Musobaqaning 1/8 finalida Saudiya Arabistonidan 4ta, Qatardan 2ta, BAA va Erondan bittadan jamoa o'ynaydi. Hozirda ushbu jamoalar yangi mavsumga tayyorgarlikni davom ettirishyapti.
1/8 final o'yinlari:
5 avgust. "Al Nasr" (Saudiya Arabistoni) - "Al Vahda" (BAA)
5 avgust. "Al Ittihod" (Saudiya Arabistoni) - "Zobahan" (Eron)
6 avgust. "Al Duhayl" (Qatar) - "Al Sadd" (Qatar)
6 avgust. "Al Ahli" (Saudiya Arabistoni) - "Al Hilol" (Saudiya Arabistoni)
Javob bahslari 12-13 avgustda o'tkaziladi.
Quyida 5 avgust kuni OCHL nimchorak finalida o'ynaydigan jamoalar yozda amalga oshirgan transferlar haqida to'xtalamiz.
"Al Nasr" (Saudiya Arabistoni)
Saudiya Arabistonining amaldagi chempioni yozda shov-shuvli transferni amalga oshirmadi. Faqat jamoaning asosiy hujumchisi Abdurazzoq Hamdallah bilan yangi uch yillik shartnoma tuzildi. Malumot uchun, marokashlik hujumchi 2018/2019 yilgi mavsum Saudiya Proligasida 34ta gol urishga muvaffaq bo'ldi. "Al Nasr" bosh murabbiyi Rui Vitoria fikricha, legionerlardan darvozabon Bred Jons, himoyachi Maykon, yarim himoyachi Juliano va hujumchi Abdurazzoq Hamdallahdan ko'ngil to'q.
"Al Vahda" (BAA)
BAAning "Al Vahda" klubini tajribali murabbiy Xenk ten Kate boshqarib kelayotgandi, lekin ichki chempionatdagi natijalar sabab klub rahbariyati uni ishdan bo'shatdi va o'rniga Maurise Steynni tayinladi. Jamoa yozda "Al Hilol"dan urugvaylik futbolchi Nikolas Milesini qo'lga kiritdi. SHuningdek, Murad Batna ham jamoani tark etib, o'rniga Xalil Ibrohim olib kelindi.
"Al Ittihod" (Saudiya Arabistoni)
"Al Ittihod" ustozi Xose Luis Sierraning ishongan futbolchilari baribir Mettyu Yurman bilan Ahmed Assiri bo'lib qolaveradi. SHunga qaramay, yangi o'yinchi Luis Ximenesdan umid katta. Bu futbolchi o'z vaqtida "Inter", "Lacio" va "Vest Xem"da o'ynagan. OCHL guruh bosqichida 3ta gol urgan Romarino ham klubda qoldi. CHililik futbolchi Karlos Vilyanueva ham katta hajmdagi ishni bajarishini unutmaylik.
"Zobahan" (Eron)
OCHL 1/8 finalda o'ynaydigan Erondan yagona jamoa "Zobahan" ushbu yozda bir nechta o'yinchilari bilan xayrlashdi. Darvozabon Muhammad Rashid Mazaheri "Traktorsozi" safiga o'tib ketdi. Uning o'rniga "Padideh" klubidan Yusef Behzadi taklif qilindi. SHuningdek, nigeriyalik futbolchi Kristian Osaguona Janubiy Koreyaning "Jeju Yunayted" klubi bilan shartnoma tuzdi. "Zobahan" yozda ikki nafar boshqa nigeriyalik futbolchi bilan o'z tarkibini to'ldirib oldi: Ebiabovey Baker va Makuley Krisantus.
P.S. 6 avgust kuni o'ynaydigan klublar amalga oshirgan transferlar borasida keyinroq to'xtalamiz.
Bosh sahifaga
167