Avalgi yillarga qaraganda bu mavsumda asosiy tarkibda debyut qilgan yosh futbolchilar soni ko'payganini ko'rishimiz mumkin. Dilshod Komilov, Asadbek Ergashev, Toxir Rafaelov, va hokazo. Bugungi suhbatdoshimiz iqtidorli futbolchi, "Lokomotiv" klubi tarbiyalanuvchilaridan biri Javohir Alijonov ham astoydil mehnat qilgan holda sekin-asta boshlang'ich tarkibdan o'rin olib kelmoqda. Yaqinda ushbu futbolchi bilan intervyu tashkil qilib bevosita yaqindan tanishish bilan bir qatorda o'zimizni qiziqtirgan ayrim savollarga ham javob oldik.
Futbolga kirib kelishi
Millionlar o'yiniga "Paxtakor" jamoasi orqali kirib kelganman. O'shanda taniqli yoshlar murabbiyi Timur Olimxo'jaev qo'l ostida shug'ullanganman. Lekin, ayrim sabablarga ko'ra taqdir taqozosi bilan Toshkentning boshqa bir jamoasi "Lokomotiv"ga o'tdim va Alisher Bozorov ustozligidagi jamoaga qabul qilindim. 2018 yilgi mavsumda o'rinbosarlar jamoasida debyutimni o'tkazdim, bu mavsumdan etiboran asosiy tarkibga jalb qilinib kelmoqdaman. Birinchi poziciyam hujumchi bo'lgan. Umuman olganda "Lokomotiv" Superligadagi eng kuchli jamoalardan biri sanaladi. SHuningdek bu erda ajoyib oila bor.
Bolalikdagi kumirlari va havas qilgan futbolchisi
Bolaligimda braziliyalik afsungar Ronaldinoning o'yinlariga qiziqishim yuqori bo'lgan, uning "Barselona", "Milan"dagi ajoyib va aqlbovar qilmas harakatlariga havas qilardim. O'zimizdan esa Jaloliddin Masharipovning qanotlardagi reydlari, fintlarini, to'p bilan muomalar qilishlarini ko'rib kuzatib borardim.
Futbolchi bo'lishdan maqsad nima?
Asosiy maqsadim o'zbek futbolini jahonga tanitish, kelajakda Evropaning top besh chempionatlarida to'p tepishni istayman. SHuningdek, har bir futbolchining maqsadi bo'lganidek O'zbekiston milliy terma jamoasi bilan Jahon chempionatiga yo'llanmani qo'lga kiritish. Buning uchun qattiq mehnat qilish kerakligini tushunaman.
O'rinbosarlar safidagi chempionlik
"Lokomotiv" o'rinbosarlari o'z tarixida ilk bor chempionlikni qo'lga kiritdi. SHu bois chempionlikgacha bosib o'tilgan yo'ldagi voqealar, taassurotlar esda qolarli bo'ldi. Bunda o'zimning oz bo'lsada hissamni qo'shganimdan xursandman.
O'zining poziciyasidagi eng kuchli uch futbolchi
Bu borada fikr bildiradigan bo'lsam, Jaloliddin Masharipov, Diyor Turopov va Doston Hamdamovlarni aytishim mumkin.
O'tgan o'yinlarda nima etishmayotgan edi?
Masalan, "Qo'qon-1912" bilan o'yinda g'alabaga juda yaqin kelgandik. Ko'p uchrashuvlarda g'alabaga bo'lgan ishonch etishmayapti deyishim mumkin. Gol o'tkazib yuborganimizdan keyin o'zimizga kelishimiz qiyin bo'lmoqda. Bu esa kamchiliklarimizdan biri hisoblanadi. O'zimizga kelib olishimiz uchun bizga vaqt kerak. Hozirda futbolchilarning har birini jamoadagi o'rni bor. Barcha jamoalarda avlodlar almashinuvi jarayonida pasayish va ko'tarilish davri bo'ladi. Bizda ham shu jarayon ketmoqda.
Hojiakbar Alijonov bilan bir jamoada to'p tepish qanday bo'larkin?
Akam bilan bir klubda to'p tepish yoqadi. Agarda bir-birimizga qarshi maydonga chiqadigan bo'lsak juda havotir bo'ladi. Ammo, maydonga chiqqanimizdan keyin barcha hissiyotlarni unutishimiz kerak. Bo'lmasa akam ham, men ham o'z o'yinimizni ko'rsata olmaymiz. Albatta, ular doim xato va kamchiliklarimni aytib to'g'ri yo'l ko'rsatib turadilar. Hattoki, bir-birimizga qarshi o'ynasak ham.
Abdulaziz Iskandarov suhbatlashdi.
Bosh sahifaga
434