar” safiga o'tgandan so'ng ham dambadam intervyular berib, hozirda o'zining eng ashaddiy dushmani deb biladigan Luish Figuni maqtab, o'zining eng yaqin do'sti ekanligini takrorlab turishni xush ko'rardi.
Keyinchalik bo'lsa, har doim yashin chaqqandek bo'lib janjallar boshlanadi. Ular doimo matbuot ishtirokida va muxlislar ko'z o'ngida bo'lib o'tardi. Hammasidan ham “Malmyo” bilan qay tariqa hisob-kitob qilib olganligi mashxur bo'lib ketgan. “Ayaks”ga o'tib olgan ilk kunlaridanoq hujumchi jurnalistlarga sobiq rahbari Borg haqida nimani o'ylab yurgan bo'lsa, barchasini aytib berdi. Ma'lum bo'lishicha, o'yinchi va klub rahbari o'rtasida hech qanaqa ota-bola munosabatlari bo'lmagan, ular bor-yo'g'i futbolchi va xo'jayin maqomida bo'lganlar, buning ustiga o'sha xo'jayin Zlatandan ayovsiz ravishda foydalanib kelgan. Yana “Ayaks”dan o'zi uchun berilgan mablag'dan yosh bolani xo'rozqand berib aldagandek, ozgina miqdorda berib qo'yganiga nima deysiz?! Xullas Borg yaxshi odam emas, o'z otasidek bo'lib qolmaganiku, ayni haqiqat!
Borgning qalbini bu so'zlar shu qadar yaraladiki, mana oradan qancha vaqt o'tganiga qaramasdan, hamon Ibrohimovichning nomini eshitishni ham xohlamaydi. Shvetsiyalik hujumchi o'ynagan boshqa klublarda ham shunga o'xshash voqealar albatta uchrab turar edi.
Zlatan va Van der Vaart
“Ayaks”da yaqin jamoadoshlari, ayniqsa klubning yana bir iqtidorli o'yinchisi Rafael Van der Vaart bilan Zlatan o'rtasida muntazam ravishda kelishmovchiliklar yuzaga kelib turardi. Avvaliga ularning o'rtasidagi nizolarga chek qo'yish uchun jamoa bosh murabbiyi Kuman bu o'yinchilarni faqat bitta xonada yashashlariga majbur qilib ko'rdi. Kuman bu bilan ularni do'stlashib qolishlariga umid qilgandi, ammo uning rejasi mutlaqo ish bermadi. Bu holat ayniqsa Evro-2004da Shvetsiya terma jamoasi gollandlarga qarshi o'ynaganda yaqqol ko'rinib qoldi. Zlatanga o'zining dushmanini safdan chiqarish uchun besh daqiqa vaqt kifoya qildi, jarohat olgan Van der Vaartni maydondan ko'tarib olib chiqib ketdilar, Ibrohimovichning “hujumi”dan so'ng u yura oladigan ahvolda emas edi. Bu vaqtga qadar ham davom etib kelayotgan ichki nizolar shundan so'ng yanada avj olib ketdi. Kumanga yillar davomida mashg'ulotlarni to'xtatib qo'yib, urishib-tepishayotgan shogirdlarini ajratib qo'yishiga, ularni yarashtirish uchun bir necha bor behuda urinib ko'rishiga to'g'ri keldi.Leo Benxaker bu to'g'rida shunday deb aytgan edi: “Zlatan va Rafael bilan bog'liq vaziyatga ko'p duch kelish mumkin. Har ikkala o'yinchi ham juda yoshlik chog'laridanoq yulduz bo'lib qoldilar va endilikda o'zaro kim zo'r ekanligini aniqlab olishni xohlaydilar”.
Ana o'sha terma jamoa ishtirokidagi mash'um o'yindan so'ng, Van der Vaart Zlatan haqida shunday degandi: “ U haqiqiy tentak. U menga ataylab jarohat etkazishga harakat qildi. O'z jamoasida to'p suradigan do'stga nisbatan bunday yo'l tutmaydilar”. Shuningdek u Ibrohimovichning o'sha to'qnashuvdan so'ng maydonda og'riqdan azoblanib yotganida, kelib, uning holini so'rab ham qo'ymaganidan jahli chiqayotgan edi. Ibrohimovich bo'lsa, o'sha jarohat tasodifan etkazilgandi deb hisoblaydi. U hattoki shu darajada betgachopar ediki, bir safar undan intervyu olayotgan jurnalistning: “Keling endi sizning jamoadoshlaringiz bilan qanday muammolaringiz borligi haqida gaplashaylik”, degan taklifiga bezbetlik bilan: “Muammo? Qanaqa muammo? Balkim sizning o'zingizda muammo bordir?”, - deb javob bergandi.
Ana o'sha voqealardan so'ng vaziyat yanada chigallashib boraverdi. Ibrohimovich Kumanga qat'iylik bilan Van der Vaart bor joyda o'ynamasligini aytdi. Oradan biroz vaqt o'tgach ular ochiqchasiga kiyinish xonasida urishib qoladilar, o'sha vaqtda voqea joyida bo'lgan guvohlarning ta'kidlashlaricha, Zlatan: “Agar sen yana biror marta matbuotda men haqimda gapiradigan bo'lsang, bo'yningni yulib olaman!”, - deb baqirgan ekan. Keyinchalik, Van der Vaart va Ibrohimovich boshqa-boshqa klublarda o'ynay boshlaganlaridan so'ng Rafael “Zlatan hech qachon menga do'st bo'lmagan. Agar bu haqiqatni hamma bilardi deb aytsam ham adashmagan bo'laman”, - deb aytgan edi.
Zlatan va Devid Bekxem
Devid Bekxem bilan Zlatan o'rtasidagi munosabatlar ham yumshoq qilib aytanda unchalik yaxshi bo'lmagan. Umuman o'sha vaqtlarda “Real”da o'ynagan ko'pgina o'yinchilar bilan Zlatanning muammolari bor edi. 2002 yilda Bosniyada chop etiladigan gazetalarning biriga intervyu bergan hujumchi Bekxem haqida shunday degandi: “Men Bekxem emasman, men maneken emasman. U menga umuman yoqmaydi, u bilan hech qachon futbolkamni almashtirishga rozi bo'lmayman deb o'ylayman”.
O'sha yili Zlatan “Ayaks” tarkibida, Devid Bekxem bo'lsa, “Manchester Yunayted” safida Chempionlar Ligasi baxsida uchrashdilar. Ana o'sha o'yinda futbolchilar o'rtasida janjal kelib chiqadi va ular maydonning o'zida bir-birlariga tashlanib qoladilar. Umuman bu mojaroga nima sabab bo'lgani unchalik ham aniq bo'lmasada, ammo ba'zi tahminlarga qaraganda o'zining “hushmuomalaligi” bilan mashxur bo'lgan Zlatan Devidning rafiqasi Viktoriya Bekxem xususida “salgina” nojo'ya fikrlarni bildiradi va bu bilan raqibini jahlini chiqarib qo'yadi. Garchand bu xabar rasmiy asosga ega bo'lmasada (bunaqa xabarlarda rasmiy asos bo'ladimi o'z?!), ammo ularning maydonda o'zaro olaqarash qilib yurganliklari aniq fakt bo'lib qolmoqda.
