«Real» «Selta»ga qarshi o'yin qoldirilganidan norozi bo'ldi va tahdid qildi
/ Kiritdi: BestMaster O'qilgan: 1466
«Real» 5 fevral kuni Ispaniya chempionatining 21-turi doirasida «Selta»ga qarshi o'tkazilishi kerak bo'lgan uchrashuv boshqa kunga qoldirilganidan norozi bo'ldi. Bu haqda AS xabar tarqatdi.
Uchrashuv Ispaniya Professional futbol ligasi tomonidan Galisiyadagi noqulay ob-havo sharoiti tufayli qoldirilgandi. Kuchli dovul tufayli vigoliklar jamoasi uy o'yinlarini o'tkazadigan «Balaydos» stadioni tomi uchib ketgan va tribunaning bir qismi yopilgandi. Undan oldinroq shu sababli «Deportivo» – «Betis» uchrashuvi qoldirilgandi.
«Real» jamoasi prezidenti Florentino Peres o'yinning qoldirilganidan norozi bo'lgan va Evropa superligasiga o'tib ketish bilan tahdid qilgan. Bunday ligani tashkil qilish masalasi bir necha bor muhokama qilingan, mavsumlar oralig'ida o'tkazila boshlangan International Champions Cup turniri bunday ligaga tayyorgarlik ko'rish sifatida qaraladi.
O'tgan yili Angliyaning «Arsenal», «Liverpul», «Manchester Yunayted», «Manchester Siti», «Chelsi» kabi grand klublari rahbarlari amerikalik milliarder Stiven Ross bilan uchrashib, Chempionlar Ligasi yoki Angliya Premer-ligasi o'rnini bosishi mumkin bo'lgan yangi musobaqaga asos solish masalasini muhokama qilgandi.
Bu tashabbusni ayniqsa «Bavariya» jamoasi boshqaruv kengashi raisi, Evropa klublari assotsiatsiyasi prezidenti Karl-Xaynts Rummenigge qizg'in qo'llab-quvvatlaydi.
Yangi musobaqaga asos solish g'oyasi ilk bor 1998 yilda paydo bo'lgandi. O'shanda Italiya sport kompaniyalaridan biri — Media Partners Evropaning etakchi jamoalari bilan muzokaralar o'tkazgan, ular orasida «Milan», «Manchester Yunayted» kabi mashhur jamoalar ham bor edi. FIFA bu taklifga darhol o'z e'tirozini bildirib, musobaqaga qo'shilgan milliy uyushmalar, klublar va futbolchilarni diskvalifikatsiya qilish bilan tahdid qilgandi.
UEFA esa bu hodisaga Chempionlar Ligasi guruh bosqichi ishtirokchilari sonini 24 tadan 32 tagacha ko'paytirish, shuningdek, qit'ada ikkinchi raqamli klublar musobaqasi — Evropa Ligasi (sobiq UEFA Kubogi)ga asos solish bilan munosabat bildirgan.
01_darvozabon 
Bosh sahifaga
238
18 Mart 2022, 18:12