SHunday qilib O'zbekiston terma jamoasi "D" guruhida Saudiya Arabistoni, Falastin, Yaman va Singapurga qarshi bahs olib boradi. Guruhdagi asosiy raqibimiz Saudiya Arabistoni. Guruhda birinchi o'rinni egallash uchun aynan shu jamoa bilan kurash olib boramiz.
Ikkinchi o'rinni olib ham guruhdan chiqish mumkin, faqat buning uchun ko'rsatkichlar ancha yaxshi bo'lishi kerak. Guruhda birinchi o'rinni egallash to'g'ridan-to'g'ri saralashning uchinchi raundiga yo'l ochadi.
Saudiya Arabistoniga qarshi shu paytgacha 10 marta o'ynaganmiz. Bu jamoa haqida ko'p malumotga egamiz. Guruhdagi eng asosiy raqib yil boshidan beri qanday kunlarni boshdan kechirdi? Quyida shu haqda to'xtalamiz.
1 yanvar, 2019. Saudiya Arabistoni Osiyo Kubogi oldidan Janubiy Koreyaga qarshi o'rtoqlik uchrashuvini o'tkazdi. Bu o'yin 0:0 hisobida yakun topdi.
8 yanvar, 2019. Saudiya Arabistoni Osiyo Kubogidagi ishtirokini yirik g'alaba bilan boshladi. Saudiya Arabistoni - KXDR 4:0. SHu kuni Hattan Sultan Babhir, Muhammad Al Fatil, Salim Al Dovsari va Fahad Al Muvallad tomonidan kiritilgan gollar yirik g'alabani taqdim etdi.
12 yanvar, 2019. Saudiya Arabistoni Osiyo Kubogi 2-turida Livan bilan to'qnash keldi va 2:0 hisobida g'alaba qozondi. Gollar: Fahad Al Muvallad bilan Hussayn Al Mogahvi.
17 yanvar, 2019. Saudiya Arabistoni Osiyo Kubogi 3-turida Qatarga qarshi maydonga tushib, 0:2 hisobida imkoniyatni boy berdi. Saudiyaliklar ikkinchi o'rin bilan guruhdan chiqishdi.
21 yanvar, 2019. Osiyo Kubogi nimchorak final Yaponiya - Saudiya Arabistoni uchrashuvi bo'lib o'tdi. Ravshan Ermatov boshqargan bahsda saudiyaliklar 0:1 hisobida engilib, shu tariqa musobaqani tark etishdi.
22 yanvar, 2019. Saudiya Arabistoni terma jamoasi bosh murabbiyi Xuan Antonio Picci Osiyo Kubogidagi qoniqarsiz natija sabab istefoga chiqarildi.
21 mart, 2019. Saudiya Arabistoni o'rtoqlik uchrashuvida BAA terma jamoasiga 1:2 hisobida mag'lub bo'ldi.
25 mart, 2019. Saudiya Arabistoni terma jamoasi Ekvatorial Gvineya bilan o'rtoqlik bahsida 3:2 hisobida g'alabaga erishdi. Har ikkala o'yinda jamoani mahalliy murabbiy Yusef Anbar boshqardi.
25 martdan beri Saudiya Arabistoni terma jamoasi boshqa yig'ilgani yo'q. Jamoaga yangi bosh murabbiy ham tayinlanmagan. Katta ehtimol bilan navbatdagi murabbiy yana xorijlik bo'ladi. Hozircha jamoani Yusef Anbar boshqarib turibdi.
29 may kuni terma jamoaga oid yana bir yangilik ro'y berdi. "Al Ittihod" hujumchisi Fahad Al Muvallad doping sabab bir yilga futboldan chetlatildi.
Bosh sahifaga
205