Zlatan va Mojigeyt voqeasi
“Yuventus”da Zlatanning amalga oshirgan kirdikorlari butun boshli kitob yozishga etsa kerak. U turinliklar bilan bo'lgan o'zaro munosabatlarini buzish uchun qo'lidan kelgan barcha ishni qildi. Bularning orasida Jonatan Zebinaning urib ko'kartirilgan ko'zi ham bor, mashg'ulotlar vaqtida sal bo'lmasa Patrik Vieyra bilan urishib ketayozgani to'g'risida ham aytsa bo'ladi, Kapelloning ko'rsatmalariga javoban aftini burishtirib, gap qaytargan vaqtlari ham bo'lgan. Mana shunday “qaxramonliklar” sirasiga “Yuventus” jamoasi ishtirokidagi o'yinlarning birida maydon chetidan turib, qanday o'ynash kerakligini aytayotgan don Fabioga qarab: “ Mening o'yinim sizga yoqmayotgan bo'lsa, chiqarib tashlashingiz mumkin”, - deb aytgan “mulozamati” ham kiradi.
“Yuventus” bilan kechgan xayrlashuv jarayoni ham shvetsiyalik “gastroler”ning o'yinchilik faoliyatidagi eng shov-shuvli voqea bo'lganligini aytib o'tish kerak. 2006 yilda “ko'hna sinora” A seriya baxslarini sotib olganlikda ayblanib, B seriyaga tushirib yuborilganidan so'ng Zlatan darhol “byakkonerilar” safini tark etishga qaror qildi. Modjigeyt yoki Kalchopoli deb nomlangan bu mojarolar juda ham avj olib ketganidan so'ng Zlatan Kannavaro va Vieyralarga qo'shilib “Yuventus”dan ketdi. Albatta bu holat klub muxlislariga yoqmadi, “kalamush cho'kayotgan kemadan qochib ketdi”, - deb aytgan edi ular. Ibrohimovich keyinchalik “Yuventus”dan ketishiga uzoq vaqt davomida etilib muammolar sabab bo'lganligi, ammo uning nihoyasi tasodifan Mojigeyt ishiga to'g'ri kelib qolganligi bilan o'zini oqlab yurdi.
Zlatan va Mourino
“Inter”da ham avvaliga hammasi juda ham ajoyib tarzda boshlandi. O'zining navbatdagi intervyularidan birida Ibrohimovich “nerazzurrilar”ga yoshligidan ishqibozlik qilib kelishini va bu erda o'ynashni orzu qilganligi to'g'risida gapirib berdi. Zlatan o'zining “Fiorentina”ga qarshi kechgan ilk uchrashuvidayoq bitta gol kiritdi va sherigiga ham gol ura olishi uchun to'p uzatib berdi. Shundan so'ng bosh murabbiy Roberto Manchini sharafiga to'xtovsiz ravishda maqtovlarni yog'dira boshladi. Ularning o'zaro juda ham yaxshi munosabatlarda ekanliklarini deyarli hamma bilardi. Bu xil taassurotlarni davom etishi uchun ikki yil vaqt etarli bo'ldi. Oradan ikki yil o'tgach klub prezidenti Moratti bosh murabbiy Manchinini iste'foga chiqarmoqchi bo'ldi va bu ishda uni Ibrohimovich bajonidil qo'llab-quvvatlab yubordi. U matbuotda chiqish qilib, Mourinoning juda ham iqtidorli mutaxassis ekanligi haqida to'lqinlanib gapirdi. Portugaliyalik murabbiy jamoaga kelgandan so'ng, uch oy vaqt o'tgach, Zlatan olovga moy quyish hislatlarini yana bir bor namoyish qiladi. U mana shu uch oy ichida Kapello va Manchinilar ustozlik qilgan bir necha yil davomida o'rgana olmagan narsalariga erishganini aytib o'tdi.
Zlatan va tiffozi
“Inter”ning etakchi o'yinchisiga aylanishi uchun Ibrohimovichga juda ham kam vaqt kifoya qildi, ammo tiffozilar uchun u baribir ham suyukli futbolchi bo'la olmadi. Uning qiyofasida muxlislar faqatgina o'zining obro'si uchun o'ynaydigan yollanma futbolchini ko'rar edilar. Buning ustiga “nerazzurrilar” safida o'ynagan so'nggi mavsumida, jamoa Chempionlar Ligasida odatiy tarzda muvaffaqiyatsizlikka uchragan vaqtda, muxlislar “Manchester Yunayted”ga qarshi kechgan hal qiluvchi uchrashuvda o'zini ko'rsata olmagan Zlatan Ibrohimovichni asosiy aybdor sifatida ko'rayotgan edilar. Umuman “Inter”da o'ynab yurgan vaqtlarida Zlatan va klub muxlislari o'rtasidagi munosabat shu qadar keskinlashib ketdiki, oqibatda “Latsio”ga qarshi o'tkazilgan o'yin vaqtida shvetsiyalik hujumchi gol urganidan so'ng, uni nishonlash o'rniga xursandchilik qilishni boshlab yuborgan tribunalarga qarab, “jim bo'linglar”, - degan ma'noda barmog'ini labining ustiga bosib, jahl qilgan edi. O'tgan mavsum nihoyasiga etganidan so'ng, klub muxlislari uni jamoadan ketishini shu qadar xohladilarki, Zlatanni goh “Real”, goh Manchester Yunayted”, gohida bo'lsa “Chelsi”ga ketayotgani to'g'risida mish-mishlar tarqatardilar. Ibrohimovichning o'zi bo'lsa, kelajak taqdirini “Inter” bilan bog'laganligi to'g'risida gapirishdan charchamasdi. Oradan ikki hafta o'tganidan so'ng, Zlatan ilk marta “Barselona” timsolini o'padi.
