Tojo Minoru biz uchun qanchalik omadli hakam?
/ Kiritdi: BestMaster O'qilgan: 1514
8 oktyabr kungi Bahrayn va O'zbekiston o'rtasidagi o'yinni yaponiyalik Tojo Minoru boshchiligidagi hakamlar boshqarishadi.
Ushbu hakamning O'zbekiston terma jamoalari va klublari ishtirokidagi qaysi o'yinlarida ishlaganini yodingizga solamiz.
2008 yil Toshkentda o'smirlar o'rtasidagi Osiyo chempionati bo'lib o'tgandi. O'shanda Robert Gay boshchiligidagi o'smirlarimiz guruh bosqichida Eronga 1:2 hisobida yutqazib qo'yishgandi. O'sha musobaqada Eron chempion bo'lgandi, vakillarimiz esa chorak finalda to'xtashgandi.
2010 yil Guanchjouda bo'lib o'tgan Osiyo o'yinlarida Ahmad Ubaydullaev boshchiligidagi O'zbekiston olimpiya terma jamoasi guruh bosqichida BAAga 0:3 hisobida yutqazgandi. CHorak finalda esa Janubiy Koreya 3:1 hisobida taslim qilingandi. Mana shu o'yinlarda Minoru boshchiligidagi hakamlar ishlashgan.
2012 yil Ahmadjon Musaev boshchiligidagi O'zbekiston yoshlar terma jamoasi BAAdagi Osiyo chempionatini Vetnamga qarshi o'yin bilan boshlagan. Yaponiyalik hakam boshqargan o'yinda vakillarimiz 4:0 hisobida zafar quchishgan. O'sha musobaqada O'zbekiston yarim finalga qadar etib borgandi.
Ushbu hakam ishlagan yana bir o'yin butun O'zbekiston uchun eng alamli o'yin sifatida tarixda qolgan. 2013 yilning 11 iyun sanasida Mirjalol Qosimov boshchiligidagi O'zbekiston milliy terma jamoasi Seulda Janubiy Koreya terma jamoasi mehmoni bo'lgan. JCH-2014 saralashi doirasidagi bahsda O'zbekiston alamli avtogol tufayli mag'lub bo'lgandi - 0:1.
Minoru "Paxtakor"ning OCHLdagi uchta o'yinida ishlagan. 2010 yil guruh bosqichida "sherlar" o'z maydonlarida Saudiya Arabistonining "Al SHabab" klubiga 1:3 hisobida yutqazishgandi. 2011 yil Toshkentda "Al Nasr" bilan durang o'ynalgan 2:2 va 2012 yil Jiddada "Al Ittihod" mehmoni bo'lib 0:4 hisobida mag'lub bo'lingan o'yinlarda ham mana shu hakam ishlagandi.
Minoru boshqargan yana bir o'yin 2012 yilda "Nasaf" va Eroning "Istiqlol" klubi o'rtasida bo'lib o'tgan. Qarshida o'tgan bahsda "ajdarlar" imkoniyatni boy berib qo'yishgandi - 0:2.
Bu hakam "Lokomotiv" ishtirokidagi bitta o'yinda ishlagan. 2014 yil OCHL pley-offida "temiryo'lchilar" Quvaytning "Quvayt SK" klubiga 1:3 hisobida yutqazib qo'ygandi.
Narzulla Saydullaev
Bosh sahifaga
165