SHu munosabat bilan biz futbolchi bilan suhbatlashdik.
- Faoliyatingiz davomida birinchi marta O'zbekiston milliy terma jamoasiga taklif etildingiz. Buni eshitib nimalarni his qildingiz?
- Birinchi navbatda bundan xursand bo'ldim. Mehnatlarim besamar ketmayotganini his qildim. Terma jamoaga qo'limdan kelganicha yordam beraman. Klubdagilar ham ilk bor terma jamoaga chaqiruv olganimdan so'ng meni tabriklashdi.
- Ro'ziqul Berdiev terma jamoaga chaqirilgach qandaydir maslahatlar berdimi?
- Menga alohida hali maslahat bermadilar. Ammo yig'ilishlarda doim terma jamoaga chaqirilgan futbolchilarga boringlarni berib o'ynanglar, terma jamoaga yordam beringlar deb tayinlaydilar.
- Terma jamoa markaziy himoyasida raqobat haqida qanday fikrdasiz? To'g'ri Anzur Ismoilov terma jamoadan ketdi. Ammo sizdan tashqari Egor Krimec, Islom To'xtaxo'jaev, Rustam Ashurmatov, Doston Tursunov kabi futbolchilar ham bor.
- Terma jamoa bo'lganidan keyin eng kuchlilar chaqiriladi. SHu bois raqobat bo'lishi aniq. Futbolchilar mashg'ulotlarda ishlashadi, murabbiylar esa kim o'sha payt yaxshi tayyor bo'lsa o'shani maydonga tushirishadi.
- Vadim Abramovning o'yin uslubidagi qaysi jihatlar ko'proq yoqadi?
- O'zbek futbolchilariga va muxlislariga to'p bilan o'yin yoqadi. Buni rad qilib bo'lmaydi. To'p bilan o'ynash o'zbek futboliga ham mos deb o'ylayman.
- "Nasaf" Superligada so'nggi turlarda omadsiz natijalar qayd etmoqda. Bunga nima sabab bo'lmoqda?
- Bu narsani ko'p o'ylayman. Tarkibimizda yosh futbolchilar juda ko'p, bundan tashqari ko'plab futbolchilar milliy va olimpiya terma jamoasi yig'inlariga borib kelishmoqda. Masalan, sentyabr oyidagi FIFA kunlari vaqtida shaxsan men 3-4 kun dam oldim. Termaga chaqirilganlar esa umuman dam olishmadi. Futbolchi baribir dam olib turishi kerak. CHarchab qolgan futbolchilar o'zining eng yaxshi o'yinini namoyish eta olmaydi.
Tolibjon Qosimov suhbatlashdi
Bosh sahifaga
171