Zlatan va “Barselona”
“Kamp Nou”da Ibrohimovichni 75 000 dan oshiqroq kataloniyalik muxlislar kutib oldilar. Ular Zlatanni paydo bo'lishini tribunalarda turib, betoqatlik bilan kutar edilar. “Barselona” rahbariyati va muxlislarining kutganlari bexuda ketmadi, shvetsiyalik o'yinchi hozirda ularning eng suyuklilaridan biriga aylangan. To'xtovsiz gollar kiritmoqda, fantastik ko'rinishdagi to'p uzatishlarini amalga oshirmoqda. Bu borada ba'zan “Barsa”ning eng asosiy fahri bo'lmish Lionel Messining yulduzini ham xiralashtirib qo'yadigan darajada o'yin ko'rsatmoqda. Shu vaqtga qadar Zlatan kataloniyaliklar uchun o'tkazayotgan har bitta o'yinida qandaydir jihatlari bilan muxlislarni lol qoldirishga muvaffaq bo'lmoqda. Ba'zan kiritgan gollari bilan hammaning og'ziga tushsa, ba'zan uzatgan to'plari bilan mashhur bo'ladi. Hattoki “el klassiko” ham unga ataldi. Bu yil ko'z ko'rib, quloq eshitmagan pullarni transferga sarflab, jahonning eng ko'zga ko'ringan o'yinchilarini sotib olib kelgan Madridning “Real” klubi ham uning birgina zarbasiga dosh bera olmadi. Bu o'rinda kataloniyaliklarning transfer siyosati ham g'alaba qozondi deb aytsak to'g'ri bo'lsa kerak. Xozirda hech kim Ibrohimovichning o'rniga Samyuel Eto’O berib yuborilganini ham, buning ustiga qancha pul sarf qilinganini ham eslamay qo'ygan, ammo madridliklar amalga oshirgan bir nechta qimmatbaxo xaridlar borasidagi tortishuvlar hamon davom etib kelmoqda. Buni tabiiy hol deb qabul qilsa bo'ladi, axir “El klassiko” oqshomida Zlatan “qirollik klubi”ning birqator yulduzlari qila olmagan ishni, amalga oshira olgandi. Bu qaxramonlikdan so'ng Zlatanning obro'si yanada oshib ketganini tahmin qilib olish u qadar qiyin bo'lmasa kerak. Uning o'zi ham kataloniyada juda ham baxtli ekanligini tinmasdan ta'kidlab kelmoqda.
Xotima
Ammo bu kunlarni ham davomiy bo'ladi deb aytishga negadir iqtidorli futbolchining ichki dunyosi biroz halaqit beradigandek tuyulmoqda. Bundan biroz avval Zlatanning agenti bo'lmish Mino Rayolaning aytishiga ko'ra Ibrohimovichning doimo aytib keladigan bir gapi bor ekan. Unga ko'ra o'yinchi “Men hech qachon bitta klubning sha'nini oxiriga qadar himoya qilmayman”, - degan qoidaga amal qilar ekan. Rayola faqatgina o'yinchining mana shu fikrini davom ettirgan ko'yi Zlatanni vaqti kelib Italiyaga qaytishi mumkinligini rad qilmayapti. “Agar Zlatan oxir-oqibat “Barselona”da zerikadigan bo'lsa, Italiyaga qaytish to'g'risida o'ylab qolishi mumkin”, - deydi u italiyalik jurnalistlarning shu haqdagi savollariga javoban. Shunday ekan Zlatan haqida qanday hulosa chiqarish mumkinligini o'zingiz bir o'ylab ko'ring. U sadoqatli o'yinchilardanmi? Balkim sadoqatlidir, ammo o'ylashimizcha u faqatgina o'ziga sodiq qolishi mumkin!”
2009 yil. “Chempion” gazetasi.
Maqolani toqat bilan o'qib bo'lgan ersangiz, bu siymo o'shandan keyin yanada kattalashganini ko'rasiz. Uning PSJdagi missiyasi yuqoridagi hamma klubdagidan salobatliroq, to'g'rimi? U o'sgan va qizig'i, qariyotgan paytda o'sishdan davom etmoqda.
G'afur G'ulomning qiziq bir gapi bor: “Salobatliroq she'r yozmoqchi bo'lsang, o'tib ketgan mashhur zotlar nomidan yoz! Shunda she'r yozish mobaynida o'sha tarixiy shaxsning qiyofasiga kirasan va o'zing aytolmagan, aytishga iymangan kuchli fikrni qo'rqmasdan yozasan!”
Jahon futbolidagi Zlatan Ibrohimovich siymosini yozish jarayonida menda har doim shu holat hukmron bo'lgan negadir. Zlatan bo'lib yozgim kelavergan maqolani. Shundagina uning har bir harakatini tushungandek bo'laman. Shved o'g'lonining kimlargadir xunuk ko'ringan qiliqlari ham ma'nili ko'rina boshlagan shunda.
Zlatan siymosi deganda nimani tushunamiz? Misol uchun Balotelli. Italiyalik qora tanli hujumchi o'zini maqtashda Ibrohimovichdan qolishmaydi. Lekin hech sezganmisiz, unga bu gaplar yarashmaydi. Lekin Zlatannikini hazm qila olamiz. Bir xil so'z ikki odamning og'zidan ikki xil chiqadi gohida. Ularning mavqei shuni taqozo etadi.
Zlatanni kimdir Messi va Ronaldu asrida tug'ilib qolgani uchun ham omadsiz deydi. Bo'lmagan gap. U yashil maydonda Buffon darvozasiga gol urib yurgan paytlari Leo kichkina bola bo'lgan, Krish esa shunaqa gollar urishni orzu qilgan. Zlatanni istalgan davrga otib yuboring, u shundayligicha qolaveradi. Maradona asrida ham, Pele asrida ham. Chunki u boshqacha bo'la olmaydi, boshqacha o'ynay olmaydi.
Messining ba'zi harakatlarini Ronaldu hech qachon takrorlay olmaydi. Krishtianuning ba'zi zarbalari ham Leoga imkonsiz yumush. Lekin Zlatan shu ikkala bolaning har bir harakatini amalga oshira olgan ekan, hech sezganmisiz? Va qo'shimcha tarzda, u ikkisi hech qachon bajara olmaydigan akrobatik zarbalarni o'ynab kulib amalga oshiradi.
Zlatanning yoshini bilasiz-a? 35! Zidandek daho ham 34 yoshida o'zidagi nuqsonlarni sezgan va obro'si borida futboldan ketgan. Ibrohimovich darvozabonlargagina xos bo'lgan yoshda juda kuchli futbol ko'rsatyapti. Qarib qolgani ozgina sezilsa ham, jamoasining eng yaxshi o'yinchisi bo'lib turibdi baribir. Tottining zaxiradan tushib, nomigagina o'ynab yurgani qayoqdayu, qahramonimizning yuqori saviyali o'yin ko'rsatayotgani qayoqda? Farq katta-ya???
Zlatan “Oltin to'p”ni topshirish marosimiga “uchtalik” safida hech ham tashrif buyurmadi. Etti yil qatorasiga Messini 1-o'ringa qo'yib keldi. “Oskar”ni ham oxiri Di Kaprioga topshirdilar, oldingi filmlaridan anchayin past bo'lgan filmi uchun berishdi. E'tibor berdingizmi, hech kim qarshi bo'lmadi. Arzimaydi-ku, demadi. Chunki Leonardo bu sovringa haqliligini allaqachonlar isbotlab bo'lgandi. Ibrohimovich ham futboldagi Di Kaprio! Ketayotgan paytida unga “Oltin to'p”ni topshirishsa, menimcha, Messi va Ronaldu ham rozi bo'ladi.
Zlatanning buyukligini men internetdan uning rasmini izlayotganimda yana bir karra sezdim. Nomini yozgandim, o'ziyam 10dan ziyod liboslarda chiqib keldi. Borgan joyida etakchi bo'la olgan ekan. U yangi jamoasiga bormasidanoq etakchiga aylangan ekan, tavba! Tasavvur qilingki, qaysidir jamoa tarkibida Ronaldu, Messi va Zlatan o'ynayapti. Kim etakchi bo'lardi?!
