2016 yilning 10-18 aprel kunlari Xitoyning Vuksi shahrida qilichbozlik bo'yicha Osiyo chempionati o'tkaziladi. Qit'aning eng etakchi qilichbozlari ishtirokida o'tkaziladigan ushbu chempionatda “Rio-2016” o'yinlarining yo'llanmalari ham o'ynaladi.
Osiyo chempionatida Vatanimiz sharafini Malika Hakimova (shpaga), Ruslan Kudaev (shpaga), Roman Aleksandrov (shpaga, zaxira), Gulmira Ziyaeva (rapira) va Evgeniy Konovalov (shamshir) himoya qiladilar.
Musobaqada har bir davlatdan yo'nalishlar bo'yicha bir nafardan sportchi ishtirok etadi va rapira hamda shamshirda 1-3 o'rinlarni egallaganlar, shpaga bahslarida esa faqat oltin medal sohiblari Olimpiada o'yinlari yo'llanmasiga ega bo'ladilar.
Osiyo chempionatida ishtirok etadigan sportchilarimizdan Roman Aleksandrov, Ruslan Kudaev va Malika Hakimova kuni-kecha Vengriya poytaxti Budapesht shahrida bo'lib o'tgan Gran Pri turkumiga kiruvchi yirik xalqaro turnirda ishtirok etdilar. Mazkur Gran Pri turniri ham sportchilarimiz uchun o'ziga xos tayyorgarlik bosqichi vazifasini ham o'tab berdi.
Endi terma jamoamiz a'zolari Osiyo chempionati oldidan so'nggi o'quv-mashg'ulot yig'inini Toshkent viloyatining Dukent shaharchasida joylashgan sport bazada o'tkazadilar. O'n kunlik o'quv-mashg'ulot yig'inlari nihoyasiga etgach, 8 aprel kuni terma jamoamiz a'zolari Osiyo chempionatida ishtirok etish uchun Xitoyga jo'nab ketadilar.
Ma'lumot uchun. 2012 yili London (Buyuk Britaniya)da bo'lib o'tgan XXX yozgi Olimpiada o'yinlarida qilichbozlarimizdan Ruslan Kudaev ishtirok etgan. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.