"Metallurg" - "Buxoro" o'yinidan keyingi murabbiylar fikrlari

 Jamshid Saidov, “Buxoro” FK bosh murabbiyi: - “Buxoro” uchun ortga chekinishga yo'l yo'q. Biz har bitta o'yinimizga oxirgi uchrashuvimiz singari maydonga tushayapmiz va maydonning har bir qarichi uchun kurashayapmiz. Oldingi turda “Navbahor”ga qarshi uchrashuvda shogirdlarim 7-8 ta yuz foizlik gollik imkoniyatlarni ko'kka sovurishgandi. Bekobodda ham o'yin qiyin bo'lishini bilib kelgandik. Ammo bu erda yaratilgan imkoniyatlardan unumli foydalanganligimiz uchun Yaratganga shukur qilaman. Oliy ligada jon saqlab qolish umidi yana oshdi. To'g'ri, barcha masala Jizzaxda “So'g'diyona”ga qarshi o'zaro o'yinda hal bo'lishi kutilmoqda. Lekin bu futbol. Oldinda ikkita o'yin turibdi. Ehtimol hammasi bizning foydamizga o'zgarib ketar. Buni judayam hohlagan bo'lardik.
 
SHavkat Saidov, “Metallurg” FK jamoa boshlig'i: Jamoamiz omadsizlik girdobidan chiqib ketolmayapti. O'tgan turdagi alamli mag'lubiyatdan keyin bugun o'yinchilarning oyog'iga og'ir tosh bog'lab qo'yilgandek harakat qilishdi. Uchrashuv boshidayoq gol o'tkazib yuborganligimiz esa ishimizni yanada og'irlashtirdi. Katta kuch sarflab, ustunlikni o'z tomonimizga og'dirib olgandik. Hisobni tenglashtirdik ham. Lekin ikkinchi taymda yana bir qator yaratilgan imkoniyatlardan foydalana olmadik. Oqibatda sen gol urmasang, senga urishadi degan ibora yana o'z isbotini topdi. Hali yana ikkita tur bor. Hech bo'lmasa hozirgi mavqeimizni saqlab qolish uchun kurashishimiz lozim.