O'zbekiston Respublikasi Prezidenti SH.Mirziyoev tomonidan ilgari surilgan 5 ta ijobiy tashabbus ijrosi bo'yicha oliy talim muassasalari professor-o'qituvchilari va talaba-yoshlarini jismoniy tarbiya va ommaviy sportga keng jalb etish choralarini kuchaytirish maqsadida “Sport – salomatlik garovi” shiori ostida respublikamizning barcha oliy talim muassasalari professor-o'qituvchilari o'rtasida 2019-2020 o'quv yilida sportning 5 turi - mini futbol, voleybol, shaxmat, stol tennisi va badminton bo'yicha “Do'stlik spartakiadasi” musobaqalari o'tkazish yo'lga qo'yildi.
Ommaviy sport va sog'lomlashtirish ishlarini yanada takomillashtirish, professor-o'qituvchilar va xodimlar salomatligini mustahkamlash hamda ularning jismoniy tarbiya va sport bilan muntazam shug'ullanishini kundalik turmush tarziga aylantirish maqsadida uyushtirilayotgan mazkur musobaqaning mini futbol bo'yicha respublika final bosqichi Xorazm viloyati jismoniy tarbiya va sport boshqarmasi tasarrufidagi Urganch ixtisoslashtirilgan olimpiya zaxiralari maktab-internatining sport bazasida bo'lib o'tdi.
Unda Qoraqalpog'iston respublikasi, Toshkent shahri va barcha viloyatlardan tashrif buyurgan 14 ta jamoa mini futbolchilari o'z mahoratlarini namoyish etishdi.
Yakuniy natijalarga ko'ra, Toshkent shahrining professor-o'qituvchilaridan iborat jamoa g'oliblikni qo'lga kiritdi. Ikkinchi o'rindan Toshkent viloyati vakillari joy olishdi. Faxrli uchinchi o'rin Xorazm viloyati pedagoglar jamoasiga nasib etdi.
G'olib va sovrindor jamoalarga O'zbekiston Respublikasi Oliy va o'rta maxsus talim vazirligining diplomlari, medallar hamda qimmatbaho sovg'alari bilan taqdirlanishdi.
Ikrom XUDOYBERGANOV, Urganch shahridan.
Bosh sahifaga
333