Toshkent viloyati futbolchilari - "Yashil maydon malikalari"
/ Kiritdi: BestMaster O'qilgan: 713
O'tgan haftada mamlakatimizning to'rt shahrida uchinchi marotaba tashkillashtirilgan ayollar o'rtasidagi “Yashil maydon malikalari” ananaviy turnirining mintaqaviy bosqich o'yinlari bo'lib o'tdi.
Unda quyidagi mintaqadagi jamoalar g'oliblikni qo'lga kiritishib, yarim final yo'llanmalariga sazovor bo'lishdi:
Sirdaryo viloyati mintaqasida ishtirok etgan Jizzax, Toshkent viloyatlari, Toshkent shahri hamda mezbonlar o'rtasida kechgan bahslarda omad poytaxt viloyati vakillariga kulib boqdi.
Farg'ona mintaqasida vodiy vakillari o'zaro kuch sinashishdi, bosh sovrin esa namanganliklarga nasib etdi.
Qashqadaryo mintaqasida mezbonlar, Samarqand va Surxondaryo vakillari kurash olib borishdi, naoiyliklar sababsiz musobaqaga kelishmadi. Samarqand jamoasi g'olib bo'ldi.
Xorazm mintaqasiga qo'shni Buxoro viloyati delegaciyasi etib kelmadi. Mezbonlar hamda qoraqalpog'istonliklarning o'zaro bahsida maydon egalariga “devorlari” yordam berib yubordi.
24-26 sentyabr kunlari Namangan shahrida ushbu musobaqaning final o'yinlari tashkil etildi. Unda bosh sovrinni Ilya Klikunov ustozligidagi Toshkent viloyati qizlari qo'lga kiritishdi. Ikkinchi o'rin Ibragim Belyakov bosh murabbiyligidagi Samarqand viloyati vakillariga, uchinchi o'rin esa Karima Yo'ldosheva boshchiligidagi mezbonlarga nasib etdi.
Turnirning “Eng yaxshi...”lariga atalgan sovg'alar quyidagi o'yinchilarga topshirildi:
Eng yaxshi darvozabon – Intizor Ibrohimova (Samarqand)
Eng yaxshi himoyachi – Dilnoza Utamova (Xorzam)
Eng yaxshi hujumchi – Yodgora Razzoqova (Namangan)
Turnir to'purari – Sadoqat Ilashova (Toshkent viloyati).
Eslatib o'tamiz, turnirning 2015 yilgi mavsumida Toshkent viloyati, o'tgan yili esa surxondaryolik futbolchi qizlar bosh sovrinni qo'lga kiritishgan.
Oybek Yunusov
Bosh sahifaga
176