Zlatan yaqinda futboldan ketadi. Ronaldu, nasib qilsa, yana ikki-uch yil o'ynab bersa kerak. Messi oldida kamida besh yillik faoliyat bor. Yillar o'tadi, bolalarimizga shu bugunimiz haqida hikoya qilib berganimizda, ko'pchiligimiz “Messi va Ronaldu asri” degan ta'rifni ishlatadi. Men esa Zlatanni ham qo'shaman. Hech qachon birinchi bo'la olmagan, ammo o'zini doimo birinchi deb atagan, juda ko'pchilikni ich-ichidan bu ta'rifga rozi qila olgan takrorlanmas Ibrohimovichni, albatta, qo'shib aytaman. Usiz bu davr kemtik bo'lib qolaveradi, ishonavering!
Darvoqe, Zlatanning so'nggi turda “Trua” darvozasiga urgan to'rtta golini tomosha qilib qo'ying! Ikkinchi golini anovi ikkovi ham takrorlay olmaydi! Xayrulla Hamidov
— deya xabar beradi uff.uz nashri.
Quyidagi maqolani bundan olti yarim yil oldin, aniqrog'i 2009 yili yozgan ekanman. Maqola “Chempion” gazetasida chop etilgan. O'sha maqolani o'qiyapmanu, dolzarbligi zarrachayam o'zgarmaganiga hayron bo'lyapman. O'qib ko'ring-da, fikrimizning davomini keyinroq aytamiz:
Kim o'zi u?
- Faqatgina bitta Zlatan bor.
- Ishonchingiz komilmi?
- Ha. Siz nima, Zlatanni bilmaysizmi?
- Bizga Zlatanning kim ekanligini so'zlab bering-chi. Mana bu erdagi ba'zi gollandiyaliklar siz haqingizda bilishmas ekan...
- Ilgarilari hech ham bunday savolni eshitmagan ekanman. Birgina siz Zlatanning kim ekanligini bilmaysiz, ammo qolgan barcha muxlislar uchun bu narsa ayon. Agar bilmasangiz, biladiganlardan so'rab oling.
- Ular menga nimalarni so'zlab beradilar?
- Bu haqida ularning o'zlaridan so'rab oling.
Bu muloqot bundan sakkiz yil oldin, “Barselona” klubining mashhur hujumchisi bo'lgan Zlatan Ibrohimovich va qiziquvchan matbuot xodimi o'rtasida bo'lib o'tgan edi. “Zlatan kim o'zi?” degan savol shvetsiyalik futbol iqtidorini o'sha vaqtda jahlini chiqarib yuborgandi. Axir o'zi bo'ladimi, kimsan Ibrohimovich bo'ladiyu, uni tanimasalar! Ammo oradan birmuncha vaqt o'tganidan so'ng Zlatan har holda javob berishga qaror qildi. Uning javobi ham o'ziga yarasha bo'ldi. “Men shimolman, janubman, g'arb va sharqman. Men – Zlatan Ibrohimovichman”, - deydi u faylasuflik bilan o'zining mashhur “Italiya futboli kundaligi” deb nomlangan kitobida.
“Men shimolman, chunki Malma shahrida tug'ilganman va meni shved deb hisoblashlarini xohlayman. Men o'zim tug'ilgan shaharga va o'z vatanimga bog'lanib qolganman, mening barcha do'stlarim shu erda yashaydilar. Men janubman. Menga o'tkir hissiyotlarni tuyish yoqadi va sershovqin, menga qarshi turadigan muxlislar bilan to'lib-toshgan o'yingohlarda to'p surishni xohlayman. Men dovyurakman. Men faqatgina futbolda emas, balki hayotda ham ildam bo'lishni yoqtiraman. Men – g'arbman, chunki AQShni yoqtiraman va ta'til vaqtida dam olish uchun u erga oilam bilan tez-tez borib turaman. U erning iqlimi menga yoqadi va ingliz tilini ham yaxshi ko'raman. Men sharqman – chunki oilam asli o'sha tomondan kelib chiqqan, otam bosniyalik, onam xorvatiyalik. Men ota-onam so'zlashadigan tilni unutganim yo'q. Shuningdek men o'zimning qo'rqmas, engilmas, hech kimga bo'ysunmaydigan va hech qachon qumga bosh suqib, bir joyda turib qolmaydigan xalqim bilan o'zimni bog'lab turadigan rishtani bardavomligini doimo his qilib turaman...”
Bugungi kunda futbol olamida Zlatan Ibrohimovichchalik kayfiyati kuz xavosi yanglig' o'zgarib turadigan inson bo'lmasa kerak. U o'zining yuqori saviyadagi individual mahoratini ko'z-ko'z qila oladi, kiritgan gollari bo'lsa faqatgina yuqori did bilan ijro qilinadi. Ha, aynan ijro qiladi u, shunchaki darvoza to'riga to'pni tushirib qo'ymaydi, balki san'at asarini ijro qiladi. Uning sobiq murabbiyi va takrorlanmaslikda Zlatanning o'zidan mutlaqo qolishmaydigan Joze Mourino bu borada tesha tegmagan fikrini bildirib o'tgandi: “Zlatan qachonki chiroyli bo'lmagan gollarni ham kiritishni o'rgansa, o'shandagina buyuk futbolchi bo'lishi mumkin”.
Kimningdir yuzi Ibrohimovichning nomini eshitgani hamono burishib ketadi, kimdir uning o'yinlarini nafasini ichiga yutib tomosha qiladi, yana kim uchundir hujumchi ma'suliyatli uchrashuvlarda mutlaqo keraksiz bo'lib qoladigan futbolchilar sirasiga kiradi. Zlatanning o'zini bo'lsa bu fikrlar umuman qiziqtirmaydi. U maydonda o'zi xohlagancha o'yin namoyish qiladi, didiga moslab gollar kiritadi, muxlislarda o'zi to'g'risida turfa xil qarashlar keltirib chiqaradigan qiziqarli intervyular beradi. Hamma narsani o'z o'lchovi bilan o'lchaydi.
Zlatan va ko'rinmas odam
Ibrohimovichning futbolchilik faoliyati 1999 yilda “Malmyo” klubida boshlangan, ushbu jamoada u 40 ta uchrashuvda maydonga tushib, 16 bora gol kiritgan. O'sha vaqtlardayoq yosh iqtidorlarni uzoqdan ham payqay oladigan Arsen Venger hujumchini “Arsenal”ga taklif qilgandi, ammo shvetsiyalik o'yinchi o'zi uchun “Ayaks”da sharoit yaxshiroq yaratilgan deb hisobladi va 2001 yilda Gollandiya sari yo'l oldi. O'sha yili futbolchini Shvetsiya yoshlar terma jamoasiga ham chaqirdilar. U bu erda o'tkazgan ettita o'yini davomida olti bora gol kiritgach, to'ppa-to'g'ri milliy terma jamoa safiga o'tkazib yubordilar. “Ayaks”da o'tkazgan birinchi mavsumida sakkizta goli bilan jamoasini chempion bo'lishida yordam berib yuborgandan so'ng Zlatan asosiy tarkibda mudom tushadigan bo'ldi.
