Temurxo'ja Abduxoliqov O'zbekiston chempionatining mohir hujumchilaridan biri. U mehnat qilishdan tolmaydi va doim oldinga intiladi. SHuni aytish lozim, Abduxoliqov Xorvatiya chempionatida to'p tepgan dastlabki o'zbekistonlik futbolchi hisoblanadi.
Faoliyatini "Bunyodkor-2" safida boshlagan Temurxo'ja 2011 yil "Paxtakor"ga borib 2013 yil oxirigacha shu klub sharafini himoya qiladi. 2014 yil esa Xorvatiyaga yo'l olib, "Xayduk" bilan shartnoma imzolaydi. Ammo Abduxoliqovning Evropadagi faoliyati yorqin kechmaydi.
SHundan so'ng hujumchi O'zbekistonga qaytib 2015 yil "Lokomotiv" safiga kelib qo'shiladi. Aytish mumkinki, hozirgacha Temurxo'janing eng yorqin damlari "Lokomotiv"da kechgan va kechmoqda. Ayniqsa 2016 yilgi mavsum uning uchun unutilmas hisoblanadi. CHunki aynan shu yili 22ta gol bilan O'zbekiston chempionati to'purariga aylanadi. Bundan tashqari "Lokomotiv"ning Osiyo chempionlar ligasi chorak finaliga qadar etib borishida munosib hissa qo'shadi.
Temurxo'ja Abduxoliqov uch bor O'zbekiston chempionligini qo'lga kiritgan. Bir marta "Paxtakor" safida (2012) va ikki bor "Lokomotiv" tarkibida (2016, 2018). SHuningdek ikki bor O'zbekiston Kubogida zafar quchgan (2011, 2016). 2015 va 2019 yillarda esa O'zbekiston Superkubogini ham qo'lga kiritgan.
Temurxo'ja 2016 yil "Lokomotiv" safidagi yorqin o'yinlari tufayli qatarliklar etiborini tortadi va 2017 yilning boshida Sanjar SHoahmedov bilan birgalikda Qatarga yo'l olib, "Al Sayliya" bilan shartnoma imzolaydi. Uning arab mamlakatidagi faoliyati ham esda qolarli bo'lgan deb bemalol ayta olamiz. "Al Sayliya" tarkibida 32 uchrashuvda maydonga tushgan hujumchi 17 bor gol urishga muvaffaq bo'ladi.
Hozirgi paytga kelib uning O'zbekiston klublari va milliy terma jamoada kiritgan gollari 98taga etgan. Yana ikkita goldan so'ng Temurxo'ja Abduxoliqov ham Gennadiy Krasnickiy nomidagi to'purarlar klubi azosiga aylanadi. Biz mohir hujumchiga tezroq ikkita gol urib 100lik marrani zabt etishini tilab qolamiz.
"Lokomotiv" PFK matbuot xizmati.
Bosh sahifaga
286