Bu gal chempionat davomida qayd etilgan natijalar, qiziqarli faktlar xususida so'z yuritamiz.
Eng ko'p qayd etilgan hisob
2017 yilgi chempionat davomida jamoamiz ishtirokidagi o'yinlarda 12 xil hisob qayd etilgan. Vakillarimizning ettita o'yini 2:1 hisobida yakunlangan. Uchta bahsda shu hisobda g'alaba qozongan bo'lsak, to'rtta bellashuvda raqiblarga imkoniyat boy berilgan.
Beshta uchrashuvimiz 1:1 hisobida intiho topgan. To'rtta uchrashuvda 3:0 hisobi qayd etilgan.
Qolgan natijalar quyidagicha: 1:0, 3:2, 0:0, 3:1, 2:0 ikki martadan, 4:2, 4:1, 5:2, 2:2 hisoblari bir martdan qayd etilgan.
Golsiz o'yin
Mavsum davomida vakillarimiz oltita o'yinda raqiblar darvozasiga yo'l topa olishmadi, Bu bahslarning ikkitasida hisob ochilmadi. Qolgan 24 ta uchrashuvlarda futbolchilarimiz gol urishni uddalashdi.
O'z navbatida oltita o'yinda darvozamiz daxlsizligini saqlab qolganmiz.
Xet-trik va dubllar
Suhrob Berdiev bitta o'yinda uchta gol urgan jamoamizning yagona futbolchisi bo'lib turibdi. Berdiev 7-tur doirasidagi “Metallurg”ga qarshi kechgan o'yinda bekobodliklar darvozasini uch marta aniq nishonga oldi.
Bundan tashqari, jamoamiz to'purari “SHo'rtan” bilan Qo'qonda bo'lib o'tgan uchrashuvda raqib darvozasiga ikkita to'p kiritgan.
Nosir Otaqo'ziev ham ushbu mavsumda bir marta dublga erishdi. Jamoamiz sardori “Neftchi” darvozasini bir o'yinda ikki bor aniq nishonga olgan.
Penaltilar
Yakuniga etgan mavsumda futbolchilarimiz raqiblar darvozasiga besh marta penaltidan to'p kiritishdi. Barcha penaltilarni Murod Xolmuhammedov amalga oshirgan. Xolmuhammedov “So'g'diyona”ga qarshi o'tkazilgan har ikki uchrashuvda ham penaltidan gol urgan.
Seriyalar
Jamoamiz birinchi davrada qatorasiga 11 ta uchrashuvda mag'lubiyatga uchramadi. Bundan tashqari, qatorasiga 14 ta uchrashuvda raqib darvozasiga to'p kiritildi. Birinchi davrada futbolchilarimiz safardagi o'yinlarning beshtasida (ketma-ket beshta o'yin) mag'lubiyatga uchrashmagan.
Bosh sahifaga
175