Ro'ziqul Berdiev «Nasaf»ning OChL guruh bosqichiga o'tish o'yinidagi raqibi kuchiga baho berdi
/ Kiritdi: BestMaster O'qilgan: 968
Osiyo Chempionlar Ligasi–2017 turniri o'tish bosqichida Qarshining «Nasaf» jamoasi Bahraynning «Al-Hidd» klubiga qarshi bahs olib boradi. Bo'lajak o'yin oldidan tashkil etilgan matbuot anjumanida qarshiliklar jamoasi ustozi Ro'ziqul Berdiev va himoyachi Sherzod A'zamov o'z fikrlari bilan o'rtoqlashdi.
«Mavsumning birinchi o'yini barchada qiziqish uyg'otishi aniq. Asosiy vazifamiz g'alaba qozonib, muxlislarni xursand qilishdan iborat. Tayyorgarlik yaxshi o'tdi va OChL guruh bosqichiga chiqishga harakat qilamiz. «Al-Hidd» kuchsiz jamoa emas, ular Bahrayn chempioni va Kubok sohibi sanaladi. Jamoa yangi bosh murabbiyga ega bo'ldi. Ular tartibli va sifatli o'yin ko'rsatadi. O'yin oson bo'lmasligi aniq. Raqib o'yinini tahlil qilganimizda, ular himoyada yaxshi o'ynashini ko'rdik. Tarkib borasida to'xtaladigan bo'lsam, posbonimiz Eldor Suyunov ertangi o'yinga tayyor emas. U yig'in doirasida jarohat oldi. Kecha mashg'ulotlarda qatnashganiga qaramay, u «Al-Hidd»ga qarshi o'yinni o'tkazib yuboradi», – degan Ro'ziqul Berdiev.
«Ertangi o'yinga tayyorgarlik yaxshi o'tdi. O'rtoqlik o'yinlarida yaxshi natija ko'rsatdik, lekin bo'lajak o'yin bundan farq qiladi. Maydonda bor kuchimizni berib, keyingi bosqichga yo'l olishga intilamiz. Muxlislar daldasiga umid qilib qolamiz», – deya fikr bildirgan Sherzod A'zamov.
Eslatib o'tamiz, «Nasaf» – «Al-Hidd»uchrashuvi ertaga, 31 yanvar kuni Toshkentdagi «Bunyodkor» stadionida soat 16:00 da boshlanadi.
Bosh sahifaga
196
14 Mart 2022, 20:56