Malumki, shu yilning 14-31 oktyabr kunlari O'zbekistonda U-19 Osiyo chempionatini o'tkazish belgilab qo'yilgandi. Musobaqa "Bunyodkor", "Lokomotiv", AGMK va "Navbahor" stadionlarida bo'lib o'tishi lozim edi. Biroq koronavirus pandemiyasi sabab OFK musobaqani bu yil o'tkazmaslikni lozim topdi.
Bu o'rinda eng katta muammo xalqaro reyslarning to'liq tiklanmagani bo'lib turibdi. SHu bois OFK vaziyatdan kelib chiqqan holda maqul yo'lni tanlab musobaqani qoldirdi. Lekin bu U-19 Osiyo chempionati mezbonligi O'zbekistondan olib qo'yildi degani emas, faqat kelasi yil yoshlar o'rtasidagi jahon chempionati bo'lib o'tishini inobatga olsak, balki bizdan olib qo'yilishi ham mumkin.
Gap shundaki, U-20 jahon chempionati 2021 yil 20 may - 12 iyun oralig'ida Indoneziyada bo'lib o'tishi FIFA taqvimida belgilab qo'yilgan. Va musobaqani hozircha hech kim bekor qilgani yo'q. Agar Indoneziyadagi kichik mundial o'z vaqtida o'tkaziladi deb hisoblasak, unda U-19 Osiyo chempionatini mundialga kamida ikki oy vaqt qolganida o'tkazib olish lozim bo'ladi.
Fakt shuki, yanvar-fevral oylarida biz musobaqani o'tkaza olmaymiz. Birinchidan, ob-havo masalasi, ikkinchidan stadionlar tayyor bo'lmaydi. Aytaylik, martning ikkinchi yarmida o'tkazsa bo'ladi. Lekin bu paytga kelib balki jahon chempionati-2022 saralash o'yinlari qo'yilishi mumkin. Aprelda o'tkazaylik desak unda biroz kech bo'ladi, chunki 20 maygacha hech qancha vaqt qolmaydi.
SHundan kelib chiqib U-19 Osiyo chempionatini yanvar yoki fevralda ham o'tkazsa bo'ladi, faqat buning uchun mezbonlikni G'arb yoki SHarq davlatlaridan biriga berishga to'g'ri keladi. Bir tomondan shunday bo'lgani ham maquldir, chunki U-19 Osiyo chempionati har ikki yilda o'tishini hisobga olib balki keyingi musobaqa mezbonligini olsak, ungacha hammasi iziga tushib ketar.
X.Xoliqov.
Bosh sahifaga
240