Muxlislarga yaxshi tanish bo'lgan Ilhom Abduqodirov “Navbahor” yoshlar jamoasi murabbiylar shtabida ish boshladi. Futbolchilik faoliyati davomida “Navbahor”, “Kosonsoy” kabi jamoalar darvozasini qo'riqlagan Abduqodirov endilikda yoshlar jamoasida darvozabonlar murabbiyi sifatida faoliyat yuritadigan bo'ldi.
Hozirda namanganliklar yoshlari bilan Durbek Umaraliev, Mustafo Bayramov va Sherzod Jo'raevlar ish yuritishayotgandi. Abduqodirovni murabbiylar shtabiga qo'shilishi darvozabonlar mahoratini oshirishda qo'l kelishi shubhasiz.
O'zbekiston yoshlar birinchiligida yuzaga kelgan tanaffus tufayli jamoa yoshlari qisqa muddatlik dam olishdan keyin ayni paytda mashg'ulotlarni davom ettirishmoqda. Futbolchilar oraliqda birinchi liga vakili “Kosonsoy” jamoasi bilan o'rtoqlik uchrashuvida ham maydonga tushishga ulgurishdi. Kosonsoyliklar bilan o'tgan bahsda 1:1 hisobidagi durang qayd etilgan.
Jamoa yoshlari safidan o'rin olgan Amir Ergashev, Abbos G'ulomov, Sanjar Toshpo'latov va Shohruhmirzo Ahmadalievlar birinchi liga a'zosi “Kosonsoy” jamoasiga ijaraga berildi. Ushbu futbolchilarni o'yin amaliyotiga ega bo'lishlari va mahoratlarini oshirishlari uchun murabbiylar shunday qarorga kelishgan.
— deya xabar beradi uff.uz nashri.