Ro'ziqul Berdiev OChL pley-offidagi navbatdagi raqibni o'rganishni boshladi

Osiyo Chempionlar Ligasi–2017 turnirining o'tish bosqichida «Nasaf» jamoasi Bahraynning «Al-Hidd» klubini 4:0 hisobida mag'lubiyatga uchratdi. O'yindan keyin tashkil etilgan matbuot anjumanining ikkinchi qismida qarshiliklar bosh murabbiyi Ro'ziqul Berdiev ishtirok etdi.

«Bugungi muvaffaqiyat bilan barcha muxlislarni tabriklayman. Uchrashuv davomida futbolchilarda hayajon sezilib turdi, ammo eng muhimi «Nasaf» g'alaba qozondi. Raqib darvozasiga urilgan dastlabki ikki gol ularga salbiy ta'sir o'tkazdi va bu bizning foydamizga hal bo'ldi. Pley-off bosqichidagi raqibimiz – «Al-Fotih»ni ham o'rganib chiqyapmiz, bu jamoa o'ziga yarasha kuchli. So'nggi paytlarda ularning natijasi yaxshi bo'lmasa-da, bu «Nasaf» uchun oson bo'ladi, degani emas. Akmal Shorahmedovga keladigan bo'lsak, u Shuhrat Muhammadiev o'rnini bilintirmadi. Akmal ishonchimizni to'liq oqladi. U biz uchun to'g'ri keladigan haqiqiy professional ekanini isbotladi», – dedi Ro'ziqul Berdiev.  

Eslatib o'tamiz, mazkur g'alabadan keyin «Nasaf» jamoasi pley-off bosqichiga yo'l oldi. Ro'ziqul Berdiev shogirdlari guruh bosqichi yo'llanmasi uchun 7 fevral kuni safarda Saudiya Arabistonining «Al-Fotih» klubiga qarshi kuch sinashadi.

Teglar: roziqul, berdiev, ochl, pley-offidagi, navbatdagi, raqibni, organishni, boshladi,
← OldingaOrqaga →