Ammo bu vaqtincha va tez orada nomdor mutaxassis jamoa "ruli"ga keladi.
"Bavariya" Niko Kovach bilan rasman xayrlashdi. "Ayntraxt"dan qabul qilib olingan 1:5 hisobidagi mag'lubiyat - kechirib bo'lmas xato. Ammo 48 yoshli xorvatiyalik o'rnini kim egallashi mumkin? "Bavariya"ning talablari katta va hamma ham bu joyga munosib emas.
Hozir jamoani vaqtincha Xans-Diter Flik boshqarmoqda, rahbariyat esa navbatdagi murabbiy haqida bosh qotirmoqda. Biz ham o'ylab ko'ramiz.
5. Xulen Lopetegi
2018 yil "Real"dan ketgan Xulen Lopetegi vaqtini bekor o'tkazmadi va "Sevilya" ustoziga aylandi. Hozir uning shogirdlari LaLiga jadvalida 5-o'rinni egallab turibdi, ammo etakchilar ham uzoqda emas.
Lopetegi futbolchilari 12ta uchrashuvning bor-yo'g'i 3tasida mag'lub bo'ldi. Uning nomzodi o'tgan yili ko'rib chiqilgandi, ammo nemislar xorvatga ishonch bildirishdi.
Xulen Lopetegi - nemis grandiga mos murabbiy. Bitta savol bor: Murabbiy bunday masuliyatga tayyormi?
4. Erik ten Xag
Erik ten Xag "Bavariya" bilan yaxshi tanish - u bir paytlar nemis grandi yoshlarini boshqargan. 2017 yildan beri "Ayaks"da ishlayotgan mutaxassis 2019 yilda "Villem II"ni mag'lub etib, Gollandiya Kubogini qo'lga kiritdi. Bu uning klubdagi dastlabki sovriniga aylandi. O'n kun o'tib amsterdamliklar chempionat g'olibiga aylanishdi.
Gollandiyalik mutaxassis "Alyanc-Arena"ga ehtimoliy qaytish imkoniyatiga "bormayman" degani yo'q, ammo "Ayaks" mavsum o'rtasida o'z ustozini qo'yib yuborarmikan?
3. Maurisio Pochettino
"The Guardian" nashrining yozishicha, Kovach o'rniga asosiy nomzod Pochettino ekan. Yozda "shporlar" o'z ustozini hech kimga bermaydigandek tuyilgandi, biroq hozir londonliklarning turnir jadvalidagi o'rniga etibor bersangiz, Maurisio ketishiga ishona boshlaysiz.
"Tottenxem"ning ishlari yaxshi emas, ular CHempionlar ligasida aynan "Bavariya"dan yirik (2:7) hisobda mag'lubiyatni qabul qilib olishdi. Argentinalik mutaxassis London klubida qo'lidan kelganini qilib bo'ldi. Balki o'zgarishlar unga yordam berar?
2. Massimiliano Allegri
"Yuventus"ni tark etgan Allegri hali ham ishsiz. Unga ko'pchilik davogarlik qildi, ammo aynan hozir "Bavariya" favoritdek ko'rinmoqda. Biz besh karra Italiya chempioni va CHempionlar ligasi finalchisi haqida gapiryapmiz. Allegri oldiga katta maqsadlarni qo'ygan yirik klubni qanday boshqarishni yaxshi biladi.
Boshqalardan farqli o'laroq, italiyalikning saviyasiga shubha bilan qaralmaydi. Biroq bazi kamchiliklar mavjud. U nemis tilini bilmaydi va Bundesligani tushunmaydi. Bu muhim emasdek ko'rinishi mumkin, ammo Uli Xyoness va Karl-Xaync Rummeniggelar nemis tilini biladigan mutaxassis kerakligi haqida gapirishdi.
1. Joze Mourinyu
Dunyoning mashhur va ko'p sovrin yutgan murabbiylaridan biri - Joze Mourinyu bir yildan beri ishsiz. Bu vaqt ichida uni turli klublarga yuborishdi: Masalan, "Arsenal"ga. Ammo MYU sobiq ustozi yangi jamoa borasida shoshilmoqchi emas.
Portugaliyalik aktivida Ispaniya, Angliya, Italiya va Portugaliya oltin medallari bor. Mourinyu nemis tilini o'rganmoqda. Taxminlarga ko'ra, Joze o'z rezyumesiga yana bir top chempionatdagi oltin medalni qo'shib qo'ymoqchi.
Bosh sahifaga
331