Suares Enrikening natijasini takrorladi

"Barselona" hujumchisi Luis Suares Ispaniya chempionatining 22-turida mehmonda "Alaves"ga qarshi uchrashuvda dubl amalga oshirib, kataloniyaliklar uchun 128 ta o'yinda 109 ta gol urdi. Uchrashuv "Barsa"ning 0:6 hisobidagi g'alabasi bilan yakunlandi. 

Shu tariqa, 30 yoshli urugvaylik futbolchi katalon klubi uchun kiritgan gollari miqdori bo'yicha jamoaning bosh murabbiyi Luis Enrike bilan tenglashib oldi va bu borada undan o'zib ketishi muqarrar. Enrike "Barsa" uchun 1996 yildan 2004 yilgacha to'p surgan va 300 ta o'yin o'tkazgan. Endi adashlar klub tarixidagi eng yaxshi to'purarlar ro'yxatida 13-o'rinni bo'lishishmoqda. 1-o'rinni esa hamon Lionel Messi egallamoqda. Uning hisobida 485 ta gol bor va bu natija hali-beri yangilanmasa kerak.

Suares "Barsa"ga "Liverpul"dan 2014 yilda kelgan. Futbolchi joriy chempionatda 19 ta o'yinda 18 ta gol va 7 ta golli pas amalga oshirdi.

Teglar: suares, enrikening, natijasini, takrorladi,
← OldingaOrqaga →