"Lokomotiv" chempionlik sari dadil odimlamoqda va buni hech kim inkor eta olmaydi. Katta ehtimol bilan "temiryo'lchilar" bu mavsum ham bosh sovrinni o'zlarida saqlab qolishadi. Bugungi o'yin ham "Loko" uchun muhim ahamiyatga ega, chunki g'alaba maydon egalarini chempionlik sari yana bir qadam yaqinlashtiradi.
Bu o'yin "Loko" uchun ikkinchi davra hisobidan o'z maydonidagi beshinchi uchrashuv bo'ladi. Jamoa avvalgi to'rtta bahsning ikkitasida zafar quchib, bir bor durang o'ynagan va bir marta yutqazib qo'ygan. "Lokomotiv" uyda "Navbahor" va "SHo'rtan"dan ustun kelgan, "Mashal" bilan durang o'ynagan bo'lsa, "Paxtakor"dan mag'lub bo'lgan.
Bilasizmi? "Lokomotiv" ketma-ket oxirgi uch uchrashuvni g'alaba bilan yakunladi. Jamoa "Paxtakor"ga imkoniyatni boy berganidan so'ng "Obod", "Navbahor" va "Qizilqum"dan ustun keldi.
Fakt: "Lokomotiv" oxirgi ikkita uchrashuvda gol o'tkazgani yo'q, buning ustiga jamoa raqiblar darvozasiga to'rtta to'p kiritdi.
"Qo'qon-1912" haqida gapiradigan bo'lsak, bu jamoa birinchi davrada ancha sermahsul o'yin namoyish etayotgandi. SHunday bo'ldiki, qo'qonliklar qatorasiga 11ta bellashuvda mag'lub bo'lishmadi. Ammo ikkinchi davrada jamoa unchalik o'zini ko'rsata olmayapti. "Qo'qon-1912" ikkinchi davrada 10ta uchrashuvda maydonga tushib, shundan to'rttasida g'alabaga erishdi.
Bilasizmi? "Qo'qon-1912" ikkinchi davradagi g'alabalarini uydagi o'yinlarda qo'lga kiritdi. Jamoa Qo'qonda "Obod", "Neftchi", "SHo'rtan" va "Navbahor" klublaridan ustun keldi.
Fakt: "Qo'qon-1912" safar uchrashuvlarida so'nggi bor 8-turda g'alaba qozongan. O'shanda No'mon Hasanov shogirdlari G'uzorda "SHo'rtan"ni 3:2 hisobida mag'lub etib qaytishgandi. SHundan keyin jamoa safarda 8ta o'yin o'tkazgan bo'lsa, boshqa g'alaba qozongani yo'q.
Bosh sahifaga
168