Hamidjon Aktamov: "Bahraynda qozonilgan yirik hisobdagi g'alaba tarixdan joy oldi"

Bahrayn futbolchilariga qarshi o'tadigan oxirgi o'yin oldidan mutaxassislar fikri qanday? Bu haqda “Qizilqum” futbol klubi bosh menejeri Hamidjon Aktamov nima deydi?

- Avvalo bugungi o'yin oldidan terma jamoa murabbiylar shtabi va barcha futbolchilarimizga omad tilayman, - deydi Hamidjon G'ulomovich. - O'zbekiston terma jamoasining guruh uchrashuvlarini peshqadam sifati yakunlayotgani barchamizni quvontiradi. Futbolchilarimiz o'z guruhida turli saviyadagi raqiblarga qarshi chiroyli o'yinlar ko'rsatib xalqimizni xursand qildi.

Bahraynda qozonilgan yirik hisobdagi g'alaba tarixdan joy oldi. Bugun bahraynliklar ana shu mag'lubiyat alamini olishga urinishlarini taxmin qilish qiyin emas. Raqib jamoani taniqli futbolchi va murabbiy boshqarishini hisobga olsak, muxlislarni Toshkentda shiddatli o'yin kutib turibdi. Keyingi bosqich masalasini deyarli hal qilib bo'lgan terma jamoamiz murabbiylari balki bu uchrashuvda anchadan beri boshlang'ich tarkibdan joy olmay kelayotgan o'yinchilarga imkoniyat berishar?! CHunki hal qiluvchi saralash bosqichida bunaqa imkon boshqa bo'lmaydi. Nima bo'lganda ham o'z muxlislar qarshisida maydonga tushadigan hamyurtlarimiz g'alabasiga bugun ishonch bilan qarayman va yana bir bor futbolchilarimizga omadlar tilayman.