Kelasi yili yosh hujumchi Chempionlar Ligasidagi ilk uchrashuvini o'tkazdi va o'sha o'yinda “Olimpik” darvozasini ikki bora ishg'ol etishning uddasidan chiqa oldi. O'sha mavsum Chempionlar Ligasi o'yinlarida umumiy hisobda beshta gol kirita olgan Zlatan o'zining eng yaxshi natijasini qayd qilgandi. Bugungi kungacha Ibrohimovich hamon o'sha natijasini takrorlay olishning uddasidan chiqa olmay kelmoqda. Shu sababli ham jurnalistlar va shu vaqtga qadar u o'ynagan barcha jamoalarning muxlislari Evropaning eng obro'li turniri boshlangach, Zlatan ko'rinmas odamga aylanib qoladi deya kinoya qilib keladilar. Haqiqatan ham bu fikrlarga qo'shilmasdan o'zga iloj yo'q, chunki uch kun oldin ichki chempionat baxslarida javlon urib gollar kiritib yurgan hujumchi, chempionlar o'rtasidagi baxslar boshlangach gol urish u yoqda tursin, bironta ham yodda qoladigan vaziyat yuzaga keltirmasdan, jimgina yo'qolib qoladi.
Zlatan, “Yuventus” va transfer savdolari
2004 yilning avgust oyida jurnalistlar Ibrohimovichdan 31 avgust kuni transfer mavsumi tugashi borasida qanday fikrda ekanligini so'radilar. Zlatan bu haqida umuman o'ylamayotganini va hali o'yinchi sifatida o'sishi uchun “Ayaks”da qolishini aytib o'tdi. Ammo aftidan birdaniga o'zini o'yinchi sifatida kamolotga etgan deb hisoblab qolgan shekilli, oradan to'qqiz kun o'tgach birdaniga Turinda paydo bo'lib qoldi. Bu erda Zlatan ikki mavsum davomida to'p surdi.
Birinchi mavsum “ko'hna sinora”ning yangi a'zosi uchun “Ayaks”dagiga qaraganda anchayin omadli keldi. O'tkazilgan 45 ta uchrashuvda raqiblari darvozalariga 16 ta gol kiritgan hujumchi, o'z yurti Shvetsiyada ham eng yaxshi o'yinchiga aylandi. Ammo kelgusi yili yana 45 ta uchrashuvda maydonga tushgan Ibrohimovich ilgarigidek to'purarlik mahoratini namoyish qila olmadi, buning ustiga klub rahbariyati bilan ham juda ko'p marta sen-menga borib qolganligi sababli ko'pgina muammolar kelib chiqa boshladi. Zlatan aynan mana shu kelishmovchiliklarni keyinchalik “Inter”ga o'tib ketishidagi eng asosiy sabab qilib ko'rsatadi.
Zlatan va “Kapokannonere”
Aynan “Inter”da namoyish qilgan o'yinlari bilan Ibrohimovich raqqos-futbolchi degan nomga sazovor bo'ladi. Bu atama tasodifon unga yopishib qolgani yo'q, haqiqatan ham mohir hujumchi raqs tushgan monand himoyachilarni aldamchi xatti-harakatlari bilan har-xil ko'yga solib qo'yar va deyarli barcha gollarini hattoki tsirk artistlari ham havas qiladigan darajada did bilan kiritardi. Milanda o'ynagan vaqtlarida Zlatan fasohatli futbol muxlislarining yoqimtoyiga aylanib qoldi, ayniqsa elkasidan turtib turgan himoyachilarni pisand ham qilmagan holda, qaramasdanoq tovoni bilan “Bolonya” darvozasini ishg'ol qilgan vaqtida “Inter” muxlislari uni eru-ko'kka ishonmay qolgan edilar.
Umumiy hisobda “ko'k-qoralar” uchun o'tkazgan uchta mavsumi davomida Zlatan A seriya baxslarida 57 ta gol kiritishga muvaffaq bo'ldi va jamoaning eng oldi to'purariga aylandi. Faqatgina odatiy bo'lib qolgan Chempionlar Ligasidagi omadsizliklar uni yana ta'qib qilib kelayotgan edi. “Inter”da o'tkazgan so'nggi mavsumida Ibrohimovich deyarli Mourinoning qistovlari ostida Italiya chempionatining eng yaxshi to'purariga aylandi. Aynan mana shu “Kapokannonere” sovrini Zlatan uchun Italiyadagi eng so'nggi yutuq bo'lib qoldi. Apennin yarim orolida Ibrohimovich erishishi mumkin bo'lgan barcha yutuqlarni qo'lga kiritib bo'lgan edi, shu sababli ham 2009 yilning yozida futbol Olimpi bo'lib turgan Barselona sari yo'l oldi.
Zlatan va klublar
Zlatanning o'zi o'ynagan klublari bilan kechgan munosabatlari har doimo bitta stsenariy asosida davom etib kelmoqda. Avvaliga u o'zining yangi jamoasi sha'niga faqatgina maqtovlarni yog'diradi, ba'zan bu maqtovlar ochiqchasiga hushomadga aylanib ketgan vaqtlar ham bo'lgan. Zlatan o'zini ajoyib tarzda tutadi, intervyular beradi, yangi jamoadoshlari Ibrohimovichni qattiq xurmat qila boshlaydilar va u to'g'risida faqatgina yaxshi fikrlar bildiradilar. Har doim, hattoki bolalar jamoalarida o'ynab yurgan vaqtlarida ham shunday bo'lib kelgan. FK “Balkan”, “Malmyo”, Ayaks”, Yuventus”, “Inter” – bu jamoalarning har birida muxlislar xuddi shunday vaziyatning guvoxi bo'lganlar. “Malmyo”ga kelgandan so'ng, Zlatan darhol klub direktori Xasse Borgni o'zining ikkinchi otasi deb atagan edi. “Ayaks”dagi murabbiylari bilan ham xuddi shunday muosabatda bo'lgandi. “Yuventus”ga o'tgan vaqtlarida bo'lsa Fabio Kapelloni deyarli boshiga ko'tarib yurgudek bo'lardi. “Nerazzurrilar” safiga o'tgandan so'ng ham dambadam intervyular berib, hozirda o'zining eng ashaddiy dushmani deb biladigan Luish Figuni maqtab, o'zining eng yaqin do'sti ekanligini takrorlab turishni xush ko'rardi.
Keyinchalik bo'lsa, har doim yashin chaqqandek bo'lib janjallar boshlanadi. Ular doimo matbuot ishtirokida va muxlislar ko'z o'ngida bo'lib o'tardi. Hammasidan ham “Malmyo” bilan qay tariqa hisob-kitob qilib olganligi mashxur bo'lib ketgan. “Ayaks”ga o'tib olgan ilk kunlaridanoq hujumchi jurnalistlarga sobiq rahbari Borg haqida nimani o'ylab yurgan bo'lsa, barchasini aytib berdi. Ma'lum bo'lishicha, o'yinchi va klub rahbari o'rtasida hech qanaqa ota-bola munosabatlari bo'lmagan, ular bor-yo'g'i futbolchi va xo'jayin maqomida bo'lganlar, buning ustiga o'sha xo'jayin Zlatandan ayovsiz ravishda foydalanib kelgan. Yana “Ayaks”dan o'zi uchun berilgan mablag'dan yosh bolani xo'rozqand berib aldagandek, ozgina miqdorda berib qo'yganiga nima deysiz?! Xullas Borg yaxshi odam emas, o'z otasidek bo'lib qolmaganiku, ayni haqiqat!
