Farg'onadagi "Istiqlol" stadioni shahar ko'rkiga ko'rk qo'shib turishi uchun qurilganmi?

Klubga avval qancha berilgandi, hozir qancha olyapti manosida malumot bergandim, Popov degan odam “lag'mon” nomli maqola yozib chiqibdi. Qo'limizda faktlarimiz bor, u nima asoslanib shunday fikrlar bildirgani qiziq bo'ldi. Hay mayli.

Farg'onada "Istiqlol" degan jamoa ham bor. U “Quvasoy tamir qurilish” tomonidan moliyalashtiriladi. Bunday klublarning ko'proq bo'lishi mamlakat futboli uchun foydali. Davlat korxonalari futbol klublarini moliyalashtirgandan ko'ra, futbolga o'z yonidan pul tikadigan sektor samaraliroq ishlaydi.

Mana shu ikki klub "Istiqlol" stadionida uy uchrashuvlarini o'tkazib kelayotgandi. Bu stadion qurilishi “Quvasoy tamir qurilish” bilan bog'liq (adashmayotgan bo'lsak, korxonaga smeta xarajatlari to'liq to'lab ulgurilmagan). Biroq endilikda Farg'ona tomoni har ikki klubni stadionga qo'ymoqchi emas. Ular stadionda to'p surishni istasa, har bir o'yin uchun 25 milliondan to'lab berishi kerak. Ko'rinishidan, "Navbahor", "Andijon" kabi klublarning ijara pulini to'lab to'p surgani rahbariyatga yoqib tushgan.

Savollarimiz bor. Bizda futbol stadionlari o'zi nima uchun qurilgan? Biror sanatkor koncert qo'yishi, qaysidir organ jangovor tayyorgarlik mashg'ulotlari o'tkazishi uchunmi yoki futbol o'ynash uchun? To'g'ri, klub o'z balansida bo'lmagan stadion uchun ijara puli to'lashi kerak. Bu uning muxlislar bilan ishlashi, chiptalardan pul ishlash uchun mehnat qilishiga olib kelishi mumkin. Lekin nega bu talab yil avvalida emas, may oyining so'nggi o'n kunligida qo'yilmoqda? Klublar o'z smetasiga bu harajatlarni kiritmagan-ku.

SHundoq ham so'lib borayotgan "Neftchi" klubini yanada jarga itarish kerak bo'lsa, u holda Farg'ona futboli to'g'ri yo'lda. Futbolga o'z yonidan pul tikayotgan sektorni yanada ko'proq boshi berk ko'chalarda sarson qilish kerak bo'lsa, u holda ham to'g'ri yo'ldamiz.

P.S. "Neftchi" klubi o'z bazasiga chiqib ketdi, "Istiqlol" Marxamat tumanidan (Andijon viloyati) maydon izlab yuribdi. Farg'onadagi bosh stadion esa shahar ko'rkiga ko'rk qo'shib turibdi, - deb yozadi PFL bosh direktori maslahatchisi Diyor Imomxo'jaev telegramdagi o'z kanalida.