Musobaqada ishtirok etadigan O'zbekiston Olimpiya terma jamoasi esa ertaga Eronga qarshi bahs bilan chempionatdagi ishtirokini boshlaydi. Bugun musobaqadan avval matbuot-anjumani bo'lib o'tdi. Unda terma jamoamiz ustozi Lyubinko Drulovich va guruhdagi boshqa jamoalar murabbiylari ishtirok etishdi.
Lyubinko Drulovich (O'zbekiston): “S” guruhi juda ham qiyin kvartet bo'ldi. To'rtala jamoada ham imkoniyat bir xil. Biz ham uchrashuvga munosib tayyorgarlik ko'rdik. Oldinda bizni Eronga qarshi uchrashuv kutib turibdi. Bu o'yinga hozir bor etiborimiz qaratilgan. Ushbu bahsdan so'ng qolgan o'yinlar haqida o'ylaymiz.
– Avvalo, O'zbekiston terma jamoasiga omad tilayman. Tayyorgarlik doirasida mahalliy iqlim va oziq-ovqatiga moslashishda muammo bo'lmadimi? SHuningdek, tarkibda Oston Urunov yo'qligiga qanday izoh ayta olasiz?
– Savol va omad tilaganingiz uchun rahmat. Har bir o'yin oson o'tadi deya olmayman. Birinchi bor Tailanddamiz. SHaroitdan noliydigan joyimiz yo'q. Bizga barcha sharoitlarni yaratib berishgan. Ayni paytda tanlagan futbolchilarim Olimpiya yoshidagi eng kuchlilaridir. Hozir tarkibda yo'q o'yinchilar haqida gapirish biroz noo'rin deb o'ylayman. Biz musobaqaga tayyormiz. Nasib qilsa, har bir o'yinda chiroyli va yaxshi o'yin ko'rsatishga harakat qilamiz.
Xak-Bum Kim (Korea): Musobaqa davomida juda ham qiyin uchrashuvlar kutib turibdi. Barcha jamoalar o'ziga yarasha kuchli jihatga ega. Har bir bahs o'ziga yarasha qiyin o'tadi. Biz ham eng sara futbolchilarimizni tanlab keldik va barcha o'yinda bor kuchimizni ishga solamiz.
Vei Xao (Xitoy): Jamoamiz yaxshi tayyorgarlik ko'rdi. Tashkilotchilar barcha sharoitlarni yaratib bergan. Biz musobaqa davomida barcha bor kuchimizni ishga solamiz.
Hamid Estili (Eron): Mezbonlarga va tashkiliy qo'mitaga rahmat aytib qolmoqchiman. Guruhdagi qolgan 3 jamoaga o'z hurmatimni bildirib qolaman. Guruhimizda kuchli jamoalar jam bo'lgan. FIFA taqvimi yig'in va o'rtoqlik uchrashuvlarini ko'ngildagidek o'tkazishimizga biroz halal berdi. SHunday bo'lsa ham biz musobaqada yaxshi natija ko'rsatishga umid qilamiz. O'zbekiston terma jamoasini yaxshi bilamiz. Ular bilan 2 bor o'rtoqlik uchrashini o'tkazdik. O'yinchilarim musobaqaga tayyorgarlik jarayonida qattiq mehnat qilishdi. Doim birinchi o'yin qiyin bo'ladi. SHu bois ertanggi O'zbekistonga qarshi o'yin ham oson kechmaydi.
Bosh sahifaga
243