Borgning qalbini bu so'zlar shu qadar yaraladiki, mana oradan qancha vaqt o'tganiga qaramasdan, hamon Ibrohimovichning nomini eshitishni ham xohlamaydi. Shvetsiyalik hujumchi o'ynagan boshqa klublarda ham shunga o'xshash voqealar albatta uchrab turar edi.
Zlatan va Van der Vaart
“Ayaks”da yaqin jamoadoshlari, ayniqsa klubning yana bir iqtidorli o'yinchisi Rafael Van der Vaart bilan Zlatan o'rtasida muntazam ravishda kelishmovchiliklar yuzaga kelib turardi. Avvaliga ularning o'rtasidagi nizolarga chek qo'yish uchun jamoa bosh murabbiyi Kuman bu o'yinchilarni faqat bitta xonada yashashlariga majbur qilib ko'rdi. Kuman bu bilan ularni do'stlashib qolishlariga umid qilgandi, ammo uning rejasi mutlaqo ish bermadi. Bu holat ayniqsa Evro-2004da Shvetsiya terma jamoasi gollandlarga qarshi o'ynaganda yaqqol ko'rinib qoldi. Zlatanga o'zining dushmanini safdan chiqarish uchun besh daqiqa vaqt kifoya qildi, jarohat olgan Van der Vaartni maydondan ko'tarib olib chiqib ketdilar, Ibrohimovichning “hujumi”dan so'ng u yura oladigan ahvolda emas edi. Bu vaqtga qadar ham davom etib kelayotgan ichki nizolar shundan so'ng yanada avj olib ketdi. Kumanga yillar davomida mashg'ulotlarni to'xtatib qo'yib, urishib-tepishayotgan shogirdlarini ajratib qo'yishiga, ularni yarashtirish uchun bir necha bor behuda urinib ko'rishiga to'g'ri keldi.Leo Benxaker bu to'g'rida shunday deb aytgan edi: “Zlatan va Rafael bilan bog'liq vaziyatga ko'p duch kelish mumkin. Har ikkala o'yinchi ham juda yoshlik chog'laridanoq yulduz bo'lib qoldilar va endilikda o'zaro kim zo'r ekanligini aniqlab olishni xohlaydilar”.
Ana o'sha terma jamoa ishtirokidagi mash'um o'yindan so'ng, Van der Vaart Zlatan haqida shunday degandi: “ U haqiqiy tentak. U menga ataylab jarohat etkazishga harakat qildi. O'z jamoasida to'p suradigan do'stga nisbatan bunday yo'l tutmaydilar”. Shuningdek u Ibrohimovichning o'sha to'qnashuvdan so'ng maydonda og'riqdan azoblanib yotganida, kelib, uning holini so'rab ham qo'ymaganidan jahli chiqayotgan edi. Ibrohimovich bo'lsa, o'sha jarohat tasodifan etkazilgandi deb hisoblaydi. U hattoki shu darajada betgachopar ediki, bir safar undan intervyu olayotgan jurnalistning: “Keling endi sizning jamoadoshlaringiz bilan qanday muammolaringiz borligi haqida gaplashaylik”, degan taklifiga bezbetlik bilan: “Muammo? Qanaqa muammo? Balkim sizning o'zingizda muammo bordir?”, - deb javob bergandi.
Ana o'sha voqealardan so'ng vaziyat yanada chigallashib boraverdi. Ibrohimovich Kumanga qat'iylik bilan Van der Vaart bor joyda o'ynamasligini aytdi. Oradan biroz vaqt o'tgach ular ochiqchasiga kiyinish xonasida urishib qoladilar, o'sha vaqtda voqea joyida bo'lgan guvohlarning ta'kidlashlaricha, Zlatan: “Agar sen yana biror marta matbuotda men haqimda gapiradigan bo'lsang, bo'yningni yulib olaman!”, - deb baqirgan ekan. Keyinchalik, Van der Vaart va Ibrohimovich boshqa-boshqa klublarda o'ynay boshlaganlaridan so'ng Rafael “Zlatan hech qachon menga do'st bo'lmagan. Agar bu haqiqatni hamma bilardi deb aytsam ham adashmagan bo'laman”, - deb aytgan edi.
Zlatan va Devid Bekxem
Devid Bekxem bilan Zlatan o'rtasidagi munosabatlar ham yumshoq qilib aytanda unchalik yaxshi bo'lmagan. Umuman o'sha vaqtlarda “Real”da o'ynagan ko'pgina o'yinchilar bilan Zlatanning muammolari bor edi. 2002 yilda Bosniyada chop etiladigan gazetalarning biriga intervyu bergan hujumchi Bekxem haqida shunday degandi: “Men Bekxem emasman, men maneken emasman. U menga umuman yoqmaydi, u bilan hech qachon futbolkamni almashtirishga rozi bo'lmayman deb o'ylayman”.
O'sha yili Zlatan “Ayaks” tarkibida, Devid Bekxem bo'lsa, “Manchester Yunayted” safida Chempionlar Ligasi baxsida uchrashdilar. Ana o'sha o'yinda futbolchilar o'rtasida janjal kelib chiqadi va ular maydonning o'zida bir-birlariga tashlanib qoladilar. Umuman bu mojaroga nima sabab bo'lgani unchalik ham aniq bo'lmasada, ammo ba'zi tahminlarga qaraganda o'zining “hushmuomalaligi” bilan mashxur bo'lgan Zlatan Devidning rafiqasi Viktoriya Bekxem xususida “salgina” nojo'ya fikrlarni bildiradi va bu bilan raqibini jahlini chiqarib qo'yadi. Garchand bu xabar rasmiy asosga ega bo'lmasada (bunaqa xabarlarda rasmiy asos bo'ladimi o'z?!), ammo ularning maydonda o'zaro olaqarash qilib yurganliklari aniq fakt bo'lib qolmoqda.
Zlatan va Mojigeyt voqeasi
“Yuventus”da Zlatanning amalga oshirgan kirdikorlari butun boshli kitob yozishga etsa kerak. U turinliklar bilan bo'lgan o'zaro munosabatlarini buzish uchun qo'lidan kelgan barcha ishni qildi. Bularning orasida Jonatan Zebinaning urib ko'kartirilgan ko'zi ham bor, mashg'ulotlar vaqtida sal bo'lmasa Patrik Vieyra bilan urishib ketayozgani to'g'risida ham aytsa bo'ladi, Kapelloning ko'rsatmalariga javoban aftini burishtirib, gap qaytargan vaqtlari ham bo'lgan. Mana shunday “qaxramonliklar” sirasiga “Yuventus” jamoasi ishtirokidagi o'yinlarning birida maydon chetidan turib, qanday o'ynash kerakligini aytayotgan don Fabioga qarab: “ Mening o'yinim sizga yoqmayotgan bo'lsa, chiqarib tashlashingiz mumkin”, - deb aytgan “mulozamati” ham kiradi.
