Malumki, saralashning ushbu bosqichida 40ta jamoa qatnashadi. Jamoalar beshtadan 8 guruhga bo'lingan. Guruh g'oliblari hamda eng yaxshi to'rtta ikkinchi o'rin egasi keyingi bosqichga yo'l olish bilan birga Osiyo Kubogi-2023 yo'llanmasini ham qo'lga kiritadi.
Quyida "D" guruhi jamoalariga to'xtatib o'tamiz. Bu guruhda Saudiya Arabistoni, O'zbekiston, Falastin, Yaman va Singapur o'zaro bahs olib boradi.
SAUDIYA ARABISTONI
FIFA reytingidagi o'rni: 68
Osiyo Kubogidagi eng yaxshi natijasi: CHempion (1984, 1988, 1996)
Jahon chempionatidagi eng yaxshi natijasi: 1/8 final (1994)
Bosh murabbiy: Erve Renar (Franciya)
Saudiya Arabistoni JCH-2022 saralash bahslarini yangi murabbiy qo'l ostida o'tkazadi. CHunki iyul oyidan bu jamoani Erve Renar qabul qilib oldi. Franciyalik mutaxassis bungacha Afrikada faoliyat yuritib keldi va Osiyoda birinchi bor o'zini sinab ko'radi. Malumot uchun, Erve Renar 2012 yil Zambiya va oradan uch yil o'tib Kot-D'Ivuar terma jamoasi bilan Afrika Millatlar Kubogida oltin medallarni qo'lga kiritgan.
O'ZBEKISTON
FIFA reytingidagi o'rni: 84
Osiyo Kubogidagi eng yaxshi natijasi: 4-o'rin (2011)
Jahon chempionatidagi eng yaxshi natijasi: Hali chiqmagan
Bosh murabbiy: Ektor Kuper (Argentina)
Terma jamoamiz har gal jahon chempionatiga yaqin keladi-yu, biroq hal qiluvchi pallada doim nimadir etishmay qoladi. Futbolchilarimiz bu safar Ektor Kuper qo'l ostida manzil sari yo'lga chiqishadi. 28 yillik tanaffusdan so'ng Misr terma jamoasini jahon chempionatiga olib chiqqan argentinalik murabbiydan muxlislarimizning umidi katta.
FALASTIN
FIFA reytingidagi o'rni: 102
Osiyo Kubogidagi eng yaxshi natijasi: Guruh bosqichi (2015, 2019)
Jahon chempionatidagi eng yaxshi natijasi: Hali chiqmagan
Bosh murabbiy: Nuriddin Ould Ali (Jazoir)
O'zbekiston terma jamoasi saralash bosqichini bugun Falastinga qarshi bahs bilan boshlaydi. Jazoirlik murabbiy jamoani kuchaytirishga harakat qilmoqda. Nuriddin Ould Ali asosiy maqsad ketma-ket uchinchi marta Osiyo Kubogiga yo'l olish ekanini aytib o'tdi. Bu esa guruhdan birinchi yo ikkinchi o'rin bilan chiqishni maqsad qilyapti degani.
YAMAN
FIFA reytingidagi o'rni: 142
Osiyo Kubogidagi eng yaxshi natijasi: Guruh bosqichi (2019)
Jahon chempionatidagi eng yaxshi natijasi: Hali chiqmagan
Bosh murabbiy: Samsi Hasan Al Nash (Yaman)
Yaman termasini mahalliy murabbiy boshqarmoqda. Bu jamoa yaqinda o'tkazilgan G'arbiy Osiyo chempionatida Suriya bilan 1:1 o'ynab hammani hayron qoldirdi. O'z tarixida birinchi bor shu yil Osiyo Kubogida o'ynagan yamanliklar ham iliq taassurot qoldirishga harakat qilishadi.
SINGAPUR
FIFA reytingidagi o'rni: 162
Osiyo Kubogidagi eng yaxshi natijasi: Guruh bosqichi (1984)
Jahon chempionatidagi eng yaxshi natijasi: Hali chiqmagan
Bosh murabbiy: Tatsuma Yoshida (Yaponiya)
Yaponiyalik murabbiy Tatsuma Yoshida qo'l ostida Singapur terma jamoasi yaxshi o'yin ko'rsatish istagida. Singapur 1984 yildan beri Osiyo Kubogida qatnashmay kelmoqda, bu esa terma jamoa futbolchilarini yanada ruhlantirishi aniq.
Sentyabr oyida bo'ladigan o'yinlar:
1-tur. 5 sentyabr
Falastin - O'zbekiston
Singapur - Yaman
2-tur. 10 sentyabr
Yaman - Saudiya Arabistoni
Singapur - Falastin
Bosh sahifaga
226