Jumladan, bugun yaqin o'tmishning taniqli darvozabonlaridan biri Georgiy Zabirov o'z tavallud ayyomini nishonlamoqda. U bugun 45 yoshga to'ldi. Zabirov 1974 yilning 1 iyun kuni Toshkent viloyatining CHirchiq shahrida dunyoga kelgan. Futbolchilik faoliyatini "CHirchiq" jamoasida boshlagan Georgiy keyinchalik "Paxtakor", "Binokor", MHSK, "Kimyogar", "Neftchi", "Navbahor" va "Andijon" klublari sharafini himoya qilgan. 2000-2002 yillar oralig'ida O'zbekiston milliy terma jamoasi tarkibida maydonga tushgan. Eng gullagan davri 1996-2004 yillar oralig'iga to'g'ri keladi. Zabirov aynan shu yillarda shonli "Neftchi" safida o'ynagan. 2001 yil O'zbekiston chempioni bo'lgan. U "Neftchi" tarkibida 204 uchrashuvda maydonga tushib, o'z darvozasidan 171 ta gol o'tkazib yuborgan.
"Neftchi" safidagi ishonchli o'yinlari sabab 2000 yilda milliy terma jamoadan chaqiruv oladi va Osiyo Kubogi-2000da maydonga tushadi. Lekin xuddi terma jamoamizda bo'lgani kabi ishtirok omadsiz chiqqan. Georgiy Zabirov 2006 yilda professional futbolchilik faoliyatini yakunlagan. U 1996, 1997, 1998, 1999, 2000, 2002, 2003 va 2004 yillarda O'zbekiston vice-chempioni bo'lgan. 1997, 1998, 2001 va 2002 yillarda esa O'zbekiston kubogining finalida o'ynagan.
Fursatdan foydalanib, bugun tavallud ayyomini nishonlayotgan Georgiy Zabirovni saytimiz ijodiy guruhi hamda o'quvchilari nomidan muborakbod etamiz.
SHuningdek, bugun yana bir esda qolarli sana. 1955 yilning 1 iyun kuni jonkuyar murabbiy Mahmud Rahimov dunyoga kelgan. Agar Mahmud aka hayot bo'lganlarida bugun 64 yoshga to'lardilar. SHavqatsiz o'lim murabbiylikda mashhurlik cho'qqisiga chiqib kelayotgan Mahmud Rahimovni oramizdan erta olib ketdi. 1999 yilning 24 dekabr kuni milliy terma jamoamizning o'sha paytdagi bosh murabbiyi mudhish avtohalokat sabab bu dunyoni tark etdi.
Yodingizda bo'lsa, Mahmud Rahimov bosh murabbiyligidagi O'zbekiston milliy terma jamoasi 1999 yili Osiyo Kubogi-2000 saralash bahslarini ko'tarinki kayfiyatda o'tkazib, yakunda final bosqich yo'llanmasini qo'lga kiritgandi. Mamlakatimizning bosh jamoasi Rahimov qo'l ostida jami 7 ta o'yin o'tkazgan. Oltita uchrashuvda g'alaba va bir o'yinda mag'lubiyat qayd etilgan. Yagona mag'lubiyat Tailand (0:1) terma jamoasidan qabul qilingan. Abu-Dabida o'tgan saralashda ketma-ket 4 ta g'alaba qo'lga kiritilgan. Mag'lub etilgan orasida mezbonlar ham bor edi. Mirjalol Qosimovning ajoyib uzatmasidan so'ng Maksim SHackixning BAA darvozasini qanday ishg'ol qilgani kechagidek yodimizda. Ushbu g'alaba terma jamoamizni Osiyo Kubogi-2000 final bosqichiga olib chiqqandi. Mahmud Rahimov muvaffaqiyatli kechgan BAAdagi o'yinlardan bir oycha o'tib, avtohalokatga uchraydi. Osiyo Futbol konfederaciyasi vafotidan so'ng Mahmud Rahimovni 1999 yilning "Eng yaxshi murabbiyi" deb elon qiladi.
Ulug' kunlarda Mahmud Rahimovni esga oldik. Oxiratingiz obod bo'lsin, Mahmud aka.
Bosh sahifaga
175