“Yuventus” bilan kechgan xayrlashuv jarayoni ham shvetsiyalik “gastroler”ning o'yinchilik faoliyatidagi eng shov-shuvli voqea bo'lganligini aytib o'tish kerak. 2006 yilda “ko'hna sinora” A seriya baxslarini sotib olganlikda ayblanib, B seriyaga tushirib yuborilganidan so'ng Zlatan darhol “byakkonerilar” safini tark etishga qaror qildi. Modjigeyt yoki Kalchopoli deb nomlangan bu mojarolar juda ham avj olib ketganidan so'ng Zlatan Kannavaro va Vieyralarga qo'shilib “Yuventus”dan ketdi. Albatta bu holat klub muxlislariga yoqmadi, “kalamush cho'kayotgan kemadan qochib ketdi”, - deb aytgan edi ular. Ibrohimovich keyinchalik “Yuventus”dan ketishiga uzoq vaqt davomida etilib muammolar sabab bo'lganligi, ammo uning nihoyasi tasodifan Mojigeyt ishiga to'g'ri kelib qolganligi bilan o'zini oqlab yurdi.
Zlatan va Mourino
“Inter”da ham avvaliga hammasi juda ham ajoyib tarzda boshlandi. O'zining navbatdagi intervyularidan birida Ibrohimovich “nerazzurrilar”ga yoshligidan ishqibozlik qilib kelishini va bu erda o'ynashni orzu qilganligi to'g'risida gapirib berdi. Zlatan o'zining “Fiorentina”ga qarshi kechgan ilk uchrashuvidayoq bitta gol kiritdi va sherigiga ham gol ura olishi uchun to'p uzatib berdi. Shundan so'ng bosh murabbiy Roberto Manchini sharafiga to'xtovsiz ravishda maqtovlarni yog'dira boshladi. Ularning o'zaro juda ham yaxshi munosabatlarda ekanliklarini deyarli hamma bilardi. Bu xil taassurotlarni davom etishi uchun ikki yil vaqt etarli bo'ldi. Oradan ikki yil o'tgach klub prezidenti Moratti bosh murabbiy Manchinini iste'foga chiqarmoqchi bo'ldi va bu ishda uni Ibrohimovich bajonidil qo'llab-quvvatlab yubordi. U matbuotda chiqish qilib, Mourinoning juda ham iqtidorli mutaxassis ekanligi haqida to'lqinlanib gapirdi. Portugaliyalik murabbiy jamoaga kelgandan so'ng, uch oy vaqt o'tgach, Zlatan olovga moy quyish hislatlarini yana bir bor namoyish qiladi. U mana shu uch oy ichida Kapello va Manchinilar ustozlik qilgan bir necha yil davomida o'rgana olmagan narsalariga erishganini aytib o'tdi.
Zlatan va tiffozi
“Inter”ning etakchi o'yinchisiga aylanishi uchun Ibrohimovichga juda ham kam vaqt kifoya qildi, ammo tiffozilar uchun u baribir ham suyukli futbolchi bo'la olmadi. Uning qiyofasida muxlislar faqatgina o'zining obro'si uchun o'ynaydigan yollanma futbolchini ko'rar edilar. Buning ustiga “nerazzurrilar” safida o'ynagan so'nggi mavsumida, jamoa Chempionlar Ligasida odatiy tarzda muvaffaqiyatsizlikka uchragan vaqtda, muxlislar “Manchester Yunayted”ga qarshi kechgan hal qiluvchi uchrashuvda o'zini ko'rsata olmagan Zlatan Ibrohimovichni asosiy aybdor sifatida ko'rayotgan edilar. Umuman “Inter”da o'ynab yurgan vaqtlarida Zlatan va klub muxlislari o'rtasidagi munosabat shu qadar keskinlashib ketdiki, oqibatda “Latsio”ga qarshi o'tkazilgan o'yin vaqtida shvetsiyalik hujumchi gol urganidan so'ng, uni nishonlash o'rniga xursandchilik qilishni boshlab yuborgan tribunalarga qarab, “jim bo'linglar”, - degan ma'noda barmog'ini labining ustiga bosib, jahl qilgan edi. O'tgan mavsum nihoyasiga etganidan so'ng, klub muxlislari uni jamoadan ketishini shu qadar xohladilarki, Zlatanni goh “Real”, goh Manchester Yunayted”, gohida bo'lsa “Chelsi”ga ketayotgani to'g'risida mish-mishlar tarqatardilar. Ibrohimovichning o'zi bo'lsa, kelajak taqdirini “Inter” bilan bog'laganligi to'g'risida gapirishdan charchamasdi. Oradan ikki hafta o'tganidan so'ng, Zlatan ilk marta “Barselona” timsolini o'padi.
Zlatan va “Barselona”
“Kamp Nou”da Ibrohimovichni 75 000 dan oshiqroq kataloniyalik muxlislar kutib oldilar. Ular Zlatanni paydo bo'lishini tribunalarda turib, betoqatlik bilan kutar edilar. “Barselona” rahbariyati va muxlislarining kutganlari bexuda ketmadi, shvetsiyalik o'yinchi hozirda ularning eng suyuklilaridan biriga aylangan. To'xtovsiz gollar kiritmoqda, fantastik ko'rinishdagi to'p uzatishlarini amalga oshirmoqda. Bu borada ba'zan “Barsa”ning eng asosiy fahri bo'lmish Lionel Messining yulduzini ham xiralashtirib qo'yadigan darajada o'yin ko'rsatmoqda. Shu vaqtga qadar Zlatan kataloniyaliklar uchun o'tkazayotgan har bitta o'yinida qandaydir jihatlari bilan muxlislarni lol qoldirishga muvaffaq bo'lmoqda. Ba'zan kiritgan gollari bilan hammaning og'ziga tushsa, ba'zan uzatgan to'plari bilan mashhur bo'ladi. Hattoki “el klassiko” ham unga ataldi. Bu yil ko'z ko'rib, quloq eshitmagan pullarni transferga sarflab, jahonning eng ko'zga ko'ringan o'yinchilarini sotib olib kelgan Madridning “Real” klubi ham uning birgina zarbasiga dosh bera olmadi. Bu o'rinda kataloniyaliklarning transfer siyosati ham g'alaba qozondi deb aytsak to'g'ri bo'lsa kerak. Xozirda hech kim Ibrohimovichning o'rniga Samyuel Eto’O berib yuborilganini ham, buning ustiga qancha pul sarf qilinganini ham eslamay qo'ygan, ammo madridliklar amalga oshirgan bir nechta qimmatbaxo xaridlar borasidagi tortishuvlar hamon davom etib kelmoqda. Buni tabiiy hol deb qabul qilsa bo'ladi, axir “El klassiko” oqshomida Zlatan “qirollik klubi”ning birqator yulduzlari qila olmagan ishni, amalga oshira olgandi. Bu qaxramonlikdan so'ng Zlatanning obro'si yanada oshib ketganini tahmin qilib olish u qadar qiyin bo'lmasa kerak. Uning o'zi ham kataloniyada juda ham baxtli ekanligini tinmasdan ta'kidlab kelmoqda.
