Yangi mavsumning dastlabki xorij yig'inini Abu Dabida o'tkazayotgan "Loko" futbolchilari bugun ham ikki mahal mashg'ulot o'tkazishdi. Ertalabki mashg'ulot to'liq maydonda kechgan bo'lsa, tushdan keyin futbolchilarimiz dastlab trenajyor zalida shug'ullanishdi. Mavsumlar oralig'ida trenajyorda shug'ullanish muhim ahamiyat kasb etadi. Bu ayniqsa har bir o'yinchining jismoniy holatini bir maromda ushlab turishda katta yordam beradi. SHu bois jamoamiz murabbiylari jismoniy mashqlarga alohida etibor qaratishyapti.
So'ngra hamma futbol maydoniga yo'l oldi. Darvozabonlar bilan odatdagidek Petr Gizimchuk ishlagan bo'lsa, maydondagi o'yinchilar bilan Andrey Fyodorov (bosh murabbiy), Andrey Miklyaev (katta murabbiy) va Aleksandr SHatskix (jismoniy tayyorgarlik bo'yicha murabbiy) ishlashdi.
Eslatib o'tamiz, yangi mavsum "Loko" uchun 21 yanvardan boshlanadi. SHu kuni "temiryo'lchilar" o'z uylarida Osiyo chempionlar ligasi pley-off bosqichi doirasida Tojikistonning "Istiqlol" klubini qabul qilishadi.