Davron Tursunov: “Buxoroda teng o'yinda yutqazdik”

Joriy yildan boshlab, jamoasining himoya chizig'ida asosiy figuraga aylangan futbolchihar bir bahsda boshlang'ich tarkibdan o'rin egallab kelmoqda. “Andijon” oliy liganing ortda qolgan turida “Buxoro”ga imkoniyatni boy berib, yana muxlislarini ranjitdi. Biz esa Tursunov bilan suhbatlashib, buning sabablarini bilishga urindik.

- Garchi Buxoroda yutqazgan bo'lsakda, shu kuni maydonda teng kurash kechdi. Mezbonlardan hech bir jabhada qolishganimiz yo'q. Xatto hisobni tenglashtirishga ham erishgandik. Ammo salgina omad bizdan yuz o'girdi. Ikkinchi taymning so'nggilarida tajribali Anvar Berdiev yana hisobni tenglashtirishi mumkin edi. Lekin bosh bilan yo'llangan zarbadan so'ng to'p to'singa tegib qaytdi. Aks xolda safardan kamida durang bilan qaytishimiz ham hech gap emasdi.

- Umumiy olib aytganda, bu yil jamoamizning ishtiroki juda ham qoniqarsiz o'tayotgani bor gap. Bunga sabab sifatida bilmadim nimani ko'rsatish mumkin? Nazarimda baribir omad etishmasligi pand bermoqda. Agar uydagi o'yinlarimizni o'zingiz ham kuzatib borayotgan bo'lsangiz, “Nasaf” va “Paxtakor” bilan bahslarda tengma-teng o'ynadik. Qandaydir birgina gol farqi bilan yakunda mag'lubiyatga uchramoqdamiz.

- Hozirda “Andijon”ni turnir jadvalida egallab turgan o'rni o'ziga yarashmaydi. Nasib qilsa yaqin orada autsayderlar safidan chiqib ketamiz. Har xolda shunga xarakat qilyapmiz. Oldinda yana uchrashuvlar ko'p. Biz kabi oliy ligada qolish uchun kurashayotgan “Dinamo” va “So'g'diyona”ni o'z maydonimizda qabul qilamiz. Bundan tashqari “Qizilqum” bilan ham o'zimizda o'ynaymiz. Mazkur uchrashuvlarda yutmasak bo'lmaydi. Aslida raqib kim bo'lishidan qatiy nazar har bir o'yinga faqat g'alaba uchun chiqyapmiz. O'yin borasida yutqazmayotgan bo'lsakda, natijaga kelganda ojiz qolyapmiz. 

- Davralar oralig'ida safimizga kelib qo'shilgan futbolchilar o'yinimizni kuchaytira oldi deyish mumkin. Himoyachi Iqbol Boboxonov chap qanotda katta yordam bermoqda. Abdulloh Olimov esa adashmasam markaziy himoyachi. Lekin u bungacha asosan chap qanot himoya va yarim himoyada o'ynadi. SHunga qaramay uning ham yordami tegmoqda. Oldingi chiziq vakili Anvar Berdievni esa hamma biladi qanday tajribaga ega ekanligini. Ketma-ket ikki o'yinda gol urdi. Berdiev ikkinchi davraning dastlabki uchta o'yinida ham maydonga tushganida, katta foydasi tegardi deb o'ylayman. Qolaversa birinchi davrada katta yordami tekkan Predrag Vuyovichning ham maydonga tusha olmayotgani salbiy tasirini o'tkazmasdan qolmayapti.

- Albatta, “Andijon”ning omadsiz ishtirokiga men kabi himoyachilarning ham aybi bor. Mag'lubiyatlardan so'ng ko'pincha tushkunlikka tushmasdan, o'zimni keyingi bahsga tiklashga urinyapman. Aks xolda ruhiy o'raga tushib qolsangiz, yana orqaga ketib qolishiz hech gap emas. Muhimi xatolardan to'g'ri xulosa chiqarib olishlikdir.

- Edgar Gessning istefosi? Nima deyishim mumkin, tajribali murabbiy edi. Qo'l ostidagi futbolchilarni o'yinga qanday tayyorlashni yaxshi biladi. Lekin klub rahbariyati Edgar Yakovlevichni istefoga chiqarishni lozim topibdimi, demak buni to'g'ri qabul qilamiz. Professional futbolchi har qanday murabbiy bilan ishlab keta bilish kerak.

Islombek Rustambekov suhbatlashdi.