«Byankonerlar» «A» seriyasida peshqadamlik qilishmoqda va hozirdan Italiya kubogi final bahsiga xotirjam shaylanishlari mumkin. Evropa Chempionlar Ligasida esa «Yuventus»ni «Bavariya»ga qarshi o'ta muhim javob uchrashuvi kutib turibdi.
Oddiy aytganda, Turindagi 2:2 hisobidan so'ng jamoalar ertaga Myunxenda maydonga tushib, chorak finalning qimmatli yo'llanmasi taqdiriga oydinlik kiritadilar. «Yuve» ustozi Massimiliano Allegri tabiiyki, nemis grandini yo'ldan surib yuborishdan umidvor. Harqalay, u evrofutboldagi bosh sovrin uchun kurashni davom ettirmoqchi. Murabbiy shuning barobarida jamoasi oldida  boshqa maqsadlar ham borligini alohida ta'kidladi. Bular - skudetto va Italiya kubogi.
- Aytingchi, «Yuventus»  ayni payt skudetto uchun kurashda favoritmi?
 - Ozgina shoshilmay turgan ma'­qul. Ha, hozir 1-o'rinda ketyapmiz, ammo finishga hali ancha bor. Qarang, «Napoli» barchani hayratlantirishdan charchamayapti, Mauritsio Sarri hattoki, mavsumning eng yaxshi murabbiyi maqomini olishi mumkin. Qolaversa, «Roma»dan ham ehtiyot bo'lish kerak. Zero, bu jamoa chempionlikdan hali umid uzgani yo'q. Deylik, yakunda o'z ochkolarini 86taga etkazish imkoniyatiga ega. Umuman, «Roma»da yaxshigina tarkib shakllangan.
- Lekin fakt shuki, 1-o'rin aynan «Yuve» nazoratida...
- Biz ilk marta  ketma-ket 5ta skudetto yutgan jamoa sifatida tarixga kirishni xohlaymiz. Buning uchun hushyorlikni bir zum yo'qotmaslik va finish marrasigacha ijobiy natijalarga erishish talab etiladi.
- 16 mart kuni ChL nimchorak finali javob o'yinida Myunxen «Bavariya»siga qarshi maydonga tushasizlar.
- Oldimizda o'ta murakkab o'yin turgani aniq. Nemis klubi - Chempionlar Ligasi favoriti, lekin futbolda imkonsiz ishning o'zi yo'q. Har qanday holatda g'alaba qozonishimiz zarurligini yaxshi bilamiz. To'g'ri, deylik, 3:3 hisobi ham jamoamizni to'la qanoatlantiradi, ammo  Myunxenda faqat g'alabani ko'zlaymiz.
- Xo'sh, «Bavariya»ni nimaning hisobiga dog'da qoldirishinglar mumkin?
 - Birinchidan, ilk o'yinda bu raqib bilan tengma-teng raqobatlasha olishimizni isbotladik. Mabodo Myunxenda maqsadga etisholmasak, ortiqcha kuyunmaymiz. Bu holatda e'tiborimizni qatorasiga 5-skudetto va albatta, ikkinchi milliy kubokni yutishga qaratamiz.
- «Yuventus»ni navbatdagi mavsumda ham boshqarishda davom etasizmi yoki...?
- Klub bilan tuzgan shartnomam kelasi mavsumgacha mo'ljallangan.
- Demak, murabbiylik lavozimida qolishingizga  100 foiz ishonchingiz komil.
- Bu hayotda hech narsaga 100 foiz kafolat berib bo'lmaydi. Faqat shuni aytamanki, «Yuventus» rahbariyati bilan amalda kelishuvimiz bor va men bundan xursandman. Har holda, hozirgi payt o'rtamizda hech qanday muammo yo'q.
- Fikringizcha, «Yuventus» yana nimalar ustida ishlashi, qaysi jihatlar bo'yicha kuchayishi zarur?
- Taktik nuqtai nazardan barchasi joyida va bu borada yanada kuchayish shart ham emas. Ruhiy tayyorgarlikni esa  qancha yaxshilasak, shuncha soz. Zero, bu futbolda o'ta muhim jihat hisoblanadi.
Davomi InterFUTBOL gazetasi blogida.
— deya xabar beradi uff.uz nashri.