Kecha terma jamoa yig'inidan suratlarni etiboringizga havola etgan edik. Bugun esa bosh murabbiy Bahodir Ahmedovning fikrlarini o'qishingiz mumkin.
- Nima uchun ushbu yig'inga asosan yoshlar chaqirildi?
- Asosiy o'yinchilarimizning ko'pchiligi AGMK bilan birga klublar o'rtasidagi Osiyo chempionatiga (7-17 avgustda Tailand poytaxti Bangkokda o'tkaziladi) tayyorgarlik ko'rishmoqda. SHu sabab, ularga ruhsat berganmiz. Davom etayotgan chempionatimiz davomidagi kuzatuvlarimiz natijasida o'zini ko'rsatib kelayotgan yosh futzalchilarni yig'inga taklif qilib, ularga yordam berishga va shu orqali terma jamoa kelajagi uchun qisman bo'lsa-da poydevor qo'yishga harakat qilayapmiz. Bu yoshlar asosiy yigitlar qaytguncha o'yin sxemamizga moslashib olishadi.
- AGMK tarkibida bo'lmagan tajribali o'yinchilarimizchi? Masalan: Artur Yunusov, Farhod Abdumavlonov, Konstantin Sviridov...
- Ularning hammasi umumiy qaydnomamizda bor, Osiyo chempionati saralashigacha ular albatta chaqiriladi. SHunchaki, hozir yoshlarni tezroq tarbiyalashga va terma jamoa havosiga ko'niktirishga harakat qilayapmiz. Ayni paytda yig'inda bo'lgan yigitlar ichida hali tayyor bo'lib ulgurmaganlari ham bor. Lekin, yigitlar ko'rsatgan narsalarimizni tez ilg'ab olishmoqda va bu narsa bizni xursand qilmoqda.
- Terma jamoa ayni paytda qanday uslub asosida tayyorgarlik ko'rmoqda? Xose Mariya Mendez uslubi va yo'li davom ettirilmoqdami?
- Mendezning g'oyalarini davom ettirayapmiz. U bilan doim aloqada bo'lib turamiz, yaqindagina bizga yangicha mashq uslublari va sxemalarni berdi. Mendez istalgan masalada bizdan yordamini ayamaydi va muntazam aloqada bo'lib turadi.
- Futzal bo'yicha ichki chempionatimizning eski formatga qaytgani murabbiy sifatida sizga qay darajada qulaylik tug'dirmoqda?
- Eski formatga qaytilgani jamoalarga moliyaviy tomonlama yaxshi bo'ldik. CHunki, o'tgan mavsum oxirida jamoalar moddiy muammolar sabab safardagi o'yinlarga borolmagan vaziyatlar ham bo'lgandi. O'z navbatida, oldingi holatga qaytilgani murabbiy sifatida menga ham qulay. Sababi, kun davomida barcha o'yinlarni va futzalchilarni kuzatib o'tirish imkonim bor. Klublar ham raqiblari bahsini tomosha qilib, ularni o'rganib o'tirishlari mumkin. Bir so'z bilan aytganda, eski formatga qaytilgani yaxshi bo'ldi, bu hamma uchun qulay.
Bosh sahifaga
199