Video  Asror Aliqulov: "Futbolchi bahona qilib, to'liq kuch bilan o'ynamasa o'sishga erisha olmaydi"

Keskin kurashlar ostida kechgan uchrashuvda tomonlar 2:2 hisobida durang natijaga imzo chekishdi. Uchrashuvdan so'ng mezbonlar bosh murabbiyi Asror Aliqulov fikrlari bilan o'rtoqlashdi.

"O'yin og'ir kechishini bilgan edik. "Dinamo" jamoasi zich himoyalanishini, bo'ydor futbolchilarga ega ekanligini ularni o'rgani jarayonida ko'rib chiqdik. Uzun to'p oshirishlar orqali hujum tashkil qilishini bilardik. Raqib yaratgan havfli vaziyatlarning aksariyati standart vaziyat va uzun to'p oshirishlardan so'ng yuzaga keldi. O'yin haqida gapiradigan bo'lsam, zich himoyani yorib o'tishda mahorat va tezlik muhim rol o'ynaydi. SHu tomondan birinchi bo'limda qiynaldik. Samarqand jamoasi bizni qarshi hujumlarga o'tishimizga yo'l qo'ymadi. Hisobda ortda borayotib etib olishga harakat qildik. Futbolchilarimdan mamnunman. Birinchi davrani birinchi o'rinda tugatishga erishdik deb o'ylayman.

Yil boshida tarkib yig'ishda shoshma-shosharlik qildik. Qisqa vaqt ichida jamoani shakllantirishimiz kerak edi. Biz taklif qilayotgan maoshlarga, takliflarga aksariyat futbolchilar ko'nishmaydi. Imkon darajasida tarkibni jamladik. Taqiqi bo'lmaganida yozgi transferlar oynasi vaqtida jamoamizni kuchaytirish niyatimiz bor edi. Endi ixtiyorimizdagi bor futbolchilar bilan mavsumni yakunlaymiz.

Klub futbolchilar oldidagi maoshlarni to'lab bergan, faqat mukofot pullarini ozgina uzulish bor. Muhimi futbolchilardagi ishtiyoq yo'qolmasligi kerak. Futbolni sevib o'ynash lozim. CHetdagi muammolar maydondagi futbolchilarga tasir qilmasligi kerak. Turli narsalarni bahona qilib maydonda bor kuchi bilan o'ynamasa futbolchi sifatida o'sishga erishib bo'lmaydi.

Futbolchilarga biror jamoadan qo'rqmaslikni aytamiz. Ha, raqib safidagi Obid Jo'raboev, Eldor Boymatovlarni imkoniyatini yaxshi bilardik. Futbolchilardan tezlik bilan harakat qilishni, himoya va hujum o'rtasidagi bog'liqlikni ushlashni talab qilamiz. Agarda tezlik bo'lsa, futbolchi tayyorgarlikni maromida olib borsa qo'rqish ikkinchi darajali bo'lib qoladi.

Superligaga chiqishga ishonamanmi? Qo'l ostimdagi futbolchilarimga ishonaman. Tarkibimizda Pro liga saviyasidagi futbolchilar bor, ularni tayyorlab borishimiz kerak. Qaysidir vaziyatlarda o'zlarini yo'qotib qo'yishmoqda. Bo'sh joylarni boshqa futbolchi bilan yopishga majbur bo'lmoqdamiz",- deydi Asror Aliqulov.