"Paxtakor" - "Andijon": o'yin haqida malumotlar

25-milliy chempionatimizni jamoamiz Toshkentda "Andijon"ga qarshi uchrashuv bilan boshlaydi. O'yinga doir turli malumotlarni etiboringizga havola etamiz.

Tayyorgarlik

Jamoamiz joriy mavsumda 3 rasmiy bellashuvda maydonga tushdi. Ar-Riyoddan qaytib kelingach, juma kunidan mashg'ulotlar odatiy tartibda o'tkazila boshlandi. "Andijon" esa yangi murabbiy Baxtiyor Ashurmatov qo'l ostida asosan Toshkentda yig'in o'tkazdi. Tarkibda bir qator o'zgarishlar kuzatildi. Raqibning nimalarga qodir ekanini bellashuv ko'rsatib beradi.

Qarama-qarshilik

Hozirgacha jamoalar oliy ligada 44 bor to'qnash kelishgan. Ularning 33tasida "Paxtakor" g'alaba qozongan. 8 bahsda durang qayd etilib, 3 bor andijonliklar zafar quchishgan. 110 to'p kiritgan "sherlar" 31 bor raqibdan to'p o'tkazib yuborishgan. Toshkentdagi 22 o'yinning 19tasida g'olib bo'lgan "Paxtakor" 3 bor raqib bilan durangga imzo chekkan. Safarda "Andijon" oxirgi marta 2010 yil ochko olgan. O'shanda 0:0 hisobi qayd etilgan. O'tgan mavsumda jamoamiz uyda 6:0, safarda 1:0 hisobida zafar quchgan.

Uchrashuv rasmiylari

O'yinni Murod Muhammedov boshchiligidagi hakamlar guruhi boshqaradi. Muhammedov shu paytgacha oliy ligada jamoamiz ishtirokidagi 6 o'yinda ishlagan. Ularning 5tasida "Paxtakor" zafar quchib, bir bor imkoniyatni boy bergan. 2014 yil u ushbu jamoalar ishtirokidagi bellashuvni boshqarib borgan va o'shanda "sherlar" 2:0 hisobida g'alaba qozongan.

"PAXTAKOR" - "ANDIJON"

Hakamlar: Murod Muhamedov (Toshkent viloyati), Doniyor Saylolov (Toshkent), Aleksandr Sidorov (Toshkent),  Ravshan Kopadze (Farg'ona).

Nazoratchi:  Dmitriy Roman (Toshkent).

PFL vakili: Ahrol Inoyatov (Toshkent).

CHiptalar

O'yinga chiptalar "Paxtakor" stadioni kassalarida uchrashuv kuni sotuvga chiqariladi. Narxlar 5 va 15 ming so'mdan belgilangan.

"Paxtakor" va "Andijon" jamoalari o'rtasidagi bahs 7 mart, dushanba kuni soat 17:30da "Paxtakor" stadionida boshlanadi. Yoshlar tarkiblari yakshanba kuni soat 16:00da Qibrayda bahsni boshlashadi. Mavsumdagi birinchi uy o'yiniga barcha ishqibozlarni taklif etib qolamiz.