Andijon viloyati Izboskan tumanidagi Chuvama qishlog'ida millionlar o'yiniga bo'lgan qiziqish o'zgacha. Qishloq ahlining shu yil avvalidan beri yoshlar o'rtasida olti marta futbol musobaqasi tashkil etgani bunga yaqqol misoldir. Turnirlarda  nafaqat Izboskan balki Paxtaobod, Andijon, Oltinko'l kabi  qo'shni tumanlar va Andijon shahri  jamoalari ham ishtirok etadi
Uchinchi o'rin va final bahsi kutilayotgan kuni turnir o'tayotgan chog'roqqina 29- umumta'lim  maktabi stadioni muxlislar bilan liq to'la edi. O'yinni tomosha qilgani mahalladagilardan tashqari, qo'shni Paxtaobod tumanidan kelgan ko'plab ishqibozlar ham stadion atrofida jamuljam bo'lib, final bahsi boshlanishini kutardilar. Turnirni uyushtirishga bosh-qosh bo'lgan asosiy  tashkilotchi, asli kasbi murabbiylik bo'lib, hozirda tadbirkorlik bilan shug'ullanayotgan jonkuyar inson - Iqboljon hoji Yunusov ekan.
- Mahallamizni haqiqiy - sportsevarlar mahallasi desam mubolag'a bo'lmasa kerak, - deydi   Iqboljon aka.   Biz har yili  bunday  musobaqalarni juda ko'p o'tkazamiz. Bugun yakuniga etadigan turnirimiz esa Navro'z umumxalq bayramiga bag'ishlab tashkil etilgan.  Yildan-yilga qo'shni tumanlardan ham  kelib ishtirok etadigan jamoalar soni ko'payib boryapti.
Bu galgi turnirda jami 12 jamoa ishtirok etib, yakunda uchinchi o'rin uchun Paxtaobodning “Bo'ston” va Izboskan tumani “Beshmirza” jamoalari kurashadigan bo'lsa finalda esa “Yuqori Chuvama” va “Ko'makay” futbolchilari g'oliblik uchun kurash olib borishadigan bo'ldi.     
Tushdan so'ng soat uchga belgilangan uchrashuv boshlanishi oldidan, yig'ilganlar oldiga mahalla fuqarolar yig'ini raisi Mahmudjon Kamolov, “No''monjon hoji” jom'e masjidi imom xatibi Esonboy Karimov mahalla oqsoqollari bilan birgalikda chiqishib, final o'yinida maydonga chiqadigan har ikki jamoaga omad tiladilar. Ayniqsa, imom-xatibning: “Bugun  barchamiz o'zimizning “Yuqori Chuvama ” jamoasi bilan qo'shni Oltinko'l tumanining “Ko'makay” yigitlariga bir xil muxlislik qilamiz, mehmonlar ranjib qolishmasin, zero sportda mahoratlilar g'alaba qozonadi” degan gaplari juda ta'sirli chiqdi.
Bizni  hayron qoldirgan jihat: ikki mingdan ziyod ishqiboz uncha-muncha oliy liga jamoalari uchrashuvida ham to'planavermaydi. Maktab stadioniga kirib kelayotgan muxlislarning esa keti uzilmas edi. Yig'ilganlar har ikki jamoaga deyarli bir xil tarzda ishqibozlik qilishar, maydonda jon-jahdi bilan o'ynayotgan futbolchilarning chiroyli harakatlarini olqishlar bilan kutib olishardi.
Tengkurashlarga boy o'tgan final uchrashuvida mehmon “Ko'makay” futbolchilari 5:4 hisobida g'alaba qozondilar.
O'yin nihoyasiga etgach, g'olib va sovrindorlarga homiylar tomonidan tayyorlangan sovg'alar topshirildi.
Andijon tomonlarga yo'lingiz tushsa, “Yuqori Chuvama” mahallasiga albatta keling,  chunki yaqin kunlarda Iqboljon aka mahalla ahli bilan yana bir musobaqa tashkil etishni rejalashtirgan. Elmurod ERMATOV, Andijon    
— deya xabar beradi uff.uz nashri.