Xotima
Ammo bu kunlarni ham davomiy bo'ladi deb aytishga negadir iqtidorli futbolchining ichki dunyosi biroz halaqit beradigandek tuyulmoqda. Bundan biroz avval Zlatanning agenti bo'lmish Mino Rayolaning aytishiga ko'ra Ibrohimovichning doimo aytib keladigan bir gapi bor ekan. Unga ko'ra o'yinchi “Men hech qachon bitta klubning sha'nini oxiriga qadar himoya qilmayman”, - degan qoidaga amal qilar ekan. Rayola faqatgina o'yinchining mana shu fikrini davom ettirgan ko'yi Zlatanni vaqti kelib Italiyaga qaytishi mumkinligini rad qilmayapti. “Agar Zlatan oxir-oqibat “Barselona”da zerikadigan bo'lsa, Italiyaga qaytish to'g'risida o'ylab qolishi mumkin”, - deydi u italiyalik jurnalistlarning shu haqdagi savollariga javoban. Shunday ekan Zlatan haqida qanday hulosa chiqarish mumkinligini o'zingiz bir o'ylab ko'ring. U sadoqatli o'yinchilardanmi? Balkim sadoqatlidir, ammo o'ylashimizcha u faqatgina o'ziga sodiq qolishi mumkin!”
2009 yil. “Chempion” gazetasi.
Maqolani toqat bilan o'qib bo'lgan ersangiz, bu siymo o'shandan keyin yanada kattalashganini ko'rasiz. Uning PSJdagi missiyasi yuqoridagi hamma klubdagidan salobatliroq, to'g'rimi? U o'sgan va qizig'i, qariyotgan paytda o'sishdan davom etmoqda.
G'afur G'ulomning qiziq bir gapi bor: “Salobatliroq she'r yozmoqchi bo'lsang, o'tib ketgan mashhur zotlar nomidan yoz! Shunda she'r yozish mobaynida o'sha tarixiy shaxsning qiyofasiga kirasan va o'zing aytolmagan, aytishga iymangan kuchli fikrni qo'rqmasdan yozasan!”
Jahon futbolidagi Zlatan Ibrohimovich siymosini yozish jarayonida menda har doim shu holat hukmron bo'lgan negadir. Zlatan bo'lib yozgim kelavergan maqolani. Shundagina uning har bir harakatini tushungandek bo'laman. Shved o'g'lonining kimlargadir xunuk ko'ringan qiliqlari ham ma'nili ko'rina boshlagan shunda.
Zlatan siymosi deganda nimani tushunamiz? Misol uchun Balotelli. Italiyalik qora tanli hujumchi o'zini maqtashda Ibrohimovichdan qolishmaydi. Lekin hech sezganmisiz, unga bu gaplar yarashmaydi. Lekin Zlatannikini hazm qila olamiz. Bir xil so'z ikki odamning og'zidan ikki xil chiqadi gohida. Ularning mavqei shuni taqozo etadi.
Zlatanni kimdir Messi va Ronaldu asrida tug'ilib qolgani uchun ham omadsiz deydi. Bo'lmagan gap. U yashil maydonda Buffon darvozasiga gol urib yurgan paytlari Leo kichkina bola bo'lgan, Krish esa shunaqa gollar urishni orzu qilgan. Zlatanni istalgan davrga otib yuboring, u shundayligicha qolaveradi. Maradona asrida ham, Pele asrida ham. Chunki u boshqacha bo'la olmaydi, boshqacha o'ynay olmaydi.
Messining ba'zi harakatlarini Ronaldu hech qachon takrorlay olmaydi. Krishtianuning ba'zi zarbalari ham Leoga imkonsiz yumush. Lekin Zlatan shu ikkala bolaning har bir harakatini amalga oshira olgan ekan, hech sezganmisiz? Va qo'shimcha tarzda, u ikkisi hech qachon bajara olmaydigan akrobatik zarbalarni o'ynab kulib amalga oshiradi.
Zlatanning yoshini bilasiz-a? 35! Zidandek daho ham 34 yoshida o'zidagi nuqsonlarni sezgan va obro'si borida futboldan ketgan. Ibrohimovich darvozabonlargagina xos bo'lgan yoshda juda kuchli futbol ko'rsatyapti. Qarib qolgani ozgina sezilsa ham, jamoasining eng yaxshi o'yinchisi bo'lib turibdi baribir. Tottining zaxiradan tushib, nomigagina o'ynab yurgani qayoqdayu, qahramonimizning yuqori saviyali o'yin ko'rsatayotgani qayoqda? Farq katta-ya???
Zlatan “Oltin to'p”ni topshirish marosimiga “uchtalik” safida hech ham tashrif buyurmadi. Etti yil qatorasiga Messini 1-o'ringa qo'yib keldi. “Oskar”ni ham oxiri Di Kaprioga topshirdilar, oldingi filmlaridan anchayin past bo'lgan filmi uchun berishdi. E'tibor berdingizmi, hech kim qarshi bo'lmadi. Arzimaydi-ku, demadi. Chunki Leonardo bu sovringa haqliligini allaqachonlar isbotlab bo'lgandi. Ibrohimovich ham futboldagi Di Kaprio! Ketayotgan paytida unga “Oltin to'p”ni topshirishsa, menimcha, Messi va Ronaldu ham rozi bo'ladi.
Zlatanning buyukligini men internetdan uning rasmini izlayotganimda yana bir karra sezdim. Nomini yozgandim, o'ziyam 10dan ziyod liboslarda chiqib keldi. Borgan joyida etakchi bo'la olgan ekan. U yangi jamoasiga bormasidanoq etakchiga aylangan ekan, tavba! Tasavvur qilingki, qaysidir jamoa tarkibida Ronaldu, Messi va Zlatan o'ynayapti. Kim etakchi bo'lardi?!
Zlatan yaqinda futboldan ketadi. Ronaldu, nasib qilsa, yana ikki-uch yil o'ynab bersa kerak. Messi oldida kamida besh yillik faoliyat bor. Yillar o'tadi, bolalarimizga shu bugunimiz haqida hikoya qilib berganimizda, ko'pchiligimiz “Messi va Ronaldu asri” degan ta'rifni ishlatadi. Men esa Zlatanni ham qo'shaman. Hech qachon birinchi bo'la olmagan, ammo o'zini doimo birinchi deb atagan, juda ko'pchilikni ich-ichidan bu ta'rifga rozi qila olgan takrorlanmas Ibrohimovichni, albatta, qo'shib aytaman. Usiz bu davr kemtik bo'lib qolaveradi, ishonavering!
Darvoqe, Zlatanning so'nggi turda “Trua” darvozasiga urgan to'rtta golini tomosha qilib qo'ying! Ikkinchi golini anovi ikkovi ham takrorlay olmaydi! Xayrulla Hamidov
— deya xabar beradi uff.uz nashri.
Bosh sahifaga
781