Bugun esa klubning o'zi uchun nisbatan oson bo'lgan raqiblari TOP-5 ligini etiboringizga havola etamiz.
5. "Atlaschi". 2 o'yin. 1 g'alaba, 1 durang. To'plar nisbati 4:2
"Orol" 1994 yilgi mavsumda "Atlaschi" jamoasi bilan 2 marta uchrashgan. Marg'ilondagi bellashuvda 2:2 hisobi qayd etilgan bo'lsa, Nukusdagi bahsda 2:0 hisobida mezbonlarning qo'li baland kelgan. SHu tariqa "Atlaschi" jamoasi Oliy liga doirasida "Orol"ni yuta olmagan ikkita jamoaning biriga aylandi. O'sha mavsumda "Orol" 15-o'rinni egallab Birinchi ligaga tushib ketgan bo'lsa, "Atlaschi" 13-pog'onani band etgan.
4. "Yangier". 6 o'yin. 3 g'alaba, 3 mag'lubiyat. To'plar nisbati 5:9
"Orol" 1992-1994 yillar davomida "Yangier" bilan 6 marta o'zaro raqib bo'lgan. Har ikkala jamoa ham o'z maydonidagi o'yinlarda g'alaba nashidasini surgan. Jamoalarning o'yinlarida faqatgina bir marta yirik hisob qayd etilgan. 1993 yili Yangierliklar 3:0 hisobida ustun kelishgan.
3. "Kimyogar". 4 o'yin. 2 g'alaba, 1 durang, 1 mag'lubiyat. To'plar nisbati 4:5
"Turon" jamoasi 2000-2001 yilgi mavsumlarda Nukusdagi bellashuvlarda "Kimyogar"ni mag'lub etgan bo'lsa, mehmondagi ikki o'yinda bir marta ochko bilan qaytgan. 2001 yili CHirchiqliklar Nukuslik raqiblarini 3:0 hisobida taslim etishgan. Nukusdagi bahslarda esa minimal hisoblar qayd etilgan.
2. "Metallurg". 4 o'yin. 2 g'alaba, 1 durang, 1 mag'lubiyat. To'plar nisbati 4:2
"Metallurg" jamoasi 2000-2001 yillarda ikki marta Nukusga safar uyushtirib har ikkalasida ham "quruq" qaytgan. Bekoboddagi o'yinlarda esa 0:0 va 1:0 hisoblari qayd etilgan.
1. "So'g'diyona". 10 o'yin. 4 g'alaba, 2 durang, 4 mag'lubiyat. To'plar nisbati 14:14
"So'g'diyona" va "Orol" bir-birlari uchun teng raqib bo'lishgan. Jizzaxdagi o'zaro o'yinlarda mezbonlar 3 marta g'alaba qozonishgan va qolgan 2 bellashuvda murosa ko'chasi tanlangan. Nukusdagi bahslarda esa mehmonlar bir bora g'alaba qozonib, 4 marta imkoniyatni boy berishgan. Har ikkala jamoada ham ko'rsatkichlar teng, hatto urilgan va o'tkazib yuborilgan gollar soni ham. "So'g'diyona" bir martadan 3:0 va 4:0 hisobida g'alabaga erishgan bo'lsa, "Turon" ikki bora 4:0 hisobida ustun kelgan.
BONUS
"Paxtakor". 10 o'yin. 3 g'alaba, 1 durang, 6 mag'lubiyat. To'plar nisbati 9:20
"Orol" uchun "Paxtakor" jamoasi Nukusdagi o'yinlarda qiyin raqib bo'lmagan. Poytaxtliklar Nukusga 5 marta safar uyushtirib 3 marta mag'lub bo'lib, atigi bir bora zafar quchishgan. Toshkentdagi o'yinlarning barchasida mezbonlarning qo'li baland kelgan.
Furqat Yusupov
"Orol"ning oliy ligadagi eng qiyin raqiblari TOP-5
Bosh